2025 var frábært tónlistarár á Íslandi eins og reyndar í alheimi líka en það er alltaf gott að fara yfir senuna hér og gef henni verðskuldaðan stall. Hér er upptalning á nokkrum útgáfum sem Benson fannst standa uppúr á árinu 2025, þessi listi gæti verið margfalt lengri því gróskan er gríðarleg í íslenskri tónlist í dag.
Benni Hemm Hemm & Bára Gísladóttir – GUFA (Benni Hemm Hemm & Bára Gísladóttir, 2025)
Óvænt samstarf en samt ekki. Þau Bára og Benni áttu frábært ár í sitthvoru lagi og e.t.v. minna farið fyrir umfjöllun á sigrum Báru í íslenskum fjölmiðlum árið 2025 en verk hennar Hringla var flutt af simfoníuhljómsveit BBC, hún hlaut virtustu heiðursverðlaun sem eru í boði Danmörku og frumflutti tónlist við leikverkið Óresteia í Þjóðleikhúsinu milli og jóla og nýars.
Meira hefur farið fyrir umfjöllun hjá Benna Hemm Hemm og er athyglin sannarlega verðskulduð. Líkt og Bára hefur hann verið á feikilegri siglingu. Hann gerði frábæra endurgerð á fyrstu breiðskífu sinni, gerði tónlist fyrir frábært leikverk Kriðpleirs í Borgarleikhúsinu, ambient skrítipopp-plötu með hinum japanska Seijiro Kuroda og síðast ekki síst poppplötu ársins með sjálfum konungi poppsins.
GUFA er í senn bæði látlaus og tilkomumikil þar sem þau Bára og Benni leiða saman raddir og hljómmikið drone sem Bára framkallar með sínum kontrabassa. Þessi þriggja stykkja skífa sver sig í ætt við margt sem Bára hefur verið að fást við í sínum tónsmíðum og ber einnig keim af því sem Benni hefur verið að gera undir merkjum The Melting Diamond Band. Þetta er eftirminnilegasta íslenska drone-ið að mati Benson á árinu 2025.
Ólöf Arnalds – Spíra (Bella Union, 2025)
Það er fátt tónlistarfólk sem nær að fylla lítil sem stærri rými með nærveru sinni líkt og Ólöf Arnalds. Það sást glöggt á tónleikum hennar á síðustu Iceland Airwaves-hátíð í Fríkirkjunni. Þar var hún mætt einsömul með lítinn gítar og rödd sem fer með hlustandann í fallegan draumaheim. Þetta voru alveg einstakir tónleikar og annar af tveim hápunktum hátíðarinnar (hinn var flutningur Rakelar og kórsins Kliðs á „always“ í Aðventkirkjunni).
Spíra er fimmta breiðskífa Ólafar og hennar fyrsta í ellefu ár. Þessi níu laga plata markar afturhvarf til íslenskra texta og eru öll lögin sungin á íslensku líkt og á fyrstu plötu hennar. Hjálparsveinar Ólafar á plötunni eru þeir Davíð Þór Jónsson og Skúli Sverrisson
Godchilla – Psionic Dreams (Smekkleysa, 2025)
Langþráð þriðja breiðskífa Godchilla kom loksins út á árinu og er óhætt að segja að biðin var þess virði. Godchilla-liðar hafa nýtt tímann vel frá því þeir gáfu út HYPNOPOLIS árið 2017 og það verður seint sagt að þeir hafi verið iðjulausir þó að átta ár hafi liðið á milli útgáfa hjá þeim. Endrum og eins spila þeir á tónleikum og í hvert skipti er um mikla upplifun að ræða.
Myndin sem prýðir kápuna á psionic dreams er mjög lýsandi fyrir hana og reyndar hljómsveitina í öllu sínu veldi. Platan er algjört ferðalag frá upphafi til enda, líkt og á tónleikum fara þeir hægt en þeir passa að hlustandinn er með allan tímann. Þetta er algjör kosmísk reið sem tekur mann í óravíddir og hljómurinn er risavaxinn og dáleiðandi bræðingur af sludge-, surf- og síkadelíu-tónlist. Þeir fengu helstu hljóðsérfræðinga landsins í lið með sér til að kalla fram þennan seið.
