地下A室

在栩栩生日時，送左一件佢夢寐以求的復古比利時球衣，S碼好難買的，佢超開心! 兩個月後，忽發奇想，不如多買一件作客的俾佢，作為鼓勵考試的禮物，俾佢一個驚喜。怎知送貨一波三折，遲左一星期先收到，佢當然開心啦，仲有佢心愛Hazard的名同號碼! 不過，好多同學都問佢，Why Belgium?  Why not England?  咁情況都好易俾人打的。

已經大半年沒有上載文章了！其實久不久都在iPhone寫低關於地下A室的大小事，但總提不起勁放在這個地方。今天就在端午節的悠閑上午，的起心肝，過去幾個月的記憶啦！

可可在六月初已經考完試，成績也已經派發，中規中矩啦……數學科應該可以有更佳成績的，粗心大意囉。

學業和補習，真是密不可分，充滿矛盾，特別是對這個衰女來說！補習確實可以提高成績，對於知識方面幫助卻不大，因為補習不能燃點起她對中文的興趣，即係用錢買分數啦！真矛盾囉！

哥哥呢？他也在星期四考完試，他說他很專心溫書，將電話放在一旁（他的電話問題越來越嚴重，等他回香港後，要和他詳談詳談）。他自從入了精英班之後，成績通常都在中間位置，他的目標去到前十名，上次小測他勉強得到第八，希望今次考試考真功夫後，他都可以保持頭十啦！

我們家9000多公里，都有幫她少少功課的，當然他不太願意，又沒有記性，成日都忘記將筆記影給我。但爸爸始終是讀科學出身，冇理由唔幫下手嘅！

可可每年都參加自由式喎蛙式比賽，這三年來每年都會得到起碼一個第三名，起碼有牌攞。今年爸爸抽空看了他第一個比賽，是她最擅長的蛙式，得到第六名。雖然已經是她最快時間，但她依然很失望！因為比賽前找了教練執她的泳式，進度不錯，但在她進步之餘，其他人都一併進步中！

爸爸走後，竟然接到訊息，她在自由式竟然得到第三名，還第一次是在40秒內完成，有得再上頒獎台，很興奮呢！我可，你要好好享受六年級的最後一年水運會，因為上到中學，你一定入唔到泳隊，又冇機會參加比賽呢！

在栩栩最後一個假期，因為時間較短，又要準備大考，所以沒有回港，住在夫人同學在Reading的家。在這7天，栩栩跟了他們看Rugby同去郊外家庭樂，又有獨處讀書同出城買野的時間，對於他與大人相處同自己解決問題都有幫助。不過，他的被動同過於安靜就激到9000公里外的夫人扎扎跳，因為他有時不出聲，大人不知他是滿意抑或不滿意，又不主動做家務，搞到同學要越洋同夫人投訴，夫人當然同栩栩訓話啦，佢被人話當然頭dupdup啦。等栩栩回港，要好好用適當的方法同佢傾下先。

這是栩栩的House的大合照，樣衰衰咁。

身在英國，當然有好多香港人少有機會的親身site visit。一個月前，學校原本要在清晨帶佢地去Stonehenge睇日出，但因有風雪要延期，呢日終於成行。地理老師話果D石頭的擺法係同大陽升起有關，但當日天氣又不大好，去到已經日出三竿，但實地聽老師講已經比做遊客時更有得著了!

今天可可柴娃娃去沙田馬場奏獅子山下破世界紀錄，佢好好彩可以坐第一行，拉得點就唔知，成千人邊會聽得到呢，但起碼可以上下鏡咁囉。爸爸之後就去左同康叔叔會家庭會議，希望佢D生意繼續健康發展啦!

哥哥在10月15日的八號風球回港，眨下眼就兩星期，就在昨晚重陽節返英國了。在這十多天，他除了見見老朋友及小學老師外，亦學了兩課巴松管，最重要的是他完成了兩大任務:

• 買大量日本糖回英國做小生意。鬼仔好喜歡食日本的果汁軟糖，非日本不要，硬糖亦不要。
• 食野，佢已經食左好多好多美食，包括漢發安利豪大大打邊爐鹵水鵝譚仔等等，只有三洋及深水埗豆卜未有時間去食。

希望呢個薄情的栩栩守承諾，每日發一幅相回香港—–只是一個好卑微的一個請求。

因為自己做的slime並不太成功，剛才就去了格仔店買了兩盒俾可可玩，幾廿歲人第一次去格仔店，感覺新鮮，十元八塊就有交易，真係唔啱啲學生玩！

專業的鬼口水真的不同，手感一流，又唔痴手，就咁就玩左一個鐘頭！

自從哥哥走後，睇少一個仔，真係輕鬆好多！夫人就可以有好多時間做瑜伽，爸爸就可以盡情地行山。裝了行山app之後，已有五十多次山記錄了。大家多做了運動，真係有成績架。兩人都瘦了10至20磅，可以著返中碼衫了！

