Pumunta sa nilalaman

HTML

baguhin ang mga link
Mula sa Wikipedia, ang malayang ensiklopedya
HTML
Image
Opisyal na logo ng HTML5[1]
Ektensyon ng pangalan ng file
  • .html
  • .htm
Uri ng midyang pang-Internet
text/html
Type codeTEXT
Uniform Type Identifier (UTI)public.html
Ginawa ng/ni
  • WHATWG
  • World Wide Web Consortium (W3C; dati)
Unang labas1993; 33 taon ang nakalipas (1993)
Pinakabagong labas
Type of formatDocument file format
Lalagyan para saHTML elements
Naglalaman ngWeb browser
Pinalawak mula saSGML
Pinalawak tungo saXHTML
Bukas na pormat?Oo
Websitehtml.spec.whatwg.org

Ang Hypertext Markup Language (HTML) ay ang pamantayang markup language[a] para sa mga dokumentong idinisenyo upang ipakita sa isang web browser. Tinutukoy nito ang nilalaman at estruktura ng nilalaman sa web. Kadalasan, sinusuportahan ito ng mga teknolohiya tulad ng Cascading Style Sheets (CSS) at mga scripting language gaya ng JavaScript.

Ang mga web browser ay tumatanggap ng mga dokumentong HTML mula sa isang web server o mula sa lokal na imbakan at nire-render ang mga ito bilang mga multimedia web page. Inilalarawan ng HTML ang estruktura ng isang web page sa paraang semantiko at, sa simula, ay may kasama ring mga pahiwatig para sa itsura nito.

Ang mga HTML element ang bumubuo sa mga pahina ng HTML. Sa pamamagitan ng mga konstruksyon ng HTML, maaaring isama sa pahina ang mga larawan at iba pang bagay tulad ng mga interaktibong form. Nagbibigay ang HTML ng paraan upang makalikha ng mga organisadong dokumento sa pamamagitan ng pagtukoy ng semantikong estruktura para sa teksto tulad ng mga pamagat, talata, listahan, link, sipi, at iba pang bahagi. Ang mga elementong HTML ay tinutukoy sa pamamagitan ng mga tag, na isinusulat gamit ang mga angle bracket o panaklong na anggulo. Ang mga tag tulad ng <img> at <input> ay direktang naglalagay ng nilalaman sa pahina. Samantala, ang ibang mga tag tulad ng <p> at </p> ay bumabalot at nagbibigay ng impormasyon tungkol sa teksto ng dokumento at maaaring maglaman ng mga sub-element tag. Hindi ipinapakita ng mga browser ang mga tag ng HTML, ngunit ginagamit ang mga ito upang maunawaan at maipakita nang tama ang nilalaman ng pahina.

Maaaring maglaman ang HTML ng mga programang nakasulat sa isang scripting language tulad ng JavaScript, na nakaaapekto sa asal at nilalaman ng mga web page. Ang pagsasama ng CSS ay nagtatakda ng anyo at ayos ng nilalaman. Ang World Wide Web Consortium (W3C), na dating tagapangalaga ng pamantayan ng HTML at kasalukuyang tagapangalaga ng pamantayan ng CSS, ay naghikayat ng paggamit ng CSS kaysa sa tahasang presentasyonal na HTML mula pa noong 1997.[3] Isang anyo ng HTML na kilala bilang HTML5 ang ginagamit upang magpakita ng bidyo at awdyo, pangunahin sa pamamagitan ng elementong <canvas>, kasama ang JavaScript.

Markup

[baguhin | baguhin ang wikitext]

Ang HTML markup ay binubuo ng ilang mahahalagang bahagi, kabilang ang mga tinatawag na tag (at ang kanilang mga attribute), mga character-based data type, character reference, at entity reference. Ang mga HTML tag ay karaniwang nasa pares tulad ng <h1> at </h1>, bagaman ang ilan ay kumakatawan sa mga walang lamang elemento (empty elements) kaya walang kapareha, gaya ng <img>. Ang unang tag sa pares ay tinatawag na start tag o simulang tag, at ang ikalawa ay end tag o katapusang tag (tinatawag din silang opening tag at closing tag).

Isa pang mahalagang bahagi ay ang HTML document type declaration, na nagsisilbing magpatakbo ng standards mode rendering.

Narito ang isang halimbawa ng klasikong programang "Hello, World!" ("Pagbati, Mundo!"):

\n\n"}}" id="mwYg">
<!DOCTYPE html>
<html>
  <head>
    <title>Ito ang pamagat</title>
  </head>
  <body>
    <div>
        <p>Pagbati mundo!</p>
    </div>
  </body>
</html>

Ang tekstong nasa pagitan ng <html> at </html> ay naglalarawan sa web page, at ang tekstong nasa pagitan ng <body> at </body> ang nakikitang nilalaman ng pahina. Ang markup text na <title>Ito ang pamagat</title> ay nagtatakda ng pamagat ng pahina na ipinapakita sa mga tab at pamagat ng bintana ng browser, at ang tag na <div> ay tumutukoy sa isang dibisyon ng pahina na ginagamit para sa mas madaling styling. Sa pagitan ng <head> at </head>, maaaring gamitin ang elementong <meta> upang tukuyin ang metadata ng web page.

Ang Document Type Declaration na <!DOCTYPE html> ay para sa HTML5. Kapag walang ganitong deklarasyon, ang iba't ibang browser ay babalik sa tinatawag na "quirks mode" para sa pag-render.[4]

Mga pananda

[baguhin | baguhin ang wikitext]
  1. ↑ Bagaman maaaring patakbuhin ang HTML code sa isang browser, hindi ito itinuturing na isang programming language sa diskurso tungkol sa mga programming language.[2]

Mga sanggunian

[baguhin | baguhin ang wikitext]
  1. ↑ "W3C Html" (sa wikang Ingles). Inarkibo mula sa orihinal noong 2009-02-21. Nakuha noong 2017-10-17.
  2. ↑ Hermans, Felienne; Schlesinger, Ari (2024-10-17). "A Case for Feminism in Programming Language Design". Proceedings of the 2024 ACM SIGPLAN International Symposium on New Ideas, New Paradigms, and Reflections on Programming and Software (sa wikang Ingles). ACM. pp. 205–222. doi:10.1145/3689492.3689809. ISBN 979-8-4007-1215-9.
  3. ↑ "HTML 4.0 Specification — W3C Recommendation — Conformance: requirements and recommendations" (sa wikang Ingles). World Wide Web Consortium. Disyembre 18, 1997. Inarkibo mula sa orihinal noong Hulyo 5, 2015. Nakuha noong Hulyo 6, 2015.
  4. ↑ "Activating Browser Modes with Doctype". hsivonen.fi (sa wikang Ingles). Nakuha noong 2026-04-03.
Nagmula sa "https://tl.wikipedia.org/w/index.php?title=HTML&oldid=2200882"