diorit
Diorit je hłuboka magmatiska kamjenizna, kotraž wobsteji ze žiwca a amfibola. Žiwc ma podźěl wot 30 hač do 50 % a přewahuje běły plagioklas, amfibol je čorny. Diorit je zwjetša ćmowy, šěry, šěrozeleny hač šěročorny. Dale móže pyroxeny (hłownje awgit) abo błyšćinku (biotit) wobsahować. Křemjeń je jenož do 5 % zastupjeny; jeli wobsahuje wot 5 hač do 20 % křemjenja, rěka kamjenizna křemjenjowy diorit abo tonalit. Diorit ma zwjetša srjedźne zorna a twori hłuboke ćělesa. Samsnu zestawu matej andezit (wulkaniska magmatiska kamjenizna) a dioritowy porfyr (žiłowa magmatiska kamjenizna). Zornowc so wužiwa jako twarski a dekoratiwny kamjeń. Mjeno pochadźa wot grjekskeho słowa diorizein (dia + horizein) a woznamjenja rozeznawać, sortěrować, dźělić.
Rozšěrjenje
[wobdźěłać | žórłowy tekst wobdźěłać]Diorit je mało rozšěrjena kamjenizna. W Europje wustupuje na přikład we Francoskej, Němskej, Awstriskej, Čěskej abo Finskej. W Hornjej Łužicy wudobywa so diorit w skale Luchow pola Lubija.[1]
Žórła
[wobdźěłać | žórłowy tekst wobdźěłać]- ↑ Geologiska karta 1 : 50 000 (němsce) Staatsbetrieb Geobasisinformation und Vermessung Sachsen. Wotwołane dnja 7. meje 2026.
Literatura
[wobdźěłać | žórłowy tekst wobdźěłać]- Arnošt Dudek, Miroslav Malkovský, Miloš Suk: Atlas hornin. 2. nakład. Academia, Praha 1984, str. 312.
