புதிய சொற்கள்

பீமம் (அச்சம்) உற்ற மனம்
தூமம் (புகை) நிறைந்து சூழும்
பாமம் (ஒளி) சுடரிடும் அறிவு
சேமம் (நல்வாழ்வு) உருவாக்கும் வீட்டில்.
00
ஏமம் (இன்பம் -களிப்பு) ஒன்றே பெரிதெனும்
நேமம் (நேரம்) அருகே நெருங்கிடில்
தேமம் (ஈரம்) நெஞ்சில் நிறையும்.
நாமம் பதித்தும் உயரலாம்.
00
புதுமைக் கவி – வேதா. இலங்காதிலகம் – தென்மார்க் – 11-2-2024

ஓரப்பார்வையால் என்னைச் சாய்க்காதே
00

சொல் விளக்கம் (வாரம் வைத்தல் – விருப்பப் படுதல்)
00

வாரம் வைத்து வசமாக நினைக்கிறேன்
ஆரபி பாடியே ஆசையை ஏய்க்காதே!
ஓரப்பார்வையால் என்னைச் சாய்க்காதே!
தாரகை நீயே தலைவியாய் வருவாயா!
00
காதவிடுக்கில் ஒளிந்து நின்று பார்க்கும்
கைவிரல்கள் முந்தானை முடிச்சிடும்
கால் விரல்கள் மண்ணில் கோலமிடும்
காதல் சாலமா! வெட்கமிதா பெண்ணே!
00
வெட்கச் சிவப்புக் கன்னம் உன்
கட்டழகில் சொலிக்குதே! உட்கருத்து என்ன!
இட்டமுடன் யான் நோக்க மண்ணையும்
சட்டென நோக்காவிடில் என்னையும் நோக்குகிறாயே!
00
வேதா. இலங்காதிலகம் – தென்மார்க் – 18-2-2023

காதல் கனவே கலையாதே —காதலர்தினக் கவிதை

கூதல் தனிமையில் நடுங்காது
சாதல் நினைவை அணைக்காது
நோதல் நிலைக்குத் தள்ளாது
காதல் நினைவே கலையாதே!
00
செப்புச் சிலையே செங்கரும்பே!
ஒப்புவமை இல்லா ஒய்யாரமே!
பிரம்மன் படைப்பில் பிரமையடி
வரமுடை வரமே நீயெனக்கு!
00
ஆண் மனதை ஆட்டிடும்
ஆயிழையே உன்னை ஆராதிப்பேன்!
கள்ளூறும் மலராக மயங்குகிறேன்
உள்ளூற மகிழ்கிறேன் வா!
00
ஆதாம் ஏவாள் அனார்கலி
ஆராதித்த அற்புதக்காதல்
ஆடிப்பெருக்காய்ப் பரிமாறலாம் வா!
கூடிக் குலாவிக் குதூகலிக்கலாம்!
00
உறவை உயிராக எண்ணி
உலக வனத்தில் உலாவிட
பறவைகளாய்ப் பரந்து சிறகடிக்க
சிறப்பாய்க் கூடிக் கலப்போம்.
00
வேதா -இலங்காதிலகம் – தென்மார்க் – 13-2-2024

கவித்துவமான நடனம்

(சௌமியமாக- அழகாக வான்வளம்-மழை மகாபதும-குபேரநிதி
சொர்ணக்கல்- வைடூரியம்.)

மௌன இடைவெளி அடைமழை
கௌரவமாய்க் கம்பீரமாய்க் கதைத்தது.
சௌகரியமாக முத்துக்களாய்ச் சிதறியது.
சௌமியமாக மாலையாக்கிச் சூடலாமோ!

பூரண அமைதியில் பூர்த்தியாய்
பூச்சிதறலான மழைப் பூசனை
பூமாதேவியை நீராட்டுதலாய்ப் பூவிதயத்திற்குப்
பூத்தல் உணர்வு போற்றுகிறது.
00
சொரியும் ”சோ”வென்ற சாரல்
சோர்விற்குச் சோபனப்பாட்டு சோடிக்கிறது.
சொர்ணக்கல் சொல் மாரியே
சோதனை ஓடச் சொற்பொழிவாற்றுகிறாயா!
00
ஈரமான காற்றை ஈகமாய்
ஈடற்ற வான்வளமாய் ஈங்கெறிகிறாய்!
தண்ணீர்க் கதவுத் தடுக்கு
தடங்கலின்றி நிறுவுகிறாய் தகதகவென.
00
மழைக்கரக் கொடை மொழிகள்
மந்திர உவகையேற்றும் மத்தளமோ!
மகத்துவப் புல்லாங்குழல் மயக்கம்
மகாபதும மனநிறைவே மனிதனுக்கு.
00
கவிச்சுந்தர நடையுள் கௌரவமாய்
கலந்து மொழியோடு கட்டுதலாக
கவிதை மழை கவிழ்வதுவும்
கவித்துவமானதொரு நடனமே காற்றினில்
00
வேதா. இலங்காதிலகம். – தென்மார்க் 5-10-2021

