လုံဒုံမှာ ဈေးဝယ်စရာ

လန်ဒန်မှာ အာရှသားတွေအတွက် ဈေးဝယ်ထွက်ရတာ နယ်မှာလောက် ဟင်းစားမရှားပါ။ ကိုယ်ကလည်း အစားတလုတ် အတွက်နဲ့ အင်မတန် ဒုက္ခရှာတတ်တဲ့သူဆိုတော့ ကိုယ်သိသလောက် ဈေးဝယ်ထွက်တဲ့ နေရာတွေ ရေးထားတာပါ။

မြင်းခွာရွက်၊ ဗုံလုံသီး၊ ဒန့်ဒလွန်သီး တို့ကို Walthamstow က သီရိလင်္ကာဆိုင်တွေမှာ ရတတ်ပါတယ်။ မြင်းခွာရွက်ကို ဖော့ပုံး အဖြူရောင်နဲ့ ထည့်ထားတတ်ပါတယ်။ တစည်းကို ၃၅ပြားလောက်ပဲ ပေးရပါတယ်။ ကြာသပတေးနေ့မှာ သွားရင် လတ်လတ်ဆတ်ဆတ်ရနိုင်ပါတယ်။

ဆူးပုတ်ရွက်၊ မန်ကျည်းသီးနု၊ ရန်ကုန်အခေါ် ရှမ်းနံနံ၊ ပင်စိမ်းတို့ကိုတော့ တရုတ်တန်းလမ်းမက New Lon Moon မှာ ၀ယ်ပါတယ်။ အဲဒီမှာ ဒညင်းသီးလည်း ရပါတယ်။ ဘုရားစူး ဒညင်းသီးပါ။ အရမ်းနုပြီး နံရုံမှတပါး စားလို့မကောင်းပါ။ ဒညင်းသီးနဲ့ဆင်ဆင်တူတဲ့ အသီးတမျိုးတော့ စားဖူးပါတယ်။ အဲဒီဆိုင်မှာပဲ ရပါတယ်။ အစိမ်းရောင်ရှိပြီး ဒညင်းအသေးစားနဲ့တူပါတယ်။ အခွံမပါ ပါဘူး။ ကြော်စားရင် စားလို့ကောင်းပါတယ်။ အဲဒီဆိုင်မှာပဲ ငပိရေကျိုလည်း ရပါတယ်။ ၀ယ်ထားပြီးသား မရှိလို့ မတင်ပေးရပါဘူး။

