星期一：大事不宜

好消息：媽媽的詳細檢查報告出左了！乜事都無！對腳紅腫只係因為大肚的小小side effect！正一係「財散人安樂」（成個檢查加兩次醫生用左$2,000，可以買一部i-pod了! ），而家終於安樂晒！呢個醫生都唔錯，起碼無俾人亂做檢查的感覺，仲幾有型添！

今日兩公婆一齊放假，一心想去大坑食下好野(such as 阿So介紹的)，萬萬想不到所有想食的，不論係鐵皮大牌檔，定係型仔小餐廳，一律在星期一休息!!! 真係掃興! 最後去左一間好多的士佬幫襯的冰室，求其叫左兩個午餐(什麼蒸肉餅，豆腐火腩的普通野)，點知超級好食，奶茶超級好飲，每位$31，真係意外收穫!

星期一的噩夢尚未完結，原來維園泳池要大洗(多謝勤媽在百忙之中抽空幫手)! 迫住去左堅尼地城游泳池，在滂沱大雨中只有5個人游水! 不過無想像中咁凍(原本HHB想求其浸下水就算，只係HHM想游水)，加上d水好似好fresh，最後游得好開心!! 今日先發覺原來游水係下雨天最好的戶外運動。