CNN

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

CNN (voloet Cable News Network) is 'nen Amerikaonse nuitszender, gevesteg in Atlanta (GA). 't Kenaal en de bijbehurende nuitssite weure euver de ganse wereld oontvaange en gebruuk.

CNN oontstoont op 1 juni 1980 op initiatief vaan Ted Turner. 't Waor op dat memint uniek es tv-kenaal wat allein mer nuits oetzond en dat ouch nog ins 24 oor per daag deeg. De formule bestoont veural oet doorluipende bulletins - de bedoeling waor tot me op good gelök de tv kós aonzètte en direk vaan 't lèste nuits op de huugde woort gebrach, en tot de tv daan weer oet kós wienie de zender 't nuits góng herhole. Veur groet nuits woort dèks de loupende oetzending oonderbroke (zoegeneump breaking news). Al gaw kraog de zender ouch get mie conventioneel programmering, wie de laankloupende talkshow vaan Larry King. Veurweerde waor wel tot zoe'n programma's mèt 't nuits te make hadde.

In de late jaore tachteg bouwde de zender 'ne goje naom op en kraog 'r diverse prieze. Heer kaom ouch ummer dèkser in 't boeteland op de kabel, ouch in väöl Europese len. E huugdepunt vaan de zender waor de verslaaggeving roond de Golfoorlog vaan 1990-91. Ouch vaan groet later nuits, wie d'n oorlog in Kosovo (1999) en de aonsleeg op 't World Trade Center in New York (2001) woort gruuts verslaag gedoon.

Mèt de verrechsing vaan de Vereinegde Staote mós CNN 't in eige land ummer mie aoflègke tege Fox News. Väöl Amerikaone zien CNN es 'ne veuringenome linkse zender, e verwiet wat 't in Europa neet zoe aonkleef. Wie alle lineair tillevisiestaties heet 't de lèste jaore aon kiekciefers mote inlevere.

Vaan zoewel d'n tv-zender es de websites bestoon twie Ingelstaolege versies (ein veur de VS en ein veur wereldwied), zoewie versies in 't Spaons en 't Arabisch.

Externe link

Website vaan CNN (Internationaol editie)