Sanction လုပ်ထားခံရတဲ့ မြန်မာပြည်မှ တင်ပို့သော မြန်မာငါး၊ ပုဇွန်များကိုတော့ Shadwell မှာ ရနိုင်ပါတယ်။ DLR စီးရပါမယ်။ station ကနေထွက်တာနဲ့ မျက်နှာချင်းဆိုင်လမ်းကြားတလျှောက်လုံးက မြန်မာ ရေခဲစိမ်ငါးတွေ ရနိုင်တဲ့ ဆိုင်တွေပါ။ ငါးကြင်း၊ ငါးမြစ်ချင်း၊ ငါးဖယ်၊ ငါးသလောက်၊ ငါးကွင်းညို၊ ငါးသလောက်ဥ၊ တလားဗီးယား.. စတဲ့ ငါးတွေ ရတတ်ပါတယ်။ ဆိုင်တွေကို အရင် လျှောက်ကြည့်လိုက်ပါအုန်း။ အတူတူ အဖေါ်ဝယ်မယ့်သူရှိရင် ပိုတန်ပါတယ်။ တစ်ထုတ်ကို ၂ပေါင် ၃ထုတ်ကို ၅ပေါင်ဆိုတာမျိုး ရောင်းတတ်လို့ပါ။ ငါးရံ့ခြောက်လည်း အဲဒီလမ်းတလျှာက်က ဆိုင်တွေမှာ ရတတ်ပါတယ်။ ၁ကီလိုထုတ်ကို ၁၀ပေါင်ပါ။ လတ်မလတ်သေချာ အနံ့ခံနိုင်ရင် ပိုကောင်းပါတယ်။ ငါးဖေါင်ရိုးခြောက်လည်း ရတတ်ပါတယ်။ ၃ထုတ်ကို ၅ပေါင်လောက် ရှိပါတယ်။ ငါးတွေကလည်း ရေခဲနဲ့ ခဲပြီးရောင်းတာဆိုတော့ public transportနဲ့သွားရင် အထုတ်တွေ အတော်ဆွဲရမှာပါ။ ကားနဲ့သွားရင်တော့ ညနေပိုင်း ဒါမှမဟုတ် တနင်္ဂနွေနေ့မှ သွားရင် အဆင်ပြေနိုင်ပါတယ်။ parking ခက်လို့ပါ။ ဆိုင်တွေ အနောက်မှာ ခဏဆိုရင် ရပ်လို့ (တရားဝင်မဟုတ်)ရနိုင်ပေမယ့် ၁နာရီလောက်ကြာတဲ့ ခဏဆိုရင်တော့ Tower of Hamlet car pound မှာ ပေါင် ၂၀၀ ပေးပြီး သွားရွေးရနိုင်ပါတယ်။ ဗူးညွှန့်၊ သရက်ကင်း၊ ငှက်ပျောအူတို့လည်း အဲဒီလမ်းတလျှောက်က ဆိုင်တွေမှာ တခါတရံ ရတတ်ပါတယ်။

Turnpike Lane (piccadially) မှာတော့ စတေရှင်က ထွက်လိုက်ရင် ဘက်စ် စတေရှင်လို့ ပြထားတဲ့ဖက်ကို မတက်ပဲ ဘယ်ဖက်က(news agent ရှေ့နားက)နေ မြေအောက်လမ်းလေးအတိုင်း တက်သွားလိုက်ပါ။ အပေါ်ရောက်ရင် ရှေ့နားနည်းနည်းဆက်သွားလိုက်ပြီး လမ်းကူးလိုက်ပါ။ အသီးအနှံတွေကို အပြင်ထုတ်ထားတဲ့ ဆိုင်လေး( ဆိုင်နာမည်က Food Hall လို့ ထင်ပါတယ်။)ရောက်ရင် တောင်းလေးဆွဲပြီး ခ၀ဲသီး၊ ခရမ်းသီး၊ ဗူးသီး၊ ဒန့်ဒလွန်သီး၊ သရက်သီးကင်း၊ ကင်းပုံသီး တွေကို တွေ့ကရာအိတ်ဆွဲပြီး ကြိုက်သလောက် ထည့်လိုက်ပါ။ ဆိုင်ထဲကို ဆက်ဝင်သွားပါ။ Agar Agar တွေ့ရင် တောင်းထဲထည့်ပါ။ (ကျောက်ကျော လုပ်စားချင်နေတယ်မဟုတ်လား။ သိနေတယ်။) မတွေ့ရင်လည်း ဆိုင်ထဲကလူကို မေးပြီး မတွေ့တွေ့အောင်ရှာပါ။ ရှေ့ဆက်သွားပါ။ Whole Yellow Bean တွေ့ရင် ၂ထုတ်လောက် ထပ်ဆွဲပါ။ ပဲပြုတ်လုပ်စား ရအောင်ပါ။ ကူလ်ဖီးလည်း ကြိုက်တတ်တယ် မဟုတ်လား။ တဗူးလောက် ထည့်ခဲ့ပါလား။ ပဲပလာတာပါ လုပ်စားရအောင် ပလာတာ ၂ထုတ်လောက် ဆွဲခဲ့ပါအုန်း။ ပြီးရင် ကောင်တာမှာ ကျသလောက်ရှင်းလိုက်ပါ။ ပေါင် ၃၀ .. ပလုံ...
အဲဒီကနေ ဒီဖက်လမ်းပြန်ကူးလိုက်ရင် မြန်မာငါးရောင်းတဲ့ ဆိုင်တွေရှိသေးတယ်။ ရှပ်ဝဲက ဆိုင်တွေလောက် မစုံပေမယ့် အဲဒီကို တကူးတက မသွားနိုင်တဲ့ အခါဆိုရင် ဒီမှာပဲ တခါတည်း ၀ယ်လိုက်ပါ။