RAKEL – a place to be (Opia Community, 2025)
Rakel Sigurðardóttir eða RAKEL reis hátt á árinu og var búin að vera að hlaða í sína fyrst stóru plötu í nokkur ár. Hún hefur verið að gefa út smáskífur og þröngskífur nokkuð reglulega frá árinu 2020 og átt nokkur vinsæl lög, þ.á.m. „Ég var að spá“ sem hún gerði ásamt CeaseTone og JóaPé. RAKEL hefur einnig gert góða hluti í samstarfi Salóme Katrínu, Söru Flindt, Nönnu Bryndísi, Axel Flóvent, Kaktus Einarsson og Kári the Attempt svo fátt eitt sé nefnt.
a place to be er óður til gamla Staðarskála sem á stóran stað í hjarta hennar og það sem einkennir andrúmsloftið á plötunni er mikil hjartahlýja. Í grunnin er platan söngvaskáldsplata en hefur þó fengið dekurmeðferð frá RAKEL og hennar hjálparkokkum. Benson hefur sérstaklega gaman af þegar RAKEL notast við raddbreytingartól í lögum eins og „i am only thoughts running through myself“ og mundar fiðluna sem býr til hugrenningartengsl til hinnar frábæru Brooklyn-sveitar The Books. Það verður gaman að fylgjast áfram með RAKEL vaxa og dafna á því tempói sem hún hefur verið að gera undanfarin ár.
Spacestation – Reykjavík Syndrome (Alda Music, 2025)
Spacestation hafa verið kallaðir bjargvættir rokksins á Íslandi. Bandið kemur vissulega með ferskan andvara inn í íslensku tónlistarsenuna og þeir eiga sérstakt lag á að koma fólki í góðan gír á tónleikum. Ísland skortir ekki góðar rokksveitir og vill Benson nefna bönd eins Skoffín, supersport!, Flesh Machine, Korter í flog, MC Myasnoi, BKPM, Gróa, Glupsk, Sameheads og Godchilla sem eru sannarlega framúrskarandi rokksveitir þó misvirkar séu.
Reykjavík Syndrome er sneysafull af grípandi rokksmellum sem margir hafa þegar rist sig í minni og sál íslenskra rokkunnenda. Ungæðishátturinn á plötunni er smitandi og lög eins og „Fokking lagið“, „Í draumalandinu“ og „Hvítt vín“ eru með betri „anthems“ sem komið hafa út á Íslandi undanfarin ár.
symfaux – mowerpic (Reykjavík Record Shop/Why Not? Plötuútgáfa!, 2025)
symfaux varð til á tónlistarhátíðinni Norðanpaunk í ágúst 2024 og er skipuð þeim Sturlu Sigurðssyni, Vigfúsi Eiríkssyni og Ægi Sindra Bjarnasyni og komu fram undir nafni Bucking Fastards sem er önnur hljómsveit Sturlu. Fyrsta útgáfa þeirra kom út haustið 2024 og var gefin út í sömu viku og hún var tekin upp. Fyrir utan moverpic gáfu þeir félagar út þrjár aðrar útgáfur árið 2025 en vörðu mestum tíma í hana. moverpic er besta og hreinræktaðasta reiknirokk sem komið hefur út hér á landi síðan Pranke. Eflaust eiga þeir symfaux-félagar hliðstæður og það sem kemur upp í huga Benson eru bandarísk bönd á borð við Gorge Trio, Natural Dreamers, Yowie og A Minor Forest eða enskar kanónur á borð við I’m Being Good og Charlottefield.
Það er virkilega ánægjulegt að sveitir á borð symfaux njóta fylgi hér á landi og vill Benson einnig benda á fleiri sambærilegar sveitir á borð við Yang Soup, Bucking Fastards og dreymandi hundur. moverpic er frábær plata og Benson mælir einlæglega með að upplifa þessa höfðingja á tónleikum.
Páll Óskar & Benni Hemm Hemm – Alveg (Reykjavík Record Shop, 2025)
Óvæntasta samstarf síðari ára líklega þeirra Benna Hemm Hemm og Páls Óskars Hjálmtýssonar, a.m.k. var það ekki eitthvað sem Benson hafði séð fyrir sér fyrir einhverjum misserum síðan. Þeir félagar eiga einstaklega vel saman og kom þeirra fyrsta plata, Alveg, eins og ferskur andvari inn í útgáfu ársins 2025.
Benni er búinn að eiga virkilega gjöfult og áhugavert rennsli af útgáfum síðustu ár og var árið 2025 alls engin undantekning. Páll Óskar hefur í mörg ár verið óumdeildur íslenski poppkóngurinn. Páll Óskar er sömuleiðis ein skýrasta rödd mannréttinda hér á landi og hefur ekki eingöngu látið rödd hinsegin samfélagsins sig varða heldur beitt sér fyrir málefnum Palestínu og þeirra sem eiga við andleg veikindi að stríða. Páll hefur einstakt lag að koma flóknum tilfinningum í orð í formi fallegra popptexta og falla þeir einstaklega vel við lagasmíðarnar er bæði ljúfasárar og gefa manni tilfinningu og von um bjartari tíma. Alveg er klárlega poppplata ársins.
Hyldýpi – Heilun (Past Inside The Present, 2025)
Hyldýpi er hugarfóstur tónlistarmannsins og ljósmyndarans Herberts Más Sigmundssonar. Herbert hefur verið að senda frá sér hægfljótandi gítar ambient í tæp tíu ár og er Heilun hans heilsteyptasta verk hingað til. Heilun kom út á vegum hins virta ambient-merkis Past Inside The Present í Bandaríkjunum sem þykir eitt það flottasta í sveimheimi nútímans.
Heilun er viðeigandi nafn fyrir tónlist Herberts sem er í senn hlý, mjúk og umfaðmandi gítarambient skífa og einnig með tilliti til þess að hann starfar sem heilari meðfram listsköpun sinni. Benson mælir með að fjárfesta í gripnum á kassettu sem er einstaklega veglegur pakki.
ROR – Auga (Sono Luminus, 2025)
Auga er það fyrsta sem tónlistarparið Gyða Valtýsdóttir og Úlfur Hansson gefa saman út undir nafninu ROR. Þau hafa vissulega starfað saman áður, t.a.m. sömdu þau saman verk á Epicycle II með Gyðu og svo hafa þau útsett og spilað inn á plötur hvors annars í gegnum tíðina.
Þau Gyða og Úlfur eru bæði annáluð fyrir sína einstöku næmni og ná þau að skapa virkilega fallegan heim þar sem sellóleikur Gyðu nær bæði hæstu hæðum í bland við dýpri víddir og hljóðgervlar Úlfs umlykja allt á svo fallegan hátt. Þessi frumraun þeirra hjúa er einstaklega fallegt ferðalag og vonandi er von á meiri tónlist frá þeim.
Náriðill – Evil Is The Only Way . . . (Náriðill, 2025)
Íslenska öfgarokksenan heldur endalaust áfram að gefa og ein bitastæðasta útgáfan var fyrsta hljóðversskífa Náriðils. Ýmsir koma að skífunni sem telur einungis sex lög ef meðtalið er intró-ið og má þar nefna framlínumenn íslensku svartmálmssenunnar þá Dag Gíslason úr Misþyrmingu og Barnaveiki og Örlyg Sigurðarson úr hljómsveitunum Örmagna, Nöðru og Mannveiru. Evil Is The Only Way . . . er tekin upp af Degi í Gryfjunni sem er ein af mekkum íslensku svartmálmssenunar og hefur hann verið að vaxa mikið sem upptökustjóri á síðustu árum. Þessi skífa gefur ekkert og þrátt fyrir skuggalegan titil og kápumynd þá er heilmikið hjarta og sál í þessari veislu.
Af öðrum hápunktum ársins í öfgarokkinu voru allir tónleikar hljómsveitarinnar World Narcosis sem varð aftur virk á síðasta ári sem og hátíðir á borð við Norðanpaunk og Andkristni.
Haugar – Soðkaffi (Vogor Records, 2025)
Það mætti alveg kalla Hauga indie-ofurgrúbbu enda er valinkunn kempa í hverju einasta horni. Þessi kvintett hefur aldrei spilað tónleika en hafa þó verið með þessa skífu í smíðum í nokkur ár og leit hún loksins dagsins ljós á árinu 2025. Meðlimir Hauga koma úr hljómsveitum á borð við I Adapt, Markús & The Diversion Sessions, Mug, Seabear, Skakkamanage, Skátar og Stafrænn Hákon.
Soðkaffi er hreinræktað indie rokk með áherslu á bylmingsfastar trommur, hnausþykkan bassa, vælandi gítara og er rúsínan í pylsuendanum frábærir textar Markúsar Bjarnasonar sem syngur sömuleiðis og gefa þeir hreinræktaða indie rokkinu góða vídd og aukið vægi.
Pétur Ben – Painted Blue (Pétur Ben, 2025)
Pétur Ben vandar til sinna verka og það líður langur tími á milli útgáfa hjá honum. Painted Blue eiginleg fyrsta hljóðversskífa Péturs síðan hann gaf út God’s Lonely Man sem er í gríðarlega miklum metum hjá Benson enda stórkostleg plata.
Pétur hefur ekki setið auðum höndum þó langt líði milli útgáfa og hefur hann verið að semja kvikmyndatónlist, stofna og stjórna kór, vinna með tónlistarfólki á borð við Emiliönu Torrini, Valdimar, Mugison, Oyama, Ásgeir, Soffíu Björg og ýmislegt fleira.
Það er bjart yfir Pétri á Painted Blue þó platan sé langt frá því að glaðvær. Strengja útsetningar og aukaraddir á plötunni eru algjört lostæti enda kann Pétur sitt fag og gaman að heyra hvað hann hefur lagt vel í á plötunni.
Gróa – Drop P (One Little Independent, 2025)
Gróa hefur um árabil verið eitt besta tónleikaband landsins. Hljómsveitin hefur verið kjarna-element í Post-dreifingu og hefur hún bara vaxið með hverri plötunni og Drop P þeirra besta verk hingað til. Breska hljómplötuútgáfan One Little Independent gáfu út plötuna og glöggir lesendur vita að það er útgáfan sem hefur gefið út Björk, Sykurmolana, Ásgeir, Crass, A.R. Kane og fleiri kanónur.
Þær stöllur hafa aldrei hljómað eins tærar og einbeittar og þær gera á Drop sem er sprúðlandi hrærigrautur af listapönki og súrkálsrokki með vænni slettu af óhljóða-framúrstefnu. Benson skilst að þær séu komnar í pásu frá tónleikahaldi en vonandi mun ekki líða um langt að þær komi aftur fram á senuna.
Unfiled – Unfiled (Unfiled, 2025)
Það eru þeir Atli Bollason og Guðmundur Úlfarsson sem fara fyrir hinni drungalegu og myrku bassarafsveit Unfiled. Þeir sendu frá sér fyrstu breiðskífu á árinu og er hún samnefnd sveitinni.
Unfiled framreiða þykka, stökka og dystópíska tæknótónlist á þessari firnasterku plötu. Það er ýmis listamannsnöfn sem rennur um huga Bensons við hlustunina á þessari gæðaskífu langar honum að nefna meistara á borð við The Haxan Cloak, Andy Stott, Forest Swords, Ben Frost og hinn alíslenski Dynkur.
MC Myasnoi – songs of the owls (Spider Network, 2025)
Ein af uppáhaldssveitum Bensons á Íslandi undanfarin ár sendu frá sér þetta rúmlega 26 mínútna þrívítt verk árið 2025. songs of the owls er samið og flutt af kjarnameðlimum MC Myasnoi, þeim Ronju Jóhansdóttur og Yuliu Vasileva. Skífan er mjög frábrugðin hinni frábæru tónleikaplötu slugs are legal now frá 2024. MC Myasnoi er sömuleiðis þungamiðja Spider Network sem gefur skífuna út og heldur hina frábæru Kárahátíð.
Tónlistin á þessari skífu sömdu þær fyrir sýningu Andrej Beštak og Anja Leko á sextugustu og þriðja Poreč Annale í Poreč í Króatíu.
slummi & Jamesendir – Jelly Star (LÍM, 2025)
Jelly Star er fjögurra laga skífa þeirra slumma (Guðmundur Ari Arnalds) og Jamesendirs (Atli James) og kom út á vegum LÍM í fyrra. LÍM er útgáfa þeirra LaFontaine og Jamesendirs sem stofnuð var fyrir þrem árum síðan. Jamesendir hefur verið einn af prímusmótorum Drif sem er með reglulega viðburði í Smekkleysu Plötubúð og er suman hátt smækkuð íslensk útgáfa af The Lot Radio eða Boiler Room.
Jelly Star er ef eitthvað er aðeins mýkri og draumkenndari en það sem þeir félagar gera í sitthvoru lagi og er ein skemmtilegasta samsuða í íslenskri raftónlist frá 2025.
Knackered – fyi (Marvada, 2025)
fyi er fyrsta þröngskífa hinnar frábæru raftónlistarkonu Ida Schuften Juhl undir nafninu Knackered en áður hefur hún unnið undir nafninu IDK IDA og gefið út eina langskífu og aðra styttri undir því nafni.
Á fyi er að finna fjögur stykki þar sem Ida flakkar á milli forma og má heyra vísanir til ýmissa afkima klúbbatónlistar í bland við listræn framtíðarpopp.
Dr. Gunni – Botnlaus bröns og bubblur (Erðanúmúsík, 2025)
Hljómsveitin Dr. Gunni er búin að vera á góðri siglingu undanfarin ár og gáfu út hina frábæru breiðskífu Er ekki búið að vera gaman? árið 2024 og er það þeirra besta plata að mati Bensons. Á Botnlaus bröns og búbblur halda þeir sér á sömu siglingu vinna aftur með Árna Hjörvari Árnasyni sem síðasta rúma áratuginn getið sér orðspor sem bassaleikari The Vaccines en einnig tekið upp og pródúserað plötur Heklu, Supersport!, Ástu, Ólafs Kram, Godchilla o.fl.
Benson hefur lengi fylgt Dr. Gunna en missti aðeins þráðinn eftir að Smekkleysu-plöturnar tvær en það hefur kviknað neisti aftur eftir samstarf þeirra við Árna Hjörvar. Vonandi halda þeir áfram á þessari línu.
Benson is fantastic 