பிழைக்கும் கவித்துவம்…

நந்தவனப் பூ மெத்தையில் சிறு நதி ஓரத்தில்
சொந்தம் யாருமின்றி இயற்கையை மிக விரும்பி ரசித்தல்

வண்டுகள் ரீங்காரித்துப் பறக்க வண்ணத்துப் பூச்சிகளும் சிறகசைக்க
கண்டிட முடியாத் தென்றலை உணர்ந்து குளிர்மையை ரசிக்க

எவரமைத்தார் இந்த நந்தவனத்தை! அருகினில் ஒரு இதம்
கவருகின்ற தென்னை மரச்சோலையும் பறவைகள் ஒலியும் பரவசம்!

பொல்லாக் காற்று இல்லாததால் தென்றலும் மெல்லிசைக் கடை
தொல்லையில்லா ரசனை! கவிதை பொங்கிட ஏது தடை!

தலையசைத்த மலர்கள் வாசனையை இதயத்துள் மெதுவாகத் தூவின
தலை ஆட்டும் தென்னோலைகள் சில தேங்காய்கள் தந்தன.

தனிமை இல்லையே! எங்கோ போனது! வண்டுகள் ஓசையும்
இனிமை சேர்க்கச் சோலை நிழல் காட்டியது கோலம்

குழலோசை ஒன்று குயிலோசையாய் தவழ மயக்கம் வந்தது.

உழவுமழையாய் உள்ளத்தில் பொழிந்து அரங்கத்தில் அமருமுணர்வு கூட்டியது

ஆகா! அற்புதம்! என்னே இயற்கை! எழுதலாம் எழுதலாம்
சாகா வரிகள்! பிழைக்கும் கவிஞன் திறமை என்றும்!

பா ஆக்கம்
பா வானதி வேதா. இலங்காதிலகம்.
டென்மார்க 17-8-2015

மழை மகிழ்ச்சி…..

மழை தளிர்களே விவசாய ஏக்கம்!
குழையடித்துக் குளுகுளுப்பாக்கித் தளிர்க்கும் இன்பம்
மழை தூறட்டும் எங்கும் பசுமை
மழை காணா ஊர்நினைவு கூடுது.
00
மழைக் குளிர்மை கிளர்ச்சி சுழற்சி
மழைக்கம்பீரம் மகத்தான உற்சாகம்
மழைச் சிலுமிசம் குடையுள் நினைவு
மனிதரைப் புறக்கணிக்கும் காரியவாதி
00
மழைப்பயம் சலதோசத்தொல்லை
மழைப்பயங்கரம்வெள்ளத் துன்பம்
சிலருக்கு இது செல்ல மழை
தொலைந்தவைகளைக் குளிப்பாட்டி அழைத்து வரும்
00
சிலுசிலுக்கும் மழைத்தூறல் உலுக்கும் ஊசித்தூறல்
பொலபொலவெனப் பொழிந்து கொட்டும்
சலசலவென நிகரிலா நிசப்தத்தைக் குளப்பி
சிலுசிலுவென நிரவித் தளும்பி நடனமிடும் இரவில்
00
உலர்ந்த விதைகள் உறங்கும் காத்திருந்து
உவப்புடன் மழையில் ஊறி அவிழ்ந்து
உயிராகும் அருமைத் தளிராய் ஆனால்
மழைபெய்தும் மௌனப் பறவைகள் சிறகடிக்கவில்லை
00
மழைநீரை கருமேகத்துள் தானே மொண்டு
குடிக்கிறது சூரியன் மெல்லின மழை
வல்லினமாய் மாறி அல்லியினம் ரசித்துக்
கிறங்க முல்லையினம் மகிழ்ந்து நனைகிறது.
00
வேதா. இலங்காதிலகம் தென்மார்க். 12-12-2023

தமிழன்னை விருது.
________________________ Mikka nanry.