Barbeque ရာသီရောက်လာပြီဆိုတော့ အင်္ဂလန်ကထွက်တဲ့ ငါး၊ ပုဇွန်တွေ ဈေးသက်သက်သာသာ ရနိုင်မယ့်နေရာကို သိထားရင် ကောင်းပါတယ်။
Billingsgate Market
Trafalgar Way
London
E14 5ST
ဒီမှာ အင်္ဂလိပ်ငါး၊ ပုဇွန်၊ ဂဏန်းတွေ ရပါတယ်။ မနက် ၅နာရီလောက် စပြီး ဈေးဖွင့်တယ်လို့ပြောပါတယ်။ ၇နာရီလောက် ရောက်အောင်သွားရင် ဈေးပေါင်ကျိုးနဲ့ အကိုက်ပါပဲ။ ၈နာရီဈေးပိတ်ပါတယ်။ စောစောသွားရင် လူအရမ်းရှုပ်ပြီး ကိုယ်လို နည်းနည်းပဲ ၀ယ်မယ့်သူတွေကို ဈေးသည်က တယ်အရေးမလုပ်ချင်ပါ။ တွန်းလှည်းယူသွားခွင့်မရှိပါဘူး။ ဆိုင်တွေက အိတ်အမည်းတွေနဲ့ ထည့်ပေးပါတယ်။ အားလုံးနည်းပါးက ဖေါ့ပုံးလိုက်ပဲရောင်းပါတယ်။ တချို့ဆိုင်တွေကတော့ ကီလိုနဲ့ ရောင်းပါတယ်။ ကားပါကင်က ဖရီးပါ။

ပျော်ရွင်ဖွယ်ရာ နွေရာသီ ဖြစ်ကြပါစေ။

အကြော်စုံ

မနေ့က အကြော်စုံလုပ်စားဖြစ်တယ်။ ရှိတဲ့ အသီးအနှံနဲ့ စုံအောင် ကြော်လိုက်တယ်။
ရုံးပတီသီး၊ ခရမ်းသီး၊ မြင်းခွာရွက်၊ တိုဟူး၊ ပုဇွန်ဆိတ်ကြော်တို့ပါ။
အမှုန့်ဖျော်ဖို့က Self Raising Flour ၄ဆကို ဆန်မှုန့်၁ဆနဲ့ ရောမွှေပါတယ်။ ဆားနည်းနည်းထည့်ပါတယ်။
ရေသင့်ရုံထည့်ပါတယ်။ မပျစ် မကျဲဖျော်မှ ကြော်က ရွရွလေးဖြစ်ပြီး စားကောင်းမှာပါ။ Smootie ဖြစ်အောင် မွှေပြီးတာနဲ့ စားချင်တဲ့ အသီးအနှံကို ထည့်နှစ်ပြီး ဆီပူပူမှာ ကြော်ရုံပါပဲ၊

အုန်းနို့၂မျိုး ဘယ်လိုသုံး

မနေ့က အုန်းနို့ခေါက်ဆွဲ ချက်စားဖြစ်တယ်။ သွေးတိုးရှိသူများ ဆက်မဖတ်ရင် ပိုကောင်းမယ်ထင်တယ်။ စားစရာတွေက အစပ်အဟပ် တည့်လွန်းလို့ တော်ကြာ လိုက်ရိုက်ခံနေရမှာစိုးလို့ပါ။

