Միջոցառումներ

«AI Conf 2026» Հայաստանի արհեստական բանականության ոլորտի առաջատար համաժողովը կանցկացվի արդեն 4-րդ անգամ: Այն կազմակերպվում է Երևանի պետական համալսարանի (ԵՊՀ), «Krisp» ընկերության, «Առաջատար տեխնոլոգիաների ձեռնարկությունների միության» հասարակական կազմակերպության, «Երևանէն» գիտակրթական հիմնադրամի համագործակցությամբ:

Ս.թ. մայիսի 16-ին՝ ժամը 10։00-ին, Երևանի պետական համալսարանում տեղի կունենա Շրջանավարտների ֆորումը՝ մեկ հարթակում միավորելով տարբեր տարիների շրջանավարտներին։

Ս.թ. փետրվարի 11-ին Երևանի պետական համալսարանում տեղի կունենա Գիտության ոլորտում կանանց և աղջիկների միջազգային օրվան նվիրված միջոցառում՝ ուղղված գիտության ոլորտում կանանց և աղջիկների ներգրավվածության վերաբերյալ իրազեկման բարձրացմանը, առկա խնդիրների քննարկմանը, ինչպես նաև երիտասարդ աղջիկների շրջանում գիտության հանդեպ հետաքրքրության մեծացմանը: Միջոցառման ընթացքում կանցկացվեն պանելային քննարկումներ, աշխատարաններ, գիտական խաղեր՝ թիրախային տարբերխմբերի համար: Միջոցառումը կազմակերպվում է ԵՊՀ-ի կողմից՝ Գերմանիայի կառավարության ֆինանսավորմամբ, Գերմանական միջազգային համագործակցության ընկերության (GIZ) կողմից իրականացվող «Ֆեմինիզմը գործողության մեջ՝ հանուն համակարգային փոխակերպման» (FAST) և «Կանանց հզորացում՝ հանուն բարեկեցության» (WoW) ծրագրերի շրջանակում։

Ս․թ․ սեպտեմբերի 16-ին՝ ժամը 11։00-ից, Երևանի պետական համալսարանում կանցկացվի «ԲանՈՒԳործ. ԵՊՀ էքսպո-2025» ցուցահանդեսը՝ նվիրված նոր ուսումնական տարվան և առաջինկուրսեցիների ընդունելությանը։ Լայնամասշտաբ այս միջոցառումը նպատակ ունի ներկայացնելու կրթական և աշխատանքային հնարավորություններ, ապահովելու արդյունավետ հաղորդակցություն գործատուների, շրջանավարտների և ուսանողների միջև, ինչպես նաև համապարփակ թեմատիկ քննարկումների միջոցով վերհանելու կրթական համակարգի ու գործատուների միջև առկա համագործակցության առանձնահատկությունները, խնդիրներն ու զարգացման հեռանկարները։

Ս․թ․ մայիսի 15-ին և 16-ին Երևանի պետական համալսարանում առաջին անգամ տեղի կունենա ԵՊՀ շրջանավարտների ֆորում։ Ֆորումի նպատակն է ստեղծել համալսարանական համայնքի համար հաղորդակցման և համագործակցության հարթակ, որի միջոցով ԵՊՀ տարբեր տարիների շրջանավարտները հնարավորություն կունենան քննարկելու արդիական խնդիրներ, ներկայացնելու իրենց մասնագիտական փորձն ու ձեռքբերումները, անդրադառնալու Հայաստանի, տարածաշրջանի և համաշխարհային մակարդակով տարբեր ոլորտներում առկա հնարավորություններին ու մարտահրավերներին: