أهلا يا دكتور

في عدد جريدة الأهرام اليوم 2008/6/24 حوار مع الدكتور فتحي سرور رئيس مجلس الشعب. أنا رأيي إن الدكتور فتحي سرور يا إما مش هامه الشعب دا خالص يا إما مغلوب علي أمره ومعندوش بديل. طبعا الكلام إلي قاله لو إتقال في دوله بتبيع بطيخ بس كان إتحل مجلس الشعب وحاكموا أعضائه وحكموا عليهم بالإعدام كمان، إنما لأن الدكتور بيستخف بينا أكتر من اللازم فحواره جه كأن إلي بيقوله دا لازم يمر من غير حساب .... نظام "هوا كده لو عاجبكم.... بوسوا إيدكم وش وضهر إننا عايزين ننضفكم ولكنكم قله منحرفه مش عارفه مصلحتها".

- نقلا عن جريدة الأهرام:

الأهرام‏:‏ هل تواطأ مجلس الشعب مع رجال الأعمال عند إقراره لتعديلات قانون منع الاحتكار؟

‏{‏ ليس صحيحا أن المجلس قد تواطأ أو جامل بعض رجال الأعمال في أثناء مناقشته للتعديلات‏,‏ فحقيقة الأمر أن المناقشات التي دارت داخل المجلس حول غرامة الاحتكار كانت حادة حول وجود حد أقصي للغرامة أو فتحها عن طريق تحديد نسبة‏15%‏ من قيمة مبيعات المنتج محل المخالفة‏.‏

ورأي المجلس أن تحديد النسبة التي أصر عليها وزير التجارة قد يؤدي إلي إفلاس بعض الشركات وسقوط البورصة التي لم تنضج بعد‏,‏ وتعتمد علي أسهم شركات كبري‏,‏ والتي إذا فرض عليها غرامات كبيرة سوف تنهار‏,‏ وقد رأي المجلس في الوقت نفسه ضرورة التشديد في رفع غرامة الاحتكار لتصل إلي حد أقصي‏300‏ مليون جنيه كعقوبة رادعة بعد أن كانت‏10‏ ملايين جنيه دون الأخذ بالنسبة المقررة علي المبيعات‏.‏

هل دا إعتراف صريح من رئيس مجلس الشعب إن "شركات كبري" بتمارس الإحتكار بالتأكيد؟؟ لأن معني كلامه إن فرض غرامات كبيره عليها سيؤدي لإنهيارها وإنهيار البورصه..... طب حيتفرض عليها غرامات كبيره ليه إذا مكانوش محتكرين؟؟ يبقي الكلام الصح يكون بإننا منحميش الشركات ..... طظ فيهم وطظ في البورصه .... هل من المعقول إننا نتستر علي إجرام ضد الشعب علشان الشركات متفلسش؟؟؟ تتستروا علي جريمه ضد الشعب؟؟ إذا مكانش دا تواطئ أو مجامله لرجال الأعمال (كنت فاكر رجل أعمال واحد طلع كل الشركات كده) ضد مصلحة الشعب، تسمي إيه يا دكتور إعترافك الرسمي والعلني دا؟؟ مش دي إستهانه بالشعب المصري؟

بيفكرني الكلام دا بمسرحية شاهد مشفش حاجه " لو كل واحد ساكن تحته واحده رقاصه عزل، يبقي البلد كلها حتبات في الشارع" ...... لو فرضنا غرامات كبيره علي الشركات (المحتكرين بإعتراف رئيس مجلس الشعب) البلد كلها حتفلس .... مش في شبه برده والا انا غلطان؟

- الأهرام‏:‏ وهل استطلعتم رأي الحكومة حول إلغاء النسبة قبل إقرار التعديلات للتأكد من سلامة وجهة نظر المجلس؟

‏{‏ نعم طلبت من الدكتور مفيد شهاب الذهاب إلي مجلس الوزراء واستطلاع رأي الدكتور أحمد نظيف رئيس مجلس الوزراء‏,‏ الذي أعلن موافقته علي وضع غرامة محددة دون اللجوء للنسبة‏,‏ وأن الحكومة تتمسك بذلك‏.‏ وقال سرور إنه بذلك فإن المسألة تعدت من رأي وزير بالحكومة إلي رأي رئيس مجلس الوزراء الذي يعبر عن السياسة العامة للحكومة وليس عن سياسة وزير‏.‏ ولذلك فليتأكد الجميع أن وجهة نظر المجلس كانت سليمة وليكف البعض عن النقد غير البناء الذي يوجه للمجلس‏.

طيب يا دكتور لما كل الصحف وكل الناس وكل الشعب إلي إنتم بتمثلوه مش موافقين علي الخيانه دي ..... وإذا كان رأي كبار الإقتصاديين ورأي الوزير المختص ضد القانون بالشكل دا ..... مين بقي أحمد نظيف دا إلي ليه رأي تاني؟ ومين أصلا قال إن أحمد نظيف قال الكلام دا؟ طب ما الوزير المختص كان عايز يستقيل وإتضغط عليه ... ما ممكن برضه أحمد نظيف إتضغط عليه؟

- الأهرام‏:‏ وماذا عن رفض المجلس لما قدمته الحكومة بالإعفاء الكلي الكامل من العقاب علي المبلغ عن الجريمة ممن يقدم أدلة عن شركائه فيها؟

‏{‏ رأي العديد من النواب عند إعادة مداولة هذا الموضوع مرة أخري أنه في حالة إقرار المادة الخاصة بالإعفاء الكلي‏,‏ أنها ستغري الكثيرين في عالم المنافسة الضارية‏,‏ وأن هناك من يريد أن يزيف الحقائق ضد الآخرين‏,‏ فرأي المجلس بعد مناقشات حادة ضرورة إلغاء المادة‏,‏ حيث إنه من المستحسن عدم تشجيع الناس علي التواطؤ لضرب التجار بأدلة مزيفة‏,‏ وقيل وقتها إن هذه المادة غير موجودة في بعض التشريعات المقارنة‏.‏

يا دكتور، إنت مقتنع بالكلام إلي بتقوله دا؟؟؟ وحياة عيالك يا دكتور مقتنع؟ كلامه ببساطه إن ممكن يحصل شكاوي كيديه من شركات منافسه. يبقي الحل مفيش إعفاء للمبلغ، والا تقرير عقوبه مشدده علي المبلغ في حالة الشكاوي الكيديه؟ لو انا شركه كبيره وماشي في السليم، وشركه منافسه قدمت بلاغ كيدي إني محتكر .... وإيه الضرر هنا؟ أنا حتفحصني لجنه وتحقق في الشكوي وتثبت إني سليم، والمبلغ الكيدي حياخد غرامه تقطم وسطه، والسوق كله حيعرف إني زي الفل. دي الأصول. كل الدول المحترمه بتعمل كده.

وأنا لسه ببني المزرعه مكنتش مركب عداد كهرباء .... فكنت باخد كهرباء من عداد واحد جاري. واحد من الجيران إلي عندهم حقد راح بلغ شركة الكهرباء إني بسرق كهرباء من التيار العمومي. جت لجنه في زياره مفاجئه وعرفوا سلامة موقفي ..... إدوني أصل الشكوي إلي فيها إسم إلي بلغ علشان لو عايز ارفع عليه قضيه ... وإلي بلغ دفع غرامة بلاغ كاذب 300 يورو ..... المبلغ دا كسر وسط ليه. وضوح وشفافيه ومافيش مجامله.

- الأهرام‏:‏ إذن ماذا حدث ليتم تمرير التعديل الذي تقدم به المهندس أحمد عز رئيس لجنة الخطة والموازنة حول هذه المادة وبعد يومين فقط من الموافقة بصفة نهائية علي مشروع قانون الحكومة؟

‏{‏ بداية أحب أن أوضح أن المهندس أحمد عز قد تقدم باقتراح بمشروع قانون لتعديل هذه المادة قبل أن يوقع رئيس الجمهورية علي مشروع قانون الحكومة‏,‏ وذلك بعد أن حدث صدي غير مريح لدي الرأي العام حول إلغاء المادة‏.‏ وقد تبني اقتراح عز وجهة نظر الإعفاء الجزئي للمبلغ بحيث يعاقب المحتكر المبلغ بنصف العقوبة كمكافأة علي مساعدة العدالة‏,‏ وهي موجودة في بعض التشريعات العالمية وأولها القانون البلجيكي‏.

الأهرام‏:‏ هل معني ذلك أن أحمد عز قد أسهم باقتراحه في إصدار تشريع محكم وليس لتشجيع عملية الاحتكار؟‏

{‏ الاقتراح الذي تقدم به أحمد عز حول عقوبة المبلغ بعملية الاحتكار اقتراح مناسب خاصة أنه يعفي المبلغ من نصف العقوبة‏,‏ حتي لا يتعرض الصناع للشكاوي الكيدية الكاذبة‏,‏ وأري أن عز تعرض لظلم كبير حين اتهم بإجهاض مشروع قانون حماية المنافسة ومنع الاحتكار المقدم من الحكومة‏,‏ وأشعر أن هناك حربا تشن ضده‏.‏
ولعله من المناسب أن أشير إلي أنني تلقيت تقريرا من جهاز منع الاحتكار يضم جميع البلاغات التي قدمت ضد المحتكرين‏,‏ ولم أجد بلاغا واحدا ضد شركات النائب أحمد عز‏.‏

"يعاقب المحتكر المبلغ بنصف العقوبة كمكافأة علي مساعدة العدالة‏ " .... يا سلام، يعني أروح أبلغ علشان أدفع 150 مليون جنيه؟؟؟ هوا في حد عبيط أوي كده. لا يا عم، أنا حاخلي فلوسي في جيبي وتتحرق البلد!!

"حتي لا يتعرض الصناع للشكاوي الكيدية الكاذبة‏" ..... العقل بيقول إننا نعمل ماده في القانون ضد الشكاوي الكيديه .... مش ضد الشكاوي الحقيقيه!!!

"ولم أجد بلاغا واحدا ضد شركات النائب أحمد عز‏" أهي الجمله دي بس بتثبت مدي التواطئ والمجامله ... مش عايز أقول إنك مشترك يا دكتور .... عيب اوي تتقال الكلمه دي وإلا تعتبر خيانه عظمي. كل الدنيا بتتكلم عن إحتكارات حديد عز .... مفيش أي كلمه من دي ممكن تعتبر بلاغ ضد شركاته؟؟ وإحنا كمان عارفين إن في بلاغ مقدم ضد إحتكار شركات عز وبيتم التحقيق فيه حاليا .... وبالتزامن مع قانون الإحتكار إلي ساهم في إنجازه أحمد عز نفسه. هل دا قانوني إن يكون في بلاغ مقدم ضده في إحتكار وإن يكون هو نفسه مهندس مشروع قانون الإحتكار، أو حتي يتناقش فيه كنائب؟؟

- الأهرام‏:‏ ألم يكن من الممكن أن تبحث الدولة عن موارد أخري لتمويل العلاوة سواء برفع الأسعار أو بإقرار ضرائب جديدة؟

‏{‏ مما لاشك فيه أن اعتماد الموازنة علي الضرائب يجب أن يكون مؤقتا وحلا استثنائيا مثلما حدث لمواجهة التحديات التي واجهت الاقتصاد المصري نتيجة ارتفاع أسعار الغذاء والطاقة عالميا‏.‏
ولكن يجب أن نعتمد في المستقبل علي مواردنا الذاتية من الإنتاج الصناعي والزراعي حتي تتوافر الايرادات لمواجهة المتغيرات والتحديات‏.‏
ومع هذا فلم يكن أمامنا في الوقت الحالي إلا اللجوء للضرائب‏.

يا نهار إسود .... هي كانت مفاجئه المتغيرات والتحديات دي؟ دا سيادتك لتاني مره في المقال بتعترف بجريمه وبتعترف بتقاعس الحكومه وبإنها نايمه علي ودانها. طب لما الدنيا ضلمه أوي كده أقريتوا العلاوه ليه؟ علشان تدوروا علي موارد؟؟؟ بتشدوا الأستك ليه .... علشان يلسعكوا؟ أهو لسعنا إحنا ... وبقت بلد لاسعين!!!

وبعدين هيا لسه واصله النهارده لمجلس الشعب إننا لازم نعتمد علي مواردنا الذاتيه من الإنتاج الصناعي والزراعي؟؟ مستقبلا؟؟؟ مستقبلا يا ظلمه؟ أمال كل الحكومات إلي جت علينا تقلب جيوبنا دي موصلتش للحل العبقري بتاع مواردنا الذاتيه قبل كده؟؟


دكتور فتحي سرور .... أقترح أن تنشر غدا في جريدة الأهرام تكذيبا للحوار دا .... والنبي وحياة ولادك يا دكتور لحسن مش قادر أصدق إن واحد رئيس مجلس شعب في دولة البطيخ العظمي ولمدة 500 سنه يقول الكلام دا. يا تحترمنا يا دكتور يا تسكت خالص وتريح أعصابنا ومتحسسناش إننا أغبياء.

تظبيط العصور في تفسير الأمور

إختالت الأمور علي، أصبحت أري العجاب من الأمور والأقوال، وتضاربت الأشكال من الأفكار ما بين مفرج كثيرا من الأمور وما بين مشدد ورافض للتغيير. أفأصدق هذا أم ذاك؟ أفأتبع الجديد من الأراء أم أقتنع بما جاء في العصور السابقه، وهذا خير رأي من خير سلف لخير خلف وكفاني ما أعرف دون ما لا أعرف؟

لم يتركوا لنا كثيرا من الخيار، فلتغيروا ما بأنفسكم حتي يغير الله ما بكم، ففرض علينا القانون تلو القانون من أولي الأمر، حتي ما فتئنا نعرف موقعنا. ثم لم يترك لنا الخيار مره أخري، فإن غيرتم ما بكم حاق عليكم غضب ربكم لترككم السلف الصالح وأرائه وتحولتم إلي العلمانيه. ثم لم يترك لنا الخيار للمره الثالثه، الإسلام دين مرونه، وقد ترك مساحه لتعديل قواعده بما يناسب عصركم، وإن لم تتبعوا عصركم فقد عصيتم. ثم لم يترك لنا الخيار للمره الأخيره، ثوابت الإسلام لا تتغير، وثوابت العصور لا تتغير، ولكن ما هي الثوابت وما هي المتغيرات؟

تابعت مناظره علي قناة الحياة، بين الداعيه الإسلاميه د. سعاد (أسف لا أذكر إسمها تحديدا) وبين ناشطه في حقوق المرأه، وعلي ما أذكر مديرة منظمه للدفاع عن المرأه‘ والتي تشرف علي عدة دور (أو ملاجيء) للمرأة المتزوجه التي يتطهدها زوجها، فتستطيع الزوجه تقديم شكوي لهكذا جمعيه، ومن ثم تحقق الجمعيه في الشكوي، وتوفر للزوجه غطاء وحمايه ورعايه وإستضافه في أحد الدور حتي يتم حل المشكله.

وفيما إعترضت الداعيه الإسلاميه علي خروج المرأه من بيتها بأي أسلوب، دافعت الناشطه عن أرائها بقوه. ماذا لو، وماذا لو؟ إين يقدم الإسلام حله؟ توالت الإتصالات والمداخلات ما بين مؤيد ومعارض لخروج المرأه من بيتها، وإنحصر الأمر في قضية الخروج فقط! إذا ضربك زوجك أو أهانك بشده، هل تردي الإهانه، أم تقدمي شكوي وتطلبي الحمايه من الجمعيه، وفي كل الأحوال هل تخرجي من بيتك؟

كان من راي الداعيه أن الرجل هو يجب أن يخرج من البيت في هذه الحالات، وأن حكم من أهله وحكم من أهلها يجب أن يذهبوا لمناقشه المرأه وحل القضيه في بيتها، بينما رات الناشطه أن خروج المرأه من بيتها سيجعل حل المشكله أسهل بغير ضغوط.

وتداعت أفكاري حول أمر أخر يخص هذا الموضوع. ألهذا الحد فقدنا أساسيات ديننا، فيصل الأمر إلي رجل يدمن شيئا ثم ينفرد بزوجته ويضربها ويهينها؟ إتصلت أم وقالت: لو زوج إبنتي ضربها أو أهانها "تستاهل"، هي إلي إستفزته، وهي إلي ردت عليه! وإتصل الشيخ خالد الجندي وأيد رأي الداعيه في عدم خروج المرأه من بيتها.

وتصارعت الصفحات في الصحف علي ذكر ما أثير عن الختان في مجلس الشعب. ختان الإناث تحديدا. وماذا عن ختان الذكور؟ هل يمكن ألا يكون لختان الإناث أساس في الإسلام؟ ولماذا ختان الذكور إذا؟

ثم صدر قانون الطفل ..... يغل يد الأباء (ظاهريا أو باطنيا لا أدري) عن تعنيف أبنائهم. هل يمكن أن أنهر إبني، أو أضربه لسبع في الصلاه، فأجد نفسي محاكم، مسجون، مغرم ماليا؟؟ لن أضرب إبني علي الصلاه فهو يصلي والحمد لله، ولكن إن رفض؟ إذا إصطحبت إبنتي صديقها إلي منزلي، هل أبتسم حتي لا أسجن، أم اقتلها وأسجن؟ إذا أراد أحد أبنائي تغيير دينه نتيجه ضغط وتبشير (ممول) .... هل لن يستطيع أحد وحتي أولي الأمر تقويمه، لأنه محمي بقانون؟

وما بين فتاوي يقبلها العقل، وفتاوي يجهلها المرء، توجد فتاوي تخدم العصر. عصر غثاء السيل.

في تدوينات سابقه لي تحدثت عن شيخ أعلن نبذه للخمور في فنادقه خشية الله. وإنصبت بعض التعليقات عن التفريق بين الواقع الإقتصادي السياحي وبين ما حرمه الله. فلنفرق ما نري، ولكن هل سيغير هذا حرام الله؟ وإنصبت بعض التعليقات علي الشيخ ذاته وأفعاله العامه والخاصه، ولكن هل سيغير ما نعتقد أو نري ما بين الشيخ وبين الله؟

قابلت صديق إيطالي في رومانيا علي غذاء عمل .... طلب صديقي فخذ خنزير وطلبت أنا بعض الأسماك. سألني صديقي: لماذا حرم الله لكم الخنزير؟ فقلت لأن لحم الخنزير يحتوي علي بعض ما يأكله من قاذورات، كما أنه ينقل الأمراض المعديه والطفيليات ..... هكذا علمت. فقال: قد يكون هذا ما يحدث سابقا في عصور أخري أو في بلادكم، ولكن حاليا مع تزايد الوعي الطبي والقوانين الطبيه المنظمه لتربيه المواشي ومع تطور أساليب تصنع اللحوم وتعقيمها، فلا مجال لهذا السبب! قلت: إذا سبب المراد من المنع الذي أوردته لك غير صحيح، فأنا غير متخصص في هذه أمور، ولكني مجرد تابع لقرآن ربي. حرم الله لحم الخنزير إذا فلحم الخنزير حرام.... إقتنع صديقي الطيب. ولكني لم أقتنع بما قلت أنا وظللت أفكر فيه!!

توارد إلي خاطري لفظ: "تعطيل نصوص القرآن" ..... مع هول اللفظ وعظمة ما نطالب به (أفضل الموت علي قوله علانيه) ..... فقد حضرت مناقشه لم يستسيغها عقلي المتواضع عن إمكانية تعطيل نص من نصوص القرآن في حال جد في الأمور ما يحيل تنفيذ هذا النص .... فهل يمكن تعطيل نص حرمانية لحم الخنزير في حال أصبح لحم الخنزير آمن صحيا؟!!! فماذا إذا لم يكن المراد من تحريم لحم الخنزير هو صحة الإنسان؟ هل هناك فعلا ما يدعي "إمكانية تعطيل نص من نصوص القرآن"؟

هل هذا تسابق لتعطيل نصوص أخري؟؟ عن اليهود مثلا؟ اليهود أصبحوا جيراننا ويربطنا بهم معاهدات صلح ومصالح إقتصاديه محميه من نظام عالمي. إذا لا داعي لنصوص القرآن عن اليهود جميعا!!

مقتنع أن الموافقه علي "حزمة" القوانين الأخيره، وأن الإسراع بإعدادها وتجهيزها، تم بإيعاز (ضغط - تمويل - تحريض) من الإتحاد اليورومتوسطي. قال القذافي عنه "لا نقبل به لأنه يعد إهانه لدولنا" ... وقال عنه : "شروطه تقتل قضيتنا وتحولنا لمجرد منفذين" ... وقال عنه ما معناه أن هذا الإتحاد علي مكاسبه، إلا أنه سيجعلنا منفذين لأغراض وتقاليد أوروبا. مع إعتراضي علي شخص القذافي والأسد (سوريا) .... فهم لا يقلوا ديكتاتوريه وشراسه عن حالنا، إلا أنه أحيانا ما تكون نوبات الجنون أكثر صراحه من نوبات الغرور.

أعرف سيده من رومانيا شكت لكل جيرانها قضيتها (أعرفها شخصيا) "إبنتي تصطحب صديقها كل ليله إلي غرفتها في منزلي، وحينما عنفتها وطردت الصديق صرخت حتي سمع كل جيراننا، إتصلت بالشرطه، فكان جزائي إنذار وغرامه ماليه كبيره!!! رومانيا دوله جميله وأهلها متحفظون جدا في غالبهم، وقد تظن أنهم يعيشون حاليا معتقدات سنوات وأمور خلت. يصارعهم إنتمائهم للإتحاد الأوروبي.... يصارعهم ما يؤمنون به من دين حق .... تصارعهم نزعات الشذوذ وحرية الأديان وحرية الكفر وحرية الجنس وحرية الطفل .... مثلنا تماما. لعلهم يجاهدون ألا يرضخون .... ولكن سيرضخون مثلما سنرضخ.

مقتنع أن حروب قنوات الفضائيات سلفيه وعلمانيه وجنسيه و "كليبيه" و غنائيه تتبع هذا السبب. ونفس السبب في تناول مواضيع السحاق والشذوذ في أفلامنا، والأن القمار ونواديه. لماذا هذه المواضيع ولماذا الأن؟

يهم دافعي الأموال والإستثمارات من أوروبا ومتقبليها من دول تعديل شئون المرأه والطفل. وهناك صراع علي تعديل بنود الديموقراطيه، يصارع نظامنا حتي أخر نفس..... ولعله ما يفسر تأجيل قانون الإرهاب وتمديد حالة الطوارىء حتي يتم تعديل قانون افرهاب بما يوافق بعض "المباديء". قوانينهم بها هذا تماما.

يهم دافعي الأموال والإستثمارات من أوروبا ومتقبليها من دول تعديل أحكامنا وإعادة تفسير ديننا بما يناسب عصرنا (عصرهم). طالما لا تستطيعون نبذ قرآنكم، ستنبذون أحاديث رسولكم (عليه الصلاة والسلام) - (القرآنيون). ما أدراكم إن كان قال هذا أو ذاك؟ أحاديث موضوعه، إسرائيليات، إناس يمكن الطعن في نزاهة نقلهم. يحسن بكم أن تدعوا ما يريبكم إلي ما لا يريبكم. القرآن مضمون أكثر. ومن بعد هذا .... أليس هناك ما يدعي بقرآن "فاطمه" .... ألا يجعلكم هذا تشكون أن ما معكم من نسخ القرآن ناقصه؟ ثم إذا كانت ناقصه، ألا يمكن أن تكون محرفه؟ لقد توقف الوحي بوفاة رسولكم، وتوقف اللجوء إلي قراراته بوفاته وحلول أول الخلفاء .... لماذا لم يمكن الرسول (عليه الصلاة والسلام) من كتابة وصيته؟ لأن "تعاليمه" عن الإسلام قد إنتفت بموته ..... كان يدعوكم إلي تحري دينكم..... تحروه، وإجعلوه طوع زمانكم.
يهم دافعي الأموال والإستثمارات من أوروبا ومتقبليها من دول حل القضيه الفلسطينيه - الصهيونيه. حل لا يرضي جميع الأطراف ولكنه حل يرضي طموح التوسع والتهدئه، في إطار .... دافعي الأموال. طظ في إسرائيل، طظ في فلسطين (طبعا طظ في مصر).... المهم لا تزعجونا بمشاكلكم علي حدودنا، ولا تصدرون لنا إرهابكم الذي صدعتمونا به عقود. سنعطيكم المال بس "إخرسوا".

كونوا علي ثقه أن الإسلام ليس هو فقط المبتغي، كونوا علي ثقه أن من آمن بالله فقط دون إيمانه بالمال كرب سيحارب بالمثل. فلا يفرح إخواننا المسيحيين، دوركم يطبخ الأن في القدور، وسنجبر جميعا علي الإيمان برب يدعي "ورقة العمله"، يحكم مجرتنا ويخنق حياتنا ويزيفها.

ماذا سيأتي بعد؟؟ هل أحتاج أن أقول؟؟

لا أرفض الإتحاد اليورومتوسطي، ولا أقبل الإتحاد اليورومتوسطي .... ماذا أفعل؟

سنقبل ما لا نريد، وسيفرض ما لا نرضي، نحن غثاء السيل ..... للأسف. أم لسنا بعد وما خفي كان أعظم؟ فلم نصل حتي الأن إلي مرحلة القابض علي دينه كالقابض علي جمر من نار.

أمور مختلطات ومتشابهات محيرات ومنغصات..... و.... إرحمني وإرحمنا يا الله.

ملحوظات:

لـ appy: أهو جبتلك الموضوع في أجازه ..... مالكيش حجه في الشاي وإني عطلتك عن الشغل :)

لـ د/أبو يحي وأدم: أهو كتبتلك موضوع بالعربي الفصحي، علي قد ما قدرت.

لـ فاتيما: والنبي ما تكتئبي...... أنا قصدي أعبر وأستفسر وأطرح موضوعات في دماغي...... إقري وإرمي ورا ضهرك :) .... إفتكري دايما "إن مع العسر يسرا. إن مع العسر يسرا" .... قرار الله مؤكد.

لكل الناس: أسف، أفكار التدوينه تبدو غير مترابطه، فقد رميت عناوين أفكاري، وإعتمدت علي تفكيركم لتقوموني.

رجاء: مواضيع كتيره مفتوحه مبهمه وثقيله علي النفس، أرجو من أصدقائي ألا يثقلوا علي نفسهم بأي ردود.... من أراد تقويم أفكاري فليتفضل طبعا، ولكن لمن لا يجد ما يقوله، فأرجوا ألا أسبب له الإحراج ويضطر أن يضع رد، وأنا متفهم جدا لهذا ببساطه.

في حد تاني طالب حاجه؟ :)

حد يقول حاجه يا جدعان

فجاءه الدنيا لخبتط. هيا الحقيقه مش فجأه، دا تغيير بيحصل بقاله سنين طويله، مبينامش دا بيزيد. إنما إلي فجأه هو أحداث دير أبو فانا إلي إنفجرت، وقبلها سرقة محلات الدهب، وبعدهم واحد مسلم قتل واحد مسيحي ...... أحداث ممكن تبقي طبيعيه، إنما بشوية بنزين تبقي مش طبيعيه. والبنزين إتدلق بالهبل من كل ناحيه، رهبان بيفتروا علي الحقيقه (دا إلي ظاهر)، محافظ مغطي الحقيقه (ويمكن لو إتكلم حيقول كلام متعاد محدش حيصدقوا)، نظام صامت ولا كأنه هنا (تحس إنه مستفيد إن الدنيا تولع)، والأنبا شنوده مبيتكلمش غير كلام مبهم عن الأحداث، مبيفسرش ومبيتهمش ومبينفيش. قال "خلاص أنا عارف كل حاجه" .... بس إحنا مش عارفين!!! المسلمين مش عارفين يا شركائنا في البلد ناويين علي إيه .... والمسيحيين مش عارفين شركائهم في البلد متهمين والا مظلومين، ناويين يقتلوهم واحد واحد والا مالهومش أي دعوه؟ مين إلي عارف يقولنا؟؟ مين نثق فيه أكتر من البابا وأكتر من أي حد مسئول يطلع يقولنا الوقائع بمستندات أهي: 1، 2، 3، ...... مفيش فتنه طائفيه والا فيه ولازم نحلها وفورا؟

في رأيي:

- مفيش فتنه طائفيه بالمعني الواسع. دي لو فتنه طائفيه كان المسيحيين إتدبحوا في الشوارع بالهبل .... هو إحنا مشفناش في بعض البلاد الأقليه بيحصلها إيه؟؟

- في كره واضح وتعصب بيتزايد من بعض المسيحيين ضد المسلمين، وإبتدت قنوات فضائيه متعصبه تظهر، مش محتاج أحكيلكم عن كم الرعب إلي بتبثه، والرعب دا بيوصل لمسيحيين الداخل كأنه حقيقه واقعه.... تبص تلاقي تزوير الحقيقه وأي مستمع مسيحي علاطول حيفكر: يا ولاد الكلب يا مسلمين .... بتعملوا فينا كل دا؟ فلما يتقالهم محمد قتل بطرس علشان بيكرهه لأنه مسيحي، تبقي حقيقه .... ميعرفوش إن بطرس دا عاكس أخت محمد ..... ولو مكانش بطرس حيبقي أحمد، ومحمد ساعتها كان حيقتل أحمد برضوا. كام واحد مسلم قتل واحد مسلم تاني علشان أي نزاع؟؟ وكان عادي، الحمد لله مقالوش سني قتل شيعي (لسه مش دلوقتي). فيعني لما مسلم يقتل مسيحي إيه الغريب في دا (بغض النظر عن كونها جريمه)؟ طب مفيش أي مسيحي قتل أي مسلم في تاريخ الجريمه في مصر؟ بطرس علطول ملاك ومحمد علطول شايل السيف؟

- مسيحيين الخارج أو أقباط المهجر، إلي في رأيي (بعضهم) بيسترزقوا من الأحداث، نظام ولاعها ولاعها شعللها شعللها، بس خلي واحد مسيحي يموت، وإديله مترحموش، بحب أشوف قناة الحياه بعدها.... والله بحس إن المسلمين ماشيين في الشوارع بالكلاشينكوف والمسيحيين مستخبيين في بيوتهم ليتقتلوا. طب ما لو المسلمين كانوا مجرمين وقتالين قتله ودينهم وقرأنهم بيأمرهم يقتلوا المسيحيين ويبيدوهم، كانوا خلصوها من 1000 سنه، مستنيين ليه سنة 2008 يعني؟ دا حتي من 1000 سنه محدش كان حيقولهم حاجه ولا يعاتبهم، ولا حد كان يقدر يقول يا حرام أو يا عيني حتي!!! كانوا مستنيين أقباط المهجر لما يظهروا علشان يقتلوا المسيحيين قدام شاشات التليفزيون فبتوع المهجر يسترزقوا أكتر؟؟؟ أه هيا شاشات الفضائيات السبب، حيث قال الإمام إبن بمبه: وإقتلوهم حيث وجدتوهم بشرط وجود عدسه للتصوير!!!

- برضه ترويج حكاية الأقباط هما أصل مصر، والمسلمين جايين غزو فمش بلدهم .... يعني الفراعنه كانوا مسيحيين .... والرومان إلي جم مإختلطوش بمصريين، والإسكندر الأكبر لما جيشه جه مإختلطش بالمصريين، والمسيحيين مأسلموش بالزوفه لما المسلمين فتحوا مصر .... في مين تاني؟ ماشي يا سيدنا إنت وهوا، المسلمين مش مصريين، عايزين إيه؟ قولوها بصراحه خلي عندكم شجاعه!!! والا حكاية اللغه القبطيه وإن كلام كتير من اللغه المصريه إلي بنتكلمها دلوقتي أصلها قبطي. هيا أصلها فرعوني، وقبطي يعني مصري.... فماشي، لغتنا أصلها قبطي، بيتكلمها مسلمين ومسيحيين ... يبقي مسلمين ومسيحيين قبطيين. والبلد بتاعت الكل. الفراعنه إلي بقوا مسيحيين، والمسيحيين إلي بقوا مسلمين.

- في حكاية الدير الأخيره: المصري اليوم جايبه الأحداث كلها بأرقام المحاضر: «المصري اليوم» تنشر القصة الكاملة للصراع علي أراضي الدولة المحيطة بدير «أبوفانا» .... الأرض مش بتاعة الدير والرهبان مغتصبين وكذابين، ومهياش بتاعة العرب او الفلاحين وهما مجرمين وبلطجيه. إشمعنا الحكايه دي؟ والا علشان الرهبان صوتهم طلع أعلي؟ طب أنا فاكر حكايه قريبه أوي، العرب فتحوا النار علي قاضي وظابط شرطه في نزاع علي أرض ناحية طريق مصر الإسكندريه الصحراوي وقتلوهم. أنا نفسي كنت عايز أشتري ارض للإستصلاح في المنطقه دي وقالولي لازم تراضي العرب وإلا حيقتلوك!!! طبعا الرهبان مش حيدفعوا، وطبعا العرب مش حايسيبوا الأرض إلي بيعتبروها بتاعتهم! طب بص الموضوع: البابا يرفض إنهاء أزمة «ملوي» بـ«جلسة صلح».. والمطرانية تعلن ٦ مطالب لـ«التهدئة». هيا حقيقي عدم كياسه في حل الموضوع والا هي فرصه لمكسب أكبر؟ "هذا الحادث يمثل «إساءة» للمسلمين والمسيحيين معًا، لأنه يوضح - حسب قوله - عدم وجود أمن في المنطقة" .. إيه دخل الدين هنا؟ يمثل إساءه للدوله ماشي، يمثل إساءه للأمن ماشي، إنما إيه دخل الأديان هنا؟

- علي الناحيه التانيه مش ممكن ننكر إن في مسلمين بيكرهوا المسيحيين؟ لييييية؟ علشان لقوا حد يزيفلهم الحقائق ويديهم البنزين في إيدهم؟ تلاقي شيخ علي فضائيه طالع يلطش في المسيحيين، وإنهم عايزين يعملوا وإنهم بيقولوا وإن إنجيلهم بيقول وإن في الكنيسه مش عارف إيه ..... يا سيدنا الشيخ، هوا كل إلي في الإنجيل دا مكانش علي أيام رسولنا عليه الصلاة والسلام وعلي أيام الصحابه وعلي أيام الخلافه؟ مفيش حد فيهم لمس المسيحيين أو حرض ضدهم ليه؟ هما في 1400 سنه كانوا مستخبيين وطلعوا دلوقتي؟ وإنت مالك يقولوا إلي يقولوه إنشالله يقفوا عريانيين في الكنيسه، وإنت مالك!!! ما كانوا علي أيام قوة الدوله الإسلاميه عايشين عادي ولا حد دخل في عقيدتهم السماويه!! أوم ييجي إبنك إنت يبيعلي البتاعه ديه ويقولي دي طرمبة ميه؟ (علي راي علام الملواني في مسرحية مدرسة المشاغبين).

- تلاقي الصحف ووكالات الأنباء ميصدقوا يلاقوا خبر .... "عصابه تقتحم محل صايغ مسيحي وتقتل ..." .... بذمة أهاليكوا مفيش ولا صايغ مسلم إتقتل وإتسرق محله؟ "الفلاحين يقتحمون الدير ويختطفون 3 رهبان ويرغموهم علي نطق الشهاده والبصق علي الصليب" ...... والنعمه الشريفه؟؟ بس برضه لازم يبرزوا تصريحات الجهات الأمنيه "الموضوع ليس له بعد طائفي" ... رموا السم وغطوه بالعسل.

- قصص وحكايات للصبح. إلي يقولك المسيحيين بيستدعوا أمريكا علشان تتدخل، وإلي يقولك المسيحيين عايزين يعملوا دوله ليهم في مصر، وإلي يقولك الأنبا شنوده عايز قانون خاص للمسيحيين، وإلي يقولك الأديره والكنايس مليانه سلاح ..... كل دا والمسيحيين مش بينفوا أو يأكدوا أو بمعني أصح باسطهم الوضع شويه علشان لقوا نفسهم بيكسبوا مكاسب من نظام مرتعش. بصراحه المسلمين بدأو يصدقوا الكلام دا، وإلي هوا مش في صالح المسيحيين، وكلنا حنخسر كتييييييير أوي، حنخسر مصر. أمريكا أو غيرها لو جم (ودا مستبعد أوي لأنهم مبيتحركوش غير علشان مصلحتهم) مش حيفرق معاهم مسلم أو مسيحي، حيقتلوا الأول وبعدين يشوفوا البطاقه.... مش حيفرق معاهم بيت مين دا لما حيضربوا الصاروخ. والمسيحيين لو حيفكروا يعملوا دوله مسيحيه حيخسروا بلدهم ... تقدروا تستغنوا عن أنهي حته في مصر؟؟ بحري والا قبلي؟ قناه والا بحر أحمر؟ النوبه والأقصر، والا الإسكندريه؟ مش كلها تارخنا مع بعض؟ فين الحته إلي في مصر مافيهاش تاريخنا؟ تاريخ مصر. وبعدين من إمتي القانون المصري فرض حاجه علي المسيحيين، ما إلي عايز يتجوز بيتجوز في الكنيسه، والمواريث بمعرفتهم، ومفيش طلاق ليهم حاضر مفيش..... وغيره!! أما عن الأديره والكنايس إلي فيها سلاح .... يعني بنادق ومسدسات؟ وبعدين، ما ممكن المسلمين يكون عندهم أكتر وأقوي! حنحارب بعض؟

يبقي الحل إيه؟

- لازم الأنبا شنوده يدرس الموقف كويس أوي، ويحسب كل الحسابات كويس أوي، ,انا بجد عارف أد إيه هوا حاش بلاوي كتيره أوي كانت ممكن تحصل .... بقول لازم الأنبا شنوده بعد ما يدرس الموقف كويس، يعمل مناظره تليفزيونيه مع مسئول كبير .... وليكن وزير الداخليه أو أي حد .... يا عم وزير إنت، مش حصل في اليوم الفلاني جه مش عارف مين عمل مش عارف إيه؟ دي فتنه طائفيه والا لأ؟؟ مش حصل في اليوم الفلاني إن في مسلمين هاجموا الكنيسه الفلانيه؟؟ ...... يقوم يرد الوزير.... وهوا مش عارف مين دا عمل كده مش علشان الشيء الفلاني؟؟ يبقي فين الفتنه بقي؟؟ والمسلمين مش هاجموا الكنيسه علشان أبونا مش عارف مين قال إيه في السر؟ ...... طبعا أنا ببسط الأمور، مش حيتكلموا كده ومش علي أحداث فارغه. يجوا في الأخر يعرفوا، في فتنه طائفيه والا لأ. ..... طب الحل إيه يا أبونا شنوده .... أبونا يعلن حرمانيه القنوات الفضائيه المشبوهه، وعدم موافقته عليها علنيا. ويعلن إستعداده لتفتيش الأديره والكنائس في أي وقت كان، ويعلن أن من لا يلتزم بشروط الأخوه والصداقه هو خارج عن الكنيسه، .....إلخ .... والوزير يعلن نفس الشيء، إغلاق القنوات الفضائيه إلي بتثبت عليها التحريض، إيقاف الدعاة إلي بيثبت عليهم التحريض........

- لما تحصل أحداث، لازم يتجاب كل الأطراف علانيه ويتكلموا، إنت عملت كذا وإنت عملت كذا ويتعاقبوا.... أسلوب التخبيه والتعتيم مبيجبش غير القيل والقال وبيسمح لغيرنا يضربنا وإحنا مش عارفين صح والا غلط. الرهبان إلي قالوا إتخطفوا يتجابوا علي الهوا مع إلي قالوا خطفوهم، وكل واحد يقول إلي حصل قدام بعض، والكذاب حيبان، والغلطان يتعاقب. إنما نخبيهم في مستشفي ونفرض عليهم طوق أمني يبقي سبنا كل واحد يقول إلي عايز يقوله والشعب مسلمين ومسيحيين ميعرفوش الحقيقه غير من الجرايد أو قنوات التطرف.

- أي صحفي أو كاتب او شاعر أو غيره يهاجم طرف من الأطراف يتعاقب فورا وبعنف، إشمعني لما قالوا عن صحة رئيس الجمهوريه إتطسوا حكم فورا من أول جلسه، ولما يشتموا دين غيرهم نطبطب عليهم ونداري ونخبي؟ سواء من دول والا من دول؟

- كل دا و 90% من الشعب مش حاسس بيه، وعلاقته مع جاره وصاحبه المسيحي والمسلم زي ما هيا مش فارق معاهم كل دا، وهي دي نقطة القوه الأساسيه في الموضوع.

الكلام إلي فات دا كله عشوائي، مجرد إحساس نفسي أقوله، وكل واحد يقول الحل إلي عنده.... مش حتفرق كتير لأن محدش حيعمل إلي حنقوله، بس أهو بنقول. وعلشان خاطري، محدش يقولي أنا صحابي طول عمرهم مسيحيين والكلام دا، أصل مش هوا دا الموضوع إن صحابنا وجيرانا بنحبهم وخايفين عليهم وعلاقتنا كويسه، الموضوع هو ضرب الفتنه وإلي بيبعتهالنا وإلي عايزينها، علانيه وبصراحه. لكن نظام أرمي كلمه وأجري، والا أعمل عمله وأستخبي، أو أكذب كذبه وأصرخ وألم الناس ..... مش حينفع وحينقلب علي الكل.

بيان في الجون

لأ بجد دا إلي يتقالوا زي معلقين الكوره ما بيقولوا ........ وجون وجون وجون وجووووون

من صحيفة المصريون: جبهة علماء الأزهر: النظام الذي يهدر حقوق الإنسان لا شرعية له

طب بصوا نص البيان علي موقع جبهة علماء الأزهر: العمل بقانون الطواريء حكم بغير ما أنزل الله

حقيقي البيان لازم يتقري حته حته لأنه مش بس عن نقد قانون الطواريء (أم طارق علي رأي Appy)..... دا جايب من الأخر خالص في كل حاجه في البلد.

حلوه أوي أخر حته في البيان: "وقد أخرج الشيخان عن معقل بن يسار قال : سمعت رسول الله صلى الله عليه وسلم يقول" ما من عبد يسترعيه الله رعية يموت يوم يموت وهو غاش لرعيته إلا حرم الله عليه الجنة" ...... يا خيبتك يالي في بالي.

والا دي: " لقد أضحت القوانين فينا غايتها هي الصد عن سبيل الله وعن الصلاة، وأضحت مصر بسدنة تلك القوانين طللا ترحَّل عنه أهله ، ومريضا فرَّط فيه أُساتُه، وذبيحة استحل لحمها النهازون ، النهاسون، والناهشون، النخاسون، الذين استباحوا ان يحكموها بقوانين لايقبل الله أن تعامل بها الحيوانات المستأنسة أو الحيوانات المستوحشة. فإن لتلك الحيوانات حقوقا لا يطمع فيها المحكومون بالأحكام العرفية أحكام الطوارئ الماحقة."

طبعا كله طناش ولا كأن حد قال حاجه، بيتكلموا عن بلد تانيه.

ملحوظة:

انا عملت بانرين بيعبروا عن رفضي لأتحاد المدونين المصريين وإخترت واحد لنفسي أحطه علي السايد بار، لو حد عايز يختار منهم ويحطه عنده يتفضل.

بانر تالت:

مدونتي وأنا حر فيها

ملحوظه: أنا لسه منتظر تعليقاتكم في البوست إلي فات وحارد علي التعليقات هناك، بس البوست دا بيعبر عن موقف معين فكان لازم أنشره دلوقتي.

إسلامفوبيا - الخوف من الأخلاق

في تدوينتي السابقه دعوت إلي تشجيع الشيخ الإبراهيمي في قراره بوقف تقديم الخمور في فندق جراند هيات الذي يمتلكه في القاهره. ولكن بعد ما كتبت التدوينه وقريت التعليقات، وبعد متابعه مستفيضه للموضوع في أماكن مختلفه، ظهرت عدة موضوعات وأفكار وإستفسارات حبيت أطرحها وأخد رأيكم فيها:

1- إتضح، والله أعلم، أن سمعة الشيخ ليست فوق مستوي الشبهات .... فإستثماراته في هذا الفندق هي جزء صغير جدا من إستثماراته الضخمه، وملف هذه الإستثمارات متشعب ويثير تساؤلات كثيره وخاصة إستثماراته في مصر. كما إن له ملف فضائحي معروف بإسم "فضيحه علي النيل" ولا أحب أن أتناوله هنا.

2- أعلن الشيخ علانيه توبته إلي الله من بيع الخمور، وهذه التوبه بينه وبين الله ولا يحق لأحد مراجعته في مصداقيتها، فإن شكك الكثيرون في دوافع هذه التوبه فأنا شخصيا أخذ بظواهر هذه الأمور وأترك لربنا بواطنها فهو أعلم بها من كل البشر، وهو من سيحاسب في النهايه.

3- هناك سؤال ملح جدا: إذا كانت تجارة أحد ما هي في ما يغضب الله، كتاجر مخدرات أو كتاجر خمور، أو إذا تحصل شخص ما علي رشاوي متعدده من عمله .... ثم تاب هذا الشخص وعزم علي عدم العوده لذلك مره أخري، فماذا يفعل بالأموال الحرام التي إختلطت بالأموال الحلال؟؟ وهل تمكن توبته مع إستمرار تمتعه بالأموال الحرام؟

4- تسأل صاحب مدونة Sharm: لماذا لا يكون إقتصادنا قائم علي ديننا؟ وعبر صاحب مدونة عمرو (مواطن مصري) عن قلقه من المد الإسلامي وإعتراضه عليه بالصوره المطبقه في بعض البلاد العربيه والإسلاميه الأخري (في السعوديه مثلا) أو أمثله أكثر عنفا كالجزائر أو أفغانستان، وإستنكر وجود صحوه إسلاميه.

بالنسبه للنقطه الأخيره:

- كلمة "إسلاميين" وهي بالمعاني المستحدثه قد تعبر عن: إرهابيين - معاديين للرأسماليه - معاديين لأمريكا - مكفرين للفنون - مانعين لحرية الرأي - منتهكين لحرية المرأه - فارضين النقاب علي المرأه - مضطهدين للمسيحين (أو النصاري زي ما هو مفضل لطوائف معينه) وفارضين الجزيه عليهم - قاتلين للمواهب - مانعين للسياحه ...... يعني من الأخر، وقف حال إقتصادي وشعبي ومعاداه دوليه.

- ساهم في النظره دي طبعا كل من ليه مصلحه في الترهيب من الإسلام ... المسلم لازم يكون بيصلي ويصوم بس وفي بيتهم بس وياريت كمان ميصليش ولا غيره، ومالوش دعوه بإلي بيحصل حواليه وكمان يشارك وإلا حيكون وحش وإرهابي. جه وقت علي مصر لو رحت تصلي في جامع تبقي جماعات إسلاميه وإرهابي!! كل رموز الفساد دوليا ومحليا ليهم مصلحه في تصوير المسلمين كإرهابيين، ولو المسلمين قبضوا علي الحكم حيطربقوها ويقفلوها.

- الحقيقه برده إن النماذج إلي حوالينا كانت عجيبه بجد، زي كأنهم بيحاولوا يثبتوا الحكايه دي، أول ما يحطوا إيدهم علي حته تولع والحروب تقوم والدنيا تبوظ، وغالبا أول طلقه بيطلقوها بتكون علي أهلهم، فإلي بيفكر يمشي علي النموذج دا حايفكر ألف مره.

- الحقيقه التانيه إن بعض الأنظمه دي مُخَلقَه لأغراض محدده ... نظام طالبان مُخَلق لمواجهة السوفييت، وبعد كده كان المطلوب منه يشطح علشان أمريكا تحتل أفغانستان. أسامه بن لادن (علي الرغم من إعتبار مرشد الإخوان له مجاهد) فهو مُخَلق لهدف محدد، وبعد كده يا إستمر في اللعبه أو دفع للإستمرار في اللعبه علشان يظهر وقت الحاجه لتشويه الإسلام.

- مش مطلوب خالص حكم إسلامي، شيء مش مهم خالص ولا بتاتا، ما إحنا في دوله إسلاميه دستوريا، وعندنا قانون مستمد من الشريعه الإسلاميه، بس المطلوب نعمل كأفراد بإسلامنا دا....... طيب سؤال Sharm هل ممكن قيام إقتصاد إسلامي؟؟ هوا يعني إيه "إقتصاد إسلامي قايم علي دينا"؟ مش إن كل واحد يتقي ربه في مكانه؟ كلنا مسلمين ومتدينين في مصر وبنصلي وبنصوم؟ .... طيب كام صاحب مصنع مسلم بيغش بضاعته؟ كام صاحب فندق مسلم بيقدم خمور ورقص في فندقه؟ كام مدير مشتريات مسلم بياخد رشوه؟ كام واحد مسلم محتكر أو مساهم في الإحتكار؟ كام واحد مسلم سرق من بنك وهرب؟ كام منتج مسلم بيرفع الأسعار بإجحاف من غير ما يراعي الناس؟ ......إلخ

هل عدم وجود إقتصاد قائم علي الدين دا غلطة الدين الإسلامي والا مصر والا الدستور المصري والا الشعب المصري؟؟

- تاني، مش مطلوب حكم إسلامي، المطلوب "أخلاق" إسلاميه غير متشدده، كل واحد يحكم نفسه وكل واحد يتقي ربنا بنفسه ولنفسه، والحلال والصح معروف والحرام والغلط معروف. بس المشكله إن المنتفعين من الفساد مش عايزين يسمحوا لده يحصل وإلا تجارتهم وفسادهم وإنتفاعهم حيقف.

الوهابيين الوحشين

في بوست سابق ليا بتاريخ 6/5/2008 كتبت شكر وتقدير واجبين لمالك فندق جراند هيات بالقاهره الشيخ السعودي عبد العزيز ابراهيم ابن الابراهيم علي قراره بمنع تقديم الخمور في الفندق الذي يملكه الشيخ ولكن تديره شركة هيات العالميه، بل وشمل الخبر الذي قرأته في أكثر من مكان منهم ما جاء في جريدة الدستور وغيرها أن الشيخ السعودي أمر بتدمير مخزون من الخمور في الفندق بمبلغ 8 ملايين جنيه.

لغاية هنا الخبر عادي، مالك بيحصل علي عائد من الفندق عاد لرشده وتاب ومقبلش علي نفسه فلوسه تختلط بعائد من بيع خمور. والخمره للي موصلتوش المعلومه حرام شرعا، ومافيش أي جدال في حرمانيتها.

وبدل ما اسمع تهليل وتشجيع ودعاء للشيخ، ألاقي مقالين زي الطين بيهاجموه في المصري اليوم. واحد معرفش مين بالظيط بيتكلم عن "الوهابيين الجدد"!!!! والتاني من شخص كنت باحترم رأيه لحد النهارده وهوا سليمان جوده إلي بيكتب عمود خط أحمر والمقال بعنوان "لا..يا شيخ"!!

1- المقال الأول عن الوهابيين الجدد، فزع صاحبه من قرار الشيخ مالك الفندق الذي يطل علي أعظم مجري مائي في الدنيا! مش عارف إيه علاقة الخمره بالنيل؟ وبعدين يتحفنا الكاتب بإكتشاف إن القرار له مغزي عميق وهو توصيل معني إن شيوخ السعوديه يفعلون ما يحلوا لهم في القاهره بغض النظر عن إن فعلهم يسخر من قوانينا ودستورنا ويؤثر علي أمننا القومي وسمعتنا العالميه. وإن دا جزء من الثقافه الوهابيه إلي السعوديه بتحاول تصدرها لمصر علشان تسيطر علينا "لقد خطف السعوديون الدور المصري بالمال، والآن يحاولون خطف شعب مصر من الداخل بأفكارهم الوهابية التي تتنافي مع أبسط قواعد حقوق الإنسان ." منع الخمر يتنافي مع حقوق الإنسان؟

طبعا هو بينفي إنه بيدعوا لتقديم الخمر وإنما بيدافع عن إنتهاك قوانين البلد وكرامته وسيادته!!

يا نهار إسود مش فايت علي دماغك يا بعيد .... طب قول الكلام دا في موضوع تاني.... إفتح الموضوع لما يحصل حاجه تانيه زي مهاجمة كلاب الأمير للناس في الفندق والا الأميره إلي نصبت علي الناس والا أي أحداث تانيه حصلت، إنما في الموضوع دا بالذات؟؟؟ قوانين إيه إلي انتهكت يا كابتن؟ دستور إيه إلي انتهك في الموضوع دا؟؟ لو في قانون بيجرم منع الخمور في الفنادق يبقي القانون دا ضد الدستور إلي بيقول إن الشريعه الإسلاميه المصدر الرئيسي للقوانين. وبعدين بتقارن تهريب السلاح بتقديم خمره للناس؟؟ واضح إن إلي كتب الكلام دا كان سكران وإزازة الويسكي قدامه. خايف علي الأمن القومي في منع الخمره من الفنادق، طب إتكلم عن الوهابيين والسيطره واربط الكلام دا بحاجه تانيه!! ربنا يسامحك يا ..... عم.

2- التاني بقي عدا خالص .... مابيشريش الخمر ... مابيشربش اللبن الصبح وكل صحابه ضحكوا عليه .... قال إيه بقي سليمان جوده؟

"وليس من حق أحد، بطبيعة الحال، أن يناقش الشيخ البراهيم، في معتقداته الخاصة، ولا في آرائه، أو في قناعاته.." يا سيدي دي مش معتقدات خاصه وأراء، دا الدين الإسلامي لو سيادتك لسه معانا فيه!! وبعدين بيتكلم عن الصناعه العالميه والفندقه وأصولها، يعني فندق من غير خمره زي الجامع من غير مؤذن، مايمشيش.

"الغريب أن الشيخ البراهيم، قد شكل لجنة لحصر الخمور الموجودة في الفندق وإتلافها، وهي تقدر بثمانية ملايين جنيه تقريباً.. وقد كان الفندق، إلي ما قبل اتخاذ القرار الأسبوع الماضي، فندقا عاديا وطبيعيا، شأنه شأن باقي الفنادق في مصر، وفي العالم." جت في مخي الأيه الكريمه في سورة الأعراف: "وَمَا كَانَ جَوَابَ قَوْمِهِ إِلَّا أَنْ قَالُوا أَخْرِجُوهُمْ مِنْ قَرْيَتِكُمْ إِنَّهُمْ أُنَاسٌ يَتَطَهَّرُونَ" يعني يا راجل الشيخ بيتطهر، عايز يتوب، نقوم نهاجمه والا نشجعه؟

"ولا أحد يعرف سبب هذا التحول الذي جاء بلا مقدمات، فيما يؤمن به صاحب الفندق، ولا أحد أيضا يعرف مدي تأثير مثل هذا القرار علي درجة تدفق أو إقبال السياح علي الفندق " يلعن أبو ام السياح، يعني خلاص السياحه عندنا مافيهاش غلطه غير تقديم الخمور.... خلاص أعلي معدل سياحي في العالم بالخمور وحنتهز لو منعناها؟؟ إنشاله نتهز والا نموت، ملعون أبو السياحة إلي جاي فيها فلوس حرام للبلد.

"ولكن ليس من حقك أن تستولي علي فندق، ثم تمنعه من تقديمها، ولا من حقك أن تملك شركة طيران ثم تمنع الطيران عليها لغير المحجبات والملتحين.. لا لشيء، إلا لأننا نتكلم هنا، عن سياحة عالمية.. لا محلية.. ولا دينية!" لأ معلش من حقي أعمل شركه وأبيع وأمنع وأحلل إلي انا عايزه طالما مخالفتش شرع ربنا والقوانين المستمده من الشرع ..... أه من حقي أعمل شركه طيران للمحجبات بس، وإيه إلي يمنعني؟؟

طب بلاش، خبر قريته من فتره: شركه طيران أوروبيه عالميه حتخصص رحلات داخل أوروبا للشواذ من الرجال فقط!! وممكن للشواذ دول داخل الطائره الإستمتاع بالجنس الجماعي فوق السحاب!!! أقسم بالله دا خبر صحيح من شهر في جريده هنا، وسعر التذكره مش فاكر بالظبط حوالي 400 يورو شامله المشروبات والألعاب الجنسيه. قولي بقي دا مش دستوري ومش من حقهم؟ بس الخمور هيا إلي حلال وعايزين يضربوا السياحه!! يا شيخ إتقي ربنا بقي، هيا البلد دي مافيهاش مسئول خايف يشيل كل الذنوب دي؟

3- لما جيت البلد الأوروبيه إلي أنا عايش فيها، وبعد ما عملت المزرعه، لقيت في مشروع رائع ومربح جدا وهو إني أعمل مطعم. لقيت المكان جاهز وممكن كمان أخد فرع من شركة مطاعم كبيره زي ماكدونالدز أو كنتاكي إلي مش موجود منهم في المدينه دي. العقبه الوحيده كانت الخمور. دي مصيبه سوده.... لازم تقديم خمور... إقترحوا عليا بند الخمور تمسكه شركه تانيه تاخد أرباحه وانا ماليش دعوه.. يا سلام، علي الأقل وفرت المكان، يعني برده شاركت، وكل واحد يدخل يضربله قزازة بيره عداد ذنوبي يعد معاه، هوا يشرب وانا أتلسوع!! ماينفعش مطعم من غير خمور يبقي خلاص، ماينفعش المشروع كله... طيب الشيخ عمل المشروع وكان لاهي عن دينه، الراجل تاب، يولع في نفسه؟؟

4- الكلام دا في بلد أجنبيه ماشي ممكن نناقشه، إنما في مصر الإسلاميه؟؟ وبعدين نقول الوهابيه والأمن القومي والقانون والسياحه؟؟ في الحاله دي بالذات، مرحبا بالوهابيه وطظ في الأمن القومي والقانون والسياحه وإلي يهاجم قرار الشيخ. يا رب كل مالك فندق يعرف كام ذنب بياخده في اليوم لما حد بييجي عنده ويشرب خمره، حني لو هو مابيشربش.

نداء عاجل لشعب مصر

الصديقه العزيزه Cat of desert كتبت بعض الأحداث إلي حصلتلها النهارده في المواصلات : صباحو خناقات ... بركاتك يا علاوووة، وإلي شد إنتباهي واحد كان بيكلم نفسه وبيفكر يخرج عياله الكبار من المدارس وكفايه عليهم الإعداديه. ونظرا لإحساسي بما سيحدث في الأيام المقبله، أوجه هذا النداء الهام لكل الشعب المصري:

- أرجوكم متخرجوش عيالكم من المدارس .... أكرر، متخرجوش عيالكم من المدارس.

- أرجوكم إلي بيفكر فيكم يبيع عيل من عياله أو يبيع عياله كلها يستني شويه.

- سكان المناطق العشوائيه، متعلنوش المناطق دي مستعمرات عراه.... برده إستنوا شويه ومتبيعوش هدومكم دلوقتي، علي الأقل مش كلها.

- أصحاب السيارات ماركة سيات 900 سي سي 30 حمار، و الـ 128 الـ 1100 سي سي 40 حمار موديلات سنه 1975 وحتي موديل 1980، ماتبيعوش عربياتكم..... إوعوا تبيعوها.

- محدش يتهور ولا سمح الله يقتل عياله ومراته (ممكن مراته لو مغلباه).

وحيثيات هذا النداء:

1- الحكومه أعلنت مرارا وتكرارا إن "حزمة" القرارات الأخيره لن تمس محدودي الدخل ...... أولا يعني إيه حزمه؟؟ هما بيعاملونا إننا بهايم وبيرمولنا حزم (جمع حزمه) برسيم؟؟ ما علينا. وبما إن مافيش حد في الشعب المصري إسمه "محدود الدخل" فمحدش حيتأثر. ماتخافوش.

2- الحكومه حاسه بيكم وحتوصل الدعم للفقرا واحد واحد.... نفر نفر... مش مهم إرتفاع أسعار كل حاجه، إنتوا أساسا مكنتوش لاقيين تاكلوا ولا تلبسوا من الأول فبلاش حجة إرتفاع الأسعار المره دي وتخرجوا ولادكم من المدارس.

3- أهو.... السيد/أحمد عز رئيس لجنة الخطة والموازنة بمجلس الشعب، أعلنها صريحه أهو عن إرتفاع الأسعار الذي قد يصاحبه ارتفاع في معظم السلع في السوق المصرية: "هذا كلام يتردد في (الفلكلور) الاقتصادي المصري، بينما تري الدولة أن الفئة المستهدفة لديها القدرة علي دفع الزيادة في البنزين لصالح الفئة التي لا تمتلك مثل موظفي الدرجة السادسة بالحكومة، وهي الفئة التي بدأت تنكمش في القطاع الحكومي" ..... معني كلامه لو شفته أي سلعه إرتفع سعرها متصدقوش، دا خيال وسراب، إستعيذوا بالله كدة من الشيطان الرجيم وإشتروا حتلاقوا نفسكم محاسبين علي السعر القديم ... يمكن كمان سعر من سنتين فاتوا. وكمان معني كلامه إن أي صاحب كشك أو عمال التراحيل أو العاطلين بقوا رسميا من موظفي الدرجه السادسه في الحكومه.... ألف ألف مبروك يا جماعه.

4- وتعقيبا لكلام السيد/ أحمد عز، أصحاب السيارات الفارهه الحديثه (من الذين لم ترد مواصفات سياراتهم في النداء) ماركات 128 1100 سي سي موديلات من 1981 وحتي 1990 دول من الفئات القادره، فمعلش يا جماعه نستحمل بعض شويه وندفع الزياده في البنزين علشان العربيات القديمه، وعلشان الحكومه تعرف تروح تدي الناس الغلابه الدعم في..... إحم ... قصدي إيدها.

5- مش عارف حيثيات تانيه إيه ممكن تتقال، الصراحه ..... البقيه في حياتكم.

ملحوظه:

رشيد محمد رشيد شكله كده بيرسم علي رئاسة الوزراء .... إحساس داخلي كده عندي إن في تفكك في الوزراه، وفي معارضات داخليه كبيره داخل الحزب الوطني، ويمكن كمان داخل بيت الريس .... إلاهي يفككهم كلهم قادر يا كريم.

تفتكروا الرئيس موافق والا معارض لرفع الأسعار؟؟ في قوي عايزه تكرهنا فيه أكتر من كده وتسقطوا بثوره؟

طب شوفتوا الخبر دا: "مواطنون ضد الغلاء" تناشد الرئيس مبارك التراجع عن قراره بزيادة الرواتب بعد إقرار الحكومة زيادات جديدة في الأسعار ........ مش قولتلكوا حنبوس رجله علشان ميزودش المرتبات!

لو كان الموضوع إنهم بيلموا موارد علشان زيادة المرتبات كنا قولنا حمير وبيتصرفوا غلط، إنما يلموا موارد أكتر من اللازم من جيوبنا، ويعلوا الأسعار قبل ما توصل العلاوه جيوب الغلابه، ويعلوا سعر حديد التسليح كمان .... واخدين بالكم: حديد التسليح .... يبقي الموضوع فيه "إن" وميتسكتش عليه لأن الحكومه والعصابه إلي وراها كده بتتحدي الشعب.

هااااا حرمتوا والا عايزين كمان؟؟؟

الحكومه عايزه تقنعنا إنها علشان تلم الـ 30% العلاوه:

1- لازم تلم موارد حقيقيه للكلام دا، ولم الموارد الحقيقيه لازم يكون بزيادة أسعار كل حاجه إلي هوا معناه في الحقيقه لم الفلوس إلي في جيوبنا... يعني إدو موظفي الحكومة والقطاع العام 30% ولازم يلموها تخفيض دعم 40% (كمرحله اولي طبعا)!!!! وطبعا بناء عليه الأسعار حتزيد في كل حاجه فورا 100 و 200% كمان! فلو موظف قطاع عام مرتبه زاد 30% يعمل إيه؟

2- طيب بقي فئات الشعب إلي مالهومش مرتب حيعملوا إيه؟؟ نظيف يعترف بالتأثير السلبي لارتفاع اسعار الوقود على محدودى الدخل.... هوا لما اسعار كل حاجه حترتفع يبقوا بيدوا الفقرا إيه؟ دول حيطحنوا الفقرا، والأغنيا مش حتفرق معاهم.... قصدي الأغنيا إلي المفروض بجد يتاخد منهم، مش الطبقه العاديه.

