栩栩同可可的 Dale Dale爭奪戰已經升級, 今日終於打起交。事緣哥哥正抱住Dale Dale 睇電視, 妹妹大叫大嚷伸手去搶, 哥哥死不放手, 妹妹就一巴一巴地打哥哥塊面, 哥哥不甘示弱, 一邊喊一邊打妹妹隻腳, 最後麻麻將兩人分開, 麻麻安撫喊到索氣的妹妹, 咩精負責同哥哥抹眼淚。幾分鐘後, 哥哥入房將Dale Dale俾妹妹, 同妹妹講：「你講唔該先吖!」，兩人就和好如初。事實証明, 哥哥係願意將公仔俾妹妹玩的, 但佢覺得妹妹應該好好地問, 唔應該搶; 另外, 佢亦愛護妹妹, 還手時唔打妹妹塊面, 只打腳腳。呢件事又一証明哥哥係一個乖仔。妹妹, 你再係咁, 唔好怪爸爸偏心啊!

麻麻在電話描述事件時, 身在公司的爸爸笑到碌地, 好想現場感受一下戰場的氣氛。

另, 爸爸屈服了, 為免戰火重燃, 一放工就飛車去買埋Chip Chip。Chip Chip 係哥哥的, Dale Dale係妹妹的, 希望聽日唔會再收到麻麻的求救電話啦!