engsoleie

Engsoleie er ei 5–75 centimeter høg plante med trevlerot og blad som er handdelte. Planta har fem glinsande gule kronblad og fem grøne begerblad. Blomane har mange støvberarar og mange frie fruktblad som modnar til smånøtter.

Engsoleie er ein av dei vanlegaste urtene i ugjødsla beite og i eldre eng over heile landet. Planta er giftig i rå tilstand, særskild for storfe, men ikkje etter tørking.

Engsoleie er svært utbreidd og variabel i Noreg, og det som har vore oppfatta som engsoleie finst frå strandenger til langt opp i fjellet. I seinere tid er det vanleg å dele inn denne variasjonen i fleire taksa på ulike nivå. Det som tidlegare vart inkludert i arten engsoleie, Ranunculus acris, vert no ofte skilt på to artar; engsoleie i avgrensa tyding og skogsoleie, Ranunculus subborealis. Den seinare arten vert i åttande utgåva av Norsk flora i tillegg delt inn i tre underartar: kystsoleie, fjellsoleie og russesoleie.

Det norske namnet, soleie, vert rekna som ei endring frå utgangspunktet solauge eller soløye som truleg kjem av at dei solgule blomane vert likna med sola. I nyare tid er namnet soløye tatt i bruk som norsk namn på artar i slekta Heliopsis i korgplantefamilien.

• Soleiefamilien
• Soleieslekta

• Elven, Reidar; Bjorå, Charlotte Sletten; Fremstad, Eli; Hegre, Hanne; Solstad, Heidi (2022): Norsk flora, 8. utgåva. Oslo: Samlaget.