நிலவும் மலரும் முத்தமிழ் குழுமம் -கவிதைப் போட்டி.
00
இளந்தமிழே தாய்த்தமிழே

திரண்ட பழந்தமிழ் இலக்கிய மரபுடைத்து.
முரணற்ற மணிமகுடம் சங்க இலக்கியங்கள்!
தரமுடை சான்றுகள் பினீசியர்கள் கல்வெட்டுகள்.
மிரண்டிடாதீர்! குமரிக்கண்டத்தில் தோன்றம் இளந்தமிழே!
ஒராங்கு ( ஒரு சேர) குடையும் இன்ப வண்டு.
00
தமிழனுக்குத் தாய்த்தமிழ் கலங்கரை விளக்கு.
தமிழரிதை உணர்தல் கலக்கமற்ற இலக்கு.
நம்முயிர்ச் சொத்தாமுலகின் பதினெட்டாம் நிலையே!
தட்டும் விரல்நுனி இணைய நூலகம்!
கொட்டும் முரசு வெள்ளிடை மலை!

வேதா. இலங்காதிலகம்.- தென்மார்க் – 9-2-2023

மதிமலர் – காதற் கவிதை

தோளணைத்துப் படர்!….

தோளணைத்துப் படர வாராயோ
தோழனே! இன்னுயிர்க் காதலனே!
தோற்பதல்ல தொடர்! நெருங்கு!
போர்த்தித் தூங்காது பாசமாய்
கொழுகொம்பாகச் சேர்த்தணை! நாடகம்
தொடரட்டும் காதல் முடிவதல்ல
00
சொல்லால் வசனம் இணைவதாய்
மெல்ல இறுக்குதலால் மேன்நிலைகாட்டு!
மல்லுக்கட்டாது பிரியாத தலையணையாய்
உல்லாசமாகச் சேர்! யாசிக்கிறேன்
உன் யோக தந்திரங்களை முடுக்கு!
அழுந்தப் பதி காமஇதிகாசங்களை!
00
காதல் ஞாயிறே! பாசதீரா!
காதல் இரசிகா! கந்தர்வா!
கலாபத் தேரெனும் நட்புச் சிகரனே!
கொள்ளளவு குறையாப் பேரன்புக்காரா!
கனிவோடு வா மழையீரமாக!
கண்ணுக்குள் கண்பார்க்க வா!
00

வேதா. இலங்காதிலகம் – தென்மார்க் – 10-11-2022

மதிமலர் – புதுக்கவிதை
அரவிந்த (தாமரை) இரவு…..

அரவிந்தமாய் மனிதம் மலர்ந்திட
உரமான இடைவெளி இரவு.
இரவென்ற ஒன்று இல்லாவிடில்
இரசவாதம் உறக்கத்தால் நிகழுமோ!
அரவமான துன்பம் இரவின்
உரசலால் காயங்கள் ஆறுமே!
00
நேசித்தவர்கள் தூரவாகிறார் மனப்
பாசி படர்ந்து வழுகுகிறார்கள்!
ஆசியென எண்ணிடு! துயருறாதே!
தூசியற்ற புத்திறகு பெற்றிடுவாய்!
தேசுடைத்து அனுபவம்! அறிவாமங்குசத்தை
தேர்ச்சியாக வில்லாக்கி அலங்கரி!
00
இறை கர்ப்பக்கிரகமன்ன கருவறையில்
சிறையற்ற உயரன்பு ஆரம்பம்.
குறையற்ற பொழுதழிந்து நாளாகும்
நிறை பொன்னழிந்து நகையாகும்
கறையுடைத்து பேராசை நல்ல
நறையான வாழ்வு எம்கரத்தில்
00
வேதா. இலங்காதிலகம் – தென்மார்க் – 10-11.2022

______________________________________

ANOTHER ONE :———

நிஸ்கா

நிஸ்கா நிஸ்கா
நீயென் ரதியடி
நீயென் நிம்மதியடி!
நீயென் நிதியடி

நிகரில்லை உனக்கு
நிஸ்கா எப்போதும் நீயே
நிசமாக இன்னொருவர்
நினைவில் இல்லை

நிறைகுடமான உன்
நிழலில் நானும்
நிலவாக நீயும்
நிலைத்திருப்போம் காலமெல்லாம்.

அஸ்கா புஸ்கா
நிஸ்கா என்று
நிரம்பக் கேலி பண்ணினால்
நிச்சயம் கோபமடைவாயா!

நிதானமாய்க் கூறுகிறேன்
நிறையச் சிரியடி நிஸ்கா!
நிகரில்லாக் கண்மணியே!
நீயென் உயிரடி நிஸ்கா!