အုန်းနို့ခေါက်ဆွဲကို အိမ်မှာနေတုန်းက သိပ်မစားဖြစ်ဘူး။ အဝေးရောက်နေလို့ စားချင်တာတွေထဲမှာ ရောညှပ်ပါသွားရှာတယ်။ ပထမအကြိမ် လက်တည့်စမ်းတုန်းက ကုလားပဲကို ပြုတ်ပြီး လုပ်စားတာ အဆင်မပြေပါဘူး။ ဒီတခါတော့ ၃၊၄ ယောက်ရဲ့နည်းတွေကို ရောသမမွှေ ပလိုက်တယ်။

အရင်ဆုံး ကုလားဆိုင်က ၀ယ်လာတဲ့ ကြက်တစ်ကောင်ကို အတုံးသေးသေး ဖြစ်သလို ဓါးနဲ့ ခုတ်ပါတယ်။ ကြက်သားကို ဟင်းရည်ထဲမှာ ဘယ်သူမှ အတုံးညီမညီ လိုက်မကြည့်ဘူး ထင်ပါတယ်။ ပျင်းတာကိုတော့ လူမသိစေနဲ့ပေါ့။ (အရိုးမပါပဲ စားချင်ရင်တော့ ၀ယ်ကတည်းက အကောင်လိုက်ဝယ်ပြီး အိမ်ရောက်မှ ကိုယ့်ဟာကိုယ် အသားထွင်ပါ။ အသားတုံး သေးသေးလေးတွေ တုံးပါ။) ကြက်သွန်ဖြူ တစ်လုံး၊ နီ ၃လုံးလောက်ကို ညက်အောင်ထောင်းပြီး ဆီသတ်ပါ။ ပြီးရင် စောစောက ကြက်သားကို ငံပြာရည်ထည့်လုံးပါ။ ၅မိနစ်လောက် လုံးပြီးရင် အုန်းနို့ ၂ဗူးလောက်( ခေါင်းမကိုက်မယ့် အနေလောက်)ထည့်ပြီး ခဏ မွှေပေးပါအုန်း။ အချိုအငန် သင့်ရုံထည့်ပါ။ သကြား ဇွန်းသေးတစ်ဇွန်းထည့်ပါ။ တဖက်က ရေနွေးတည်ထားတဲ့အိုးထဲကို Gram Flour ပဲမှုန့်ရေအေးနဲ့ ဖျော်ပြီး မွှေပေးပါ။ ပဲမှုန့်သိပ်များသွားရင် တိုဟူးနွေးဖြစ်သွားတတ်ပါတယ်။ ဒါကြောင့် ရေကျဲကျဲနဲ့သာ ဖျော်ပါ။ ရေနွေးအိုးက ပဲရောင်ပေါက်သွားပြီဆိုရင် ခုနကလုံးထားတဲ့ ကြက်သားအုန်းနို့ထည့်ပါ။ ၁၅မိနစ်ခန့် မီးအေးအေးနဲ့ ပွက်ခိုင်းပြီးရင် အုန်းနို့ခေါက်ဆွဲစားလို့ရပါပြီ။ အတိုင်းအဆက မှန်းထည့်ပါတယ်။ ၁မိနစ်ကို ၁၀ခါထက် မနည်း မြည်းပါတယ်။ :P

အုန်းနို့ကျောက်ကျောက agar agar အထုတ်သေး(ကုလားဆိုင်မှာ ရတတ်ပါတယ်။ ၁.၄၉ပေါင် ရှိပါတယ်။ တထုတ်ကို ရေနွေးဆူဆူမှာ ထည့်ကျိုပါ။ သကြားလိုသလောက်ထည့်ပါ။ မြန်မာပြည်ကအနေဆိုရင် တော်တော်တော့ ထည့်ရပါတယ်။ ပြီးရင် အုန်းနို့တစ်ဗူးလောက်ထည့်ပါ။ ဗန်းထဲထည့်ပြီး အအေးခံပါ။ အတိုင်းမမေးပါနဲ့။ စိတ်ကူးပေါက်သလို ထည့်ပါတယ်။ အဆင်ပြေတဲ့အခါလည်း ပြေသွားပါတယ်။ မပြေတဲ့အခါလည်း ကျွေးမိတဲ့လူမှန်သမျှရဲ့ အပြောကို ခံရရုံမှတပါး......... အုန်းနို့နှစ်မျိုးကို ဒီမှာတင်ပဲ ရပ်နားလိုက်ပါတယ်။

ရှိလား၊ ရှိတယ်။

ဗမာစကားလုံးတိုင်းရဲ့ အဓိပ္ပာယ်ဟာ အမျိုးမျိုး ရှိပါလားဆိုတာ ကျွန်မ ကျေကျေနပ်နပ်ကို လက်ခံလိုက်ပါတယ်။ ဒီဇာတ်လမ်းကို ဘယ်ကနေ စရမလဲဆိုတော့ကာ..........

နွေရာသီတုန်းက တူမလေး ဒီကို ၂လလောက် အလည်လာပါတယ်။ ၈နှစ် ၉နှစ်အရွယ်ဆိုတော့ သူမပျင်းရအောင် အိမ်နားက ပန်းခြံမှာ သွားဆော့ဖို့ရာ သူကလည်း စီးချင်တယ်ဆိုတာနဲ့ စကိတ်တရံ ၀ယ်ပေးဖြစ်ပါတယ်။ မ၀ယ်ခင် သူ့ကိုအရင် ချန်းချန်း... ထိုင်ဝမ်မှာ စကိတ်ရှိလားဆိုတော့ သူက ရှိတယ်လို့ ပြောပါတယ်။ အဲဒါနဲ့ ဟိုမှာလည်း တစ်ရံရှိပြီးသားဆိုတော့ သူနဲ့လည်း အဆင်ပြေမယ့် ဖိနပ်မှာ ဖြုတ်လို့ တပ်လို့ ရတာလေးပဲ ၀ယ်ပေးဖြစ်ပါတယ်။ ဒါပေမယ့် တကယ့်စကိတ်နဲ့ ဒါနဲ့ ဈေးက သိပ်မကွာပါဘူး။ ကျွန်မလည်း သူ့မှာ ရှိတာနဲ့ တမင်မတူအောင် ရွေးဝယ်ပေးလိုက်တာပါ။ နောက်ရက် ပန်းခြံမှာ သွားစီးကျတော့ တဘိုင်းဘိုင်း လဲပါတယ်။ အဲဒါနဲ့ချန်းချန်းမှာ စကိတ်ရှိတယ်ဆို မစီးတတ်ဘူးလားလို့ မေးကြည့်တော့မှ ချန်းချန်းဆီမှာ ရှိတာမဟုတ်ဘူး။ ထိုင်ဝမ်မှာ ရှိတာကို ပြောတာပါတဲ့............. ကဲ။ မှတ်ကရော။

အမေနဲ့ သမီးတူပုံများ.....သူ့အမေ ဟိုတလောက နေသိပ်မကောင်းတာနဲ့ သူ့သူငယ်ချင်းတစ်ယောက်က လီမွန်ရှိလား။ ပျားရည်ရှိလား။ မေးတာကို ရှိတယ်ဆိုတာနဲ့ ဟိုက ရေနွေးပူပူလေးနဲ့ အခုချက်ချင်းဖျော်သောက်လိုက်ပါလား။ သက်သာတယ်ဆိုတော့.... သူက ထိုင်ဝမ်မှာ ရှိတာကို ပြောတာ သူ့ဆီမှာ မရှိဘူးတဲ့လေ။ ဖြစ်ပုံ ပြောပါတယ်။