另外，可可都承認同爸爸的關係好了很多，比以前鬧少咗，真係估唔到。

哥哥明天返香港了，佢第一次自己上飛機，又碰啱3號風球，希望一切順利啦！

可可每天在YouTube及IG都鍾意睇人哋玩slime鬼口水，好想自己做。之前試過買啲材料做（有隱形眼鏡藥水，好貴！），但不太成功。今天可可考完八級大提琴，希望佢輕鬆下，就買了另一種材料比他玩，點知都有少少成功喎，將兩種膠水一混合埋一齊，就成功了，話都冇咁易！

可可一向考琴都沒有運氣，哥哥符符碌碌就會distinction，但可可考大提琴，兩次好努力之後都只有Merit，問題就是她非常怕羞，沒有將感情express 出來。

過去幾個月，夫人同佢一起努力之後，怕羞啲方面好似改善咗，出嚟效果真係好過以前好多。但是，沒有考試分的可可，今次的結果如何呢？幾個禮拜之後就知道啦！

可可在學校拉琴都好開心，每次放學都係嘻嘻哈哈咁樣出嚟，出年六年班佢就係大姐姐，唔知可唔可以坐到首席個位呢？上到中學就唔同環境，因為好多勁人會入中學，小學上去嘅未必可以順利入到團添！

老師一家要去台灣慶祝周年紀念，屋企啲仔仔囡囡就分比唔同朋友照顧，所以大力又來我們家渡假一星期。大力大隻左好多，同佢洗身時完全唔夠力反轉佢（每次佢屙完屎都要洗身的），有點兒吃力！再咁落去，人類越來越老，佢就越嚟越健壯，真係無人照顧到佢啦！

學校的游水教練話可可太瘦，又冇力，在學校要加強體能訓練之外，喺屋企都要操下啲肌肉運動。因為佢今年又入咗校隊⋯⋯後備，所以佢自己都想做好啲。

屋企那非常user friendly的會所都有健身室，但是16歲以上才能使用，那可可唯有去小朋友的小型健身室玩，聊勝於無啦！😂

栩栩剛剛派左第一次嘅測驗成績表，佢哋全級有六班，按成績佢被被編入第四班，在14科中，有七科係全班第一，順理成章整體就係全班第一，按成績仲比第二及第三班好添，所以佢遲啲會上較好成績的叻仔班。

因為栩栩嘅新聞封鎖，我們根本不知佢讀書考試嘅情況，只有佢自己去編排時間，加上佢在樂團同泳隊的投入，如果佢係一個不善於編排時間，或者沒有自制能力的人，都幾大鑊。幸好，so far so good. 等佢返嚟香港時，再詳細了解下佢生活嘅情況先！

昨晚去學校接可可是有一奇遇。

當去到可可學校時，見到夫人正和一個印度男人傾計，一個攞住地圖，一個攞住個電話喺度不斷㩒，落車問問發生什麼事。原來印度遊客一家五口，想截的士返土瓜灣一間酒店，夫人幫佢用Apps叫的士。但在中秋節夜晚，例牌塞車塞到PK，邊度可能有車喎！眼見他們有老有嫩，個BB女做喊到發癲，就二話不說叫佢哋上車，一齊迫返去土瓜灣。呢個並唔簡單架，因為車上已有個大提琴，對方仲有一架BB車添，但是事在人為，最後都塞得晒。BB一上車，媽媽即刻餵人奶，BB即刻乖晒。15分鐘之後就到了，他們十分之感謝這三位樂於幫人的香港人，仲急忙地摷到一罐藍妹乾俾可可。

雖然最後我們遲了一個小時才到達荃灣，付令姥姥老爺有少少不快，但可可覺得好好玩，因為她與年紀差不多的印度姐姐有傾有講（雖然可可都係用蚊滋聲），佢今個星期嘅日記有主題了！

自從哥哥去咗英國之後，爸爸同媽媽就多咗做運動，但因為興趣不同，爸爸鍾意行山，媽媽十分喜歡做瑜伽(已被好多人話去到上癮程度)，唯有分開進行，各自各精彩! 運動了幾個月之後，兩個都有點成績，媽媽都瘦了二十多磅，爸爸就只有一半的成績，只輕了十磅。未來會多做減肚腩的運動，因為依然有好大pat脂肪啊!

栩栩在英國嘅生活非常之充實，要同佢傾計真係難過登天，除咗時間難配合之外，如果唔係鬧佢逼佢，佢根本唔會理會香港的家人（唔知道佢對香港啲朋友如何呢？ ）。好多次，要發晒脾氣，先逼到佢用錄音講解佢學校嘅情況，如果唔係，根本佢上咩堂、幾時去吹樂團、幾時去做運動游水、幾時測驗考試，乜都唔知道。頭幾個禮拜已經咁樣，以後佢更融入當地生活之後，真是不敢想像！

哥哥剩低的蘇州屎，原來一啲都唔容易砌，一個鐘頭先砌得一層。唔緊要，大把時間。