எழுதியவர் வேதா.
8-6-2020
000

(இன்னாஸ் முகமட்டுக்கு)

---

novenber 26-2017

சங்கேமுழங்கு பாரதிதாசன் கவிதைகள்-20

Zegu Zegu‎சங்கத்தமிழ் சான்றிதழ் பதிவு குழுமம்

வாழ்க தமிழ்மொழி வாழ்க தமிழ்மொழி வாழ்க தமிழ்மொழி யே. வானம் அறிந்த தனைத்தும் அறிந்து வளர்மொழி வாழிய வே.

சங்கத் தமிழ்க் கவிதைப் பூங்காவில்

28/02/2017 நாள் நடந்து முடிந்த புதியதோர் உலகு செய்வோம் எனும் தலைப்பில் பாரதிதாசன் போட்டியில் 
கவிதை எழுதிய

கவிஞர் [ இலங்கா திலகம் வேதா]
சிறப்புச் சான்றிதழ் வழங்கி கெளரவிக்கப் படுகின்றார் கவிதை எழுதிய அனைத்து பாவலர்களுக்கும் வாழ்த்துக்கள்.

சிறப்பான கவிதைகளை தேர்வு செய்த நடுவர் கவிஞர் கோவிந்தராஜன்பாலு அவர்களுக்கும் வாழ்த்துக்கள்

தலைமை நிர் வாகி ந. பாண்டியராஜன் *********************************

*

புதியதோர் உலகு செய்வோம்.

*

புதியதோர் உலகு செய்வோம்
விதியதை மாற்றி நெய்வோம்.
இதிகாசங்கள் காலத்திற்கும் பேச
மதியதின் செயற்பாட்டை முடுக்குவோம்.

பஞ்ச மகா பாதகங்கள்
நஞ்சுடைய செயலெனப் பாலகருக்கு
பிஞ்சு வயதிலேயே புகட்டுவோம்.
நெஞ்சிலே நன்னெறிகள் ஊட்டுவோம்.

மரங்கள் நட்டு பாதுகாத்து,
வரமெனும் மழை பெற்று
தரமுடை மண் வளத்தைக்
கரம் குவித்துப் பெறுவோம்.

மூடநம்பிக்கைகள் கேடுகள் அழித்து
ஆடவரோடு பெண்டிர் கல்வியையும்
தேடிடக் கை கொடுப்போம்.
கூடிடுவோம் நீதியே கொடியாக.

ஓற்றுமையாம் கூட்டுறவு பெருக்கி
கற்றவரான உலகு அமைப்போம்.
அற்புதச் சுகாதாரம் உயர்த்துவோம்.
சுற்றம் பேணிச் சுகமாவோம்.

அன்பே தாரக மந்திரமாகி
வன்முறை அற்ற உலகை
தென்புடன் இணைந்து உருவாக்குவோம்.
இன்பமான புத்துலகு அமைப்போம்.

வேதா. இலங்காதிலகம் டென்மார்க். 

november 25 2017

சங்கே முழங்கு பாரதிதாசன் சான்றிதழ் -19

வாழ்க தமிழ்மொழி வாழ்க தமிழ்மொழி
வாழ்க தமிழ்மொழி யே. 
வானம் அறிந்த தனைத்தும் அறிந்து
வளர்மொழி வாழிய வே..

வணக்கம் கவி உறவுகளே..

சங்கத்தழிம் கவிதைப் பூங்கா குழுமம் நடத்திய 24/02/2017 தின பாரதிதாசன் போட்டியில், விழி கூறும் மொழி கேளாய் என்ற தலைப்பிற்கு கவிதை எழுதி வெற்றிபெற்ற கவிஞர் வேதா இலங்காதிலகம் அவர்களை குழுமம் சார்பாக வாழ்த்தி மகிழ்கின்றோம்.

விழி கூறும் மொழி கேளாய்

*

மொழியற்ற என் ஆழ்ந்த காதல்
விழி கூறும் மொழி கேளாய்!
அழிப்பான் இல்லாத வட்டத்தில் விரியும்
எழில் காதல் மன்மத அம்பிது.

விழி என்ற சிற்பி செதுக்கும்
இழிவற்ற உன்னதக் காதல் கலையிது.
செழித்திடக் கடைக் கண் காட்டு!
பொழிவுடை வாழ்வு விரித்துக் களிப்போம்.

மொழிப் பின்னல் தொடர்பு, உயிர்
வழி செல்லும் அற்புதப் பயிர்!
கொழித்த உறவு பெருகும் நந்தவனம்
விழி கூறும் மொழி இன்பமானால்!

காந்த விழி அன்பால் என்னை
ஏந்தட்டும்! விலையில்லா உறவு இது!
வந்து தந்திடுவாய் காத்திருப்பேன் உனக்காக.
சொந்தமாக்கு கண்ணாளன் என்ற உறவை!