3- طب لما هوا لازم يكون في موارد حقيقيه وعارفين كده، امال كنا بنعمل إيه كل السنين إلي فاتت دي من عمرنا؟ كنا عايشين من موارد غير حقيقيه والا كان بيضحكوا علينا والا كانوا بيجربوا فينا؟؟ والا هما باعوا البلد كلها خلاص وإدوا الدعم لإسرائيل في الغاز، ووزعوا كل الموارد علي المحاسيب وعلي نفسهم ودلوقتي مش لاقيين موارد يأكلونا منها؟؟؟ فين ياض منك له فلوس الخصخصه؟؟

4- مبارك: الموارد الحقيقية غير متوفرة لصرف علاوة الـ٣٠%. ...... أمال أعلنت ليه زيادة المرتبات 30%؟؟؟ والا دا علشان يبقي حجه ويغطي علي المصايب إلي جايه؟؟

5- في سؤال بيلح عليا بقاله كام يوم.... لو مفيش زياده 30%، والحكومه مش مضطره تلم "موارد حقيقيه" أو غير حقيقيه.... كانوا زودوا أسعار البنزين والسولار والسجاير والخدمات الحكوميه إلي هوا مقدمه لزياده كل حاجه بردوا؟؟ طيب الفكره الخبيثه أوي إلي في دماغي... لو الشعب كله رفض رفضا قاطعا وباتا زياده المرتبات علشان يبطل حجه الحكومه في زيادة الأسعار، حيحصل إيه؟؟ يعني لو كل الموظفين قاموا في نفس واحد كده وقالوا: "متشكرين اوي يا ريس، مش عايزين الـ 30%... ومش مطلوب منكم تدبروا اي موارد .... شكرا جدا". هل الحكومه ساعتها حترجع عن قرارات زيادة أسعار البنزين؟؟

6- من الحكومه والنظام الحاكم لشعب مصر الحوش: "إتعلمتوا الدرس والا لسه؟؟ هااااا عايزين السنه الجايه علاوه 50% والا كفايه كده؟؟"

الأخ ممتاز القط، عرفت ليه بنحبك يا ريس؟؟

==================

بتتفاوضي علي إيه يا حاجه؟؟

اعتصام ٥٠٠ من عمال شركة «ديب إيجيبت».. و«عائشة» تفاوض الإدارة الكورية

تصدقوا الخبر دا بيحصل في مصر؟؟ يعني مثلا مش في كوريا ودول العبيد المصريين هناك! هوا مش في قوانين واضحه وصريحه، أمال رايحه تتفاوض علي إيه بالظبط؟؟ دول لو في بلد محترمه كانت الشركه الكوريه دي خدت حته شلوت طلع من دماغها وكانوا دفعوا غرامات خليتهم يعيطوا. بس الظاهر إحنا في بلدنا لازم نتهان لصالح الإستثمار الأجنبي إلي هما سيادنا، ومصنع أجريوم وقصته مش بعيده عن أذهانا.

بس حنقول إيه، إذا كانت الحكومة بتاعتنا مضيعه كرامتنا، الأجانب حيحترمونا؟؟

=================

تحية وشكر واجبين

فندق جراند حياة في القاهرة يمتنع عن تقديم الخمور بناء على طلب مالكه

شكر خاص وتحية لمالك الفندق السعودي الشيخ عبد العزيز ابراهيم ابن الابراهيم علي قراره وإن أدي ذلك إلي تخفيض درجة الفندق. وأسأل الله وأسأل مالك الفندق ألا يتراجع عن قراره تحت كل الظروف لأن ما سيكسبه من أموال في دنياه لن يساوي ما سيخسره في أخرته، بل أستطيع أن أدعي أنه لن يخسر في دنياه أيضا فسيظل الفندق محترم بل سيجتذب إن شاءالله زبائن أكثر من الذين يسؤهم وجود ما حرم الله في محل إقامتهم وهم كثيرون بحمد الله.

ربنا يخلي دادي وإبن دادي

في عام 2914 وفي دوله بعيده ما زالت تعيش العصر السحيق، وفي إحتفالات الدوله بمناسبه عيد الشعب المبارك، وقبل إلقاء رئيس الدوله لخطابه السنوي إحتفالا بالمناسبه دي، دار الحوار التالي:

الرئيس: يا رئيس الوزراء أنا العلاوة كاتبها في الخطاب حسب ما إتفقنا 20%، متأكد حتعرف تجيب الموارد لتغطيتها؟

رئيس الوزراء: ماتقلقش يا فندم كله تمام.

الرئيس: أصل أنا بصراحه صعبان عليا الشعب دا علشان غلابه، ومانمتش إمبارح بالليل.

رئيس الوزراء (وقد ظهرت عليه علامات التأثر): بعد الشر عليك يا فندم، ما ينحرق الشعب كله المهم صحتك.

الرئيس: ما ينفعش يا رئيس الوزراء، إنت عارف مسئوليتي التاريخيه. أنا بجد قلقان من الإضرابات إلي بتحصل وخايف الشعب يوزه عقله ويعمل ثوره.

رئيس الوزراء: معاك حق يا فندم، الشعب كفايه عليه ضغط كده، ممكن ينفجر.

الرئيس: إنت معاهم معاهم عليهم عليهم والا إيه؟

رئيس الوزراء: لا يا فندم، إنت بس تأمر وإحنا ننفذ.

الرئيس (بصوت واطي لنفسه): جتك نيله، أهو دا بس إلي إنت شاطر فيه، أمرك يا فندم، عمرك ما عملت حاجه من نفسك.

الرئيس: عارف أنا فكرت في إيه؟ إننا نخلي العلاوه 50%؟

رئيس الوزراء (وقد ظهر الرعب في عينة): يا نهار إسود!!! قصدي يعني، إزاي بس يا فندم، منين؟

الرئيس: إنت مش عندك 20% جاهزين؟

رئيس الوزراء: جاهزين يا فندم.

الرئيس: بسيطه، نسحب الكام عربيه مرسيدس المخصصين ليك وللوزراء، ونخفض بدلاتكم شويه صغيره، ونخفف الـ 600 عربيه حراسه المخصصين للوزراء، ونبيع الكام شاليه في "مرمرنا" "والودن السخسة" المخصصين إستراحات ليكم، ونفتش سر عمولات المصنع بتاع "دمطين" إلي عاملاه الشركه إلي من البلد إلي إسمها "كنكه" ونصادر العمولات لصالح الخزانه..... وحاجات كده يعني صغيره علي الماشي.... حنلم الـ 50% وأكتر كمان.

رئيس الوزراء (بغيظ في سره): يا إبن الـــ ... لا وإنت الصادق ما تبيع قصرك في "شرخ شرمب" حتسدد ديون البلد كلها ويفيض!!

رئيس الوزراء: يا فندم ما إنت عارف إن الوزراء ناس كبار في السن وعندهم أمراض ومينفعش يركبوا غير مرسيدس، وبعدين الحراسه دي مش وجاهه ومش بنحب نوقف الناس ساعتين وتلاته ولا حاجه، إنت عارف الأخطار الأمنيه إلي بتواجهها البلد اليومين دول، والكام إستراحه في "مرمرنا" علشان الوزراء يريحوا أعصابهم من ضغط الشغل..... لا يا فندم كتير اوي، حاخد علي خاطري كده.

الرئيس (في سره): يا إبن الــ .... بقي كبار السن ولازم تركبوا مرسيدس، وكبار السن بتوع الشعب يتسحلوا أتوبيسات... طب هاتولهم أتوبيسات مرسيدس مثلا.

الرئيس: أنا مقتنع بفكرتي جدا.

رئيس الوزراء: طيب نبيع عربيات الوزراء بس وخلي عربيتي، وبلاش نبيع الإستراحات.... وخليها 25%.

الرئيس: أف عليك بجد..... حنجيب وزير الماليه. (يشاور الرئيس لوزير الماليه فيأتي للمنصه)

الرئيس يشرح لوزير الماله فكرته. ولأن وزير الماليه راجل واعر ومدقدق مش أبيض وورور زي رئيس الوزراء.....

وزير الماليه: والله عندك حق يا فندم، الكلام دا حلو وجميل، مرسيدس إيه وحراسات إيه وإستراحات فارغه... ما كل وزير عنده بدل المرسيدس إتنين، وبدل الفيلا تلاته.

الرئيس: قله، أصله معارضني. (وراح ضاحك وبص لرئيس الوزراء بيغيظه)

وزير الماليه بص لرئيس الوزراء وغمزله بعينه من غير ما الرئيس ياخد باله.

وزير الماليه: خلاص يا فندم، إلي تشوفه، أنا بكره حنزل قرار بيع كل المرسيدس والإستراحات للوزراء وخلافهم من رؤساء مجالس الإدارات.... وعلشان شايف حماسة سيادتك للموضوع ومقدرها، حابتدي بالحراسه والعربيات المرسيدس المخصصه لأولاد سيادتك، وبعدين بالإستراحات إلي بينزلوا فيها.... وبعدين نشوف كل وزير وكل وزاره.

الرئيس: يا إبن الكــــ .... قصدي فكره روعه.... هيا دي الروح العاليه في الشغل.

وزير الماليه: أي اوامر تانيه سيادتك.

الرئيس (بيفكر بعمق): بس مش عارف برضه... حرام الوزراء دول ولاد ناس وحيتبهدلوا برضه.... الشعب اهو واخد علي البهدله مش مهم يتبهدل كمان، إنما الوزراء ذنبهم إيه؟؟

وزير الماليه: انا عندي حل.

الرئيس: قول.

وزير الماليه: خليها 30% ونزود الضرايب علي الناس الأغنياء شويه، ونرفع عنهم الدعم.

الرئيس: ممممممم طيب ضرايب إيه تاني، ماحنا عندنا ضرايب علي التنفس حتي.

وزير الماليه: لسه، ضريبة العقارات، ولسة ضريبه علي السيارات الفارهه زي الـ 128 والسيات، ما هو مش معقول مواطن عنده عربيه فارهه زي الـ 128 موديل 1975 مثلا واخوه المواطن بيتشعبط في الأوتوبيس.

الرئيس: مممممم فكره برضه. إيه تاني؟

وزير الماليه: نرفع الدعم عن البنزين والسولار خالص.... المفروض إننا إقتصاد حر والسعر بيحدده العرض والطلب.

الرئيس: طيب والدعم علي الغاز إلي بنديه للمصانع وبعدين يبيعوا باسعار عاليه؟ والغاز إلي بنبيعه للبلد المستعمره إلي جنبنا بسعر التراب؟

وزير الماليه: ما نقدرش نعمل حاجة، إحنا إرتبطنا معاهم بعقود لمدