我家Minnie

Minnie 嚟咗我家已經三個多月，佢平時作息都好固定，好多時我朝早起身，行出廳多數見佢係個窗台度睇雀仔

同哥哥姐姐一齊捕雀雀

初初係廚房等食早餐時，都會去搞啲哥哥

不過依家無喇，佢會好乖坐係兜前等食，仲有佢只習慣食呢兜，裡面無晒貓糧，佢會坐係個兜前面度等，真係等唔到，至會食其他啲兜，其實佢都幾大食，啱啱食完濕糧就即刻要食乾糧

之後佢會去廳個長籃度一邊昅住窗外有無雀仔兼瞓覺

會自己搵嘢玩

鍾意坐電腦椅，學奇哥鍾意坐係電腦椅背上

有時又鍾意嚟黐住我

 

其實佢好鬼百厭，跳上神枱，比大姑媽見到實鬧屎

 

下午佢會鍾意返另外間房張電腦椅度瞓

又爛玩

又鍾意撩啲哥哥玩

 

我係廚房洗菜，佢又會嚟搞住晒

又成日偷菜食

佢都唔太抗拒梳毛

成日係厠所搞搞震

夜晚又鍾意係厠所塊布度瞓覺，通常都會抱番佢入另外嗰間房張電腦椅度瞓

當我哋沖完涼，佢依家好鍾意跳上窗台飲啲花洒水

仲會係度等人沖完涼，等人一推開塊浴簾就跳上去飲

其實我覺得佢條尾好長

佢絶育幾日後發現佢個傷口裡面腫咗一舊，打咗電話去問，話應該係佢太活潑，成日紥紥跳，搞到有啲氣走咗入去，好彩大約一個星期就消退咗，真係比佢嚇屎

紐約疫情

估唔到呢個武漢肺炎，搞到全球立立亂，呢幾個星期，係紐約來勢洶洶，要即刻出禁閉令

我平時去洗衫間洗衣舖，一出禁閉令就即刻暫停營業

上個星期日行出唐人街，都已經見啲舖頭無開門，餐廳食肆都只做外賣，超市、舖頭都會提早收工

見開始疫情爆發，我哋都陸陸續續入定多啲糧食，冷藏肉類、罐頭、餅乾零食

因為都唔知個疫情會搞到幾耐，所以都係買定多包米隠陣啲，咁入定啲貨，咁就唔駛咁頻密出去買餸，多啲留係屋企

之前啲人去搶厠紙，我就唔會咁癲，見屋企仲有兩pack，都費事去搶，通常屋企啲日用品，我都係襯做特價時買定

除咗人食嘅食物，當然幫貓地入定啲貨，啲人唔出街，多咗好似我咁會上網採購，有部份罐頭，我哋上網買，有啲都已經無貨

仔仔爸仲賣咗零食同貓草、貓草玩具，呢段時間我哋都唔會比貓地出走廊散步，所以要比多啲玩具零食氹番佢哋

連我姑仔都有幫手，幫我家貓地入咗啲乾糧、罐頭，不過就唔知幾時至交到比我喇，哈哈

早幾日出去，唐人街已經冷清清

一開始有呢個病毒，仔仔爸已經叫敏姐同伯伯盡量留係屋企唔好出去，我哋買開餸，都會幫佢買埋，敏姐唔出街，依家我隔日去放糧水比啲公園貓，唔係實餓死佢哋

覺得好慶幸係，一早叫咗阿姐返嚟幫手帶咗Minnie 去做絶育，如果唔係會因為呢個疫情而唔知要拖幾耐

我哋出街當然會帶口罩啦

Chewy 同Minnie 都表示，話佢哋係屋企都一樣長期住帶口罩，哈哈

早兩日仔仔爸都可以早早收工，而今日開始，公司接唔到order，所以仔仔爸都開始唔駛返工，我有啲朋友一早都已經唔駛返工，仔仔爸今日都有出去行吓，見唐人超市貨架上，好多都空空如也

呢個武漢肺炎，全球爆發，引起經濟、民生種種不便，希望呢個疫情可以快快消退，回復大家以往嘅生活