2014年3月16日 (日) (晴)
仲有4日就係哈碌仔仔兩歲生日喇!
不過烏龍媽媽竟然要去旅行
唯有提早同哈碌慶祝啦!~
有罐罐山+美味膏膏補數
鄰居姐姐送既禮物... 哈碌好心急想食呀!
仲有我親手做, 但哈碌冇份食既百利甜酒芝士凍餅
玩完一輪又要覺覺豬lu~
哈碌, 祝您身體健康! 日日都咁開心! 錫晒您!!
2014年3月9日 星期日
Brunch Club & Supper
2014年3月8 日 (六) (雲)
今日要陪老公去銅鑼灣剪頭髮
於是去左Brunch Club食lunch
樓梯同門口都裝修得同店舖內外呼應
一入店內已經企滿等位既人, 好彩都唔算等好耐就有位喇!
呢度主要食all day breakfast同egg benedict, 價錢都好合理
我當然係食egg benedict with smoked salmon啦!
流心做得好靚, 配煙三文魚味道一流, 其他沙律配菜同薯餅都好食!
哈米波波既Mix Grill都好大堆頭啊! 但每款肉都係就咁乾煎, 好似好冇調味咁...
只食到又乾又鞋既肉, 連食肉獸既老公都話太多肉了
我杯細Latte, 奶泡豐厚綿滑, 味道唔錯
等哈米波波剪頭髮期間去左Typo見到有木字母, 黑白兩色, 55蚊3個, 抵過喺淘寶買啊!
跟住去左旺角買左兩張16gb既wifi SD card,
以後喺相機影完相, 都可以即時share過落電話或Tab, 好方便!
2014年3月6日 星期四
Desserts Night
2014年3月4日 (二) (雲)
今晚好榮幸得到Oli同Elsie既邀請去到旺角既HeSheEat享受左一餐豐富既甜品之夜
裝修係我喜歡既北歐風, 簡約得黎帶點型格!
店舖有上下兩層
每個corner都有少少特色
重點係主題顏色用上我最愛的Shocking Pink!! Lovely~
淨係裝修已經好得我歡心喇~ 講到好似做梗安樂蝸咁添~ 哈哈!
呢度既Head Chef都大有來頭... 好期待呢~
先黎白朗峰栗子蛋糕
厚厚既栗子蓉, 香軟幼滑, 甜度啱啱好, 中間係杏仁海綿蛋糕, 連同蛋白脆脆一齊食, 更有口感
柚子香橙凍配雜莓鮮忌廉乳酪雪芭, 好鍾意佢地自家製既乳酪雪芭, 酸酸地好開胃, 底層係柚子啫喱, 感覺清新
櫻花草莓奶凍, 草莓雪糕好重奶味, 但卻麻麻地果種"櫻花"味... 感覺好假
檸檬忌廉班戟卷配蜜糖脆脆, 呢個係我其中一個最愛甜品之一
初初見到佢外表冇乜特別, 唔太吸引咁, 但試一啖就對佢改觀喇!
班戟包住檸檬味忌廉, 連同蜜糖脆脆, 唔駛講都知味道相當匹配啦~
加上乳酪雪葩, 又係我最愛!
我對朱古力甜品簡直係愛不釋手, 而且係最穩陣嘛~
呢個特濃黑朱古力慕絲都冇令我失望
朱古力香味濃郁, 層次豐富
仲有情人節特別限定既士多啤梨撻, 淨係賣相已經甜入心
呢個又係我好鍾意既甜品, 中間既白芝士如cream一樣軟滑, 加上底層鬆化既酥皮撻底, 一軟一脆真係食到唔停得口
焦糖日式芝士蛋糕... 見到芝士又點可以唔叫呢~
白色泡沫其實係用分子料理既造法而成既芝士蛋糕泡沫, 芝士味香甜, 反而比旁邊既焦糖日式芝士蛋糕仲要味濃, 我諗兩者一齊食就啱啱好喇!
招牌榛子朱古力心太軟蛋糕配椰子雪糕
again朱古力甜品永遠都係我心佔一席位, 每次食到好食既朱古力甜品都會有種好幸福既感覺...
呢個心太軟流心同蛋糕既比例做得啱啱好
不過自己就麻麻地配椰子味雪糕...有少少格格不入
壓軸既係草莓熱鬆餅, 之前見到日本有呢D鬆軟厚厚既熱鬆餅已經睇到流晒口水
而家香港都食到喇!
鬆餅夠濕潤, 唔會死實實, 最出色既係底面煎到脆脆, 好好食! 忍唔住食左兩舊呢~
飲品我叫左芒果茶, 有芒果雪葩同芒果粒粒果肉, 但茶冇乜芒果味, 可以用淡味黎形容
士多啤梨茶
香蕉朱古力奶昔
熱朱古力泡沫
HeSheEat Dessert Cafe
旺角白布街22號藝興大廈地下4號店
2014年3月5日 星期三
一人前
2014年2月25日 (二)
今日心血來潮想食拉麵, 但放工有事要去元朗市中心
又唔想行咁遠返去Yoho果邊既地山謙
於是就去左建業街既一人前
其實呢間喺開業冇幾耐都食過一次, 當時哈米波波話湯底過濃 (佢好怕杰身湯底)
而我又冇乜留下深刻印象, 所以就冇再食過...
拉麵有五款, 可以揀麵既軟硬度, 但冇得揀味道既濃淡
哈米波波叫左海鳴, 湯底有蝦既鮮甜味, 不過隻蝦附送蝦腸....
我叫灯火, 湯底話有黑蒜油, 秘製辣味噌, 我習慣先飲一啖湯, 發覺完全冇以上兩種味
原來要撈完先有味... 不過兩種味都唔太突出, 有少少到喉唔到肺感覺
叉燒係入口即溶的, 糖心蛋亦唔錯
煎餃子
我地坐吧枱, 隔住玻璃望到廚房既工作, 發現有員工手指包住膠布, 但冇帶手套就徒手攞食物, 感覺唔係太衛生... 既然佢做得open kitchen, 呢點真係要注意下 (我明白眼不見為乾淨既道理... 但俾我見到就....)
食完拉麵, 有人話唔夠飽, 於是去左松記食甜品
都好多選擇啊!
我既雜果豆腐花
雜果冰冰杯
訂閱：
意見 (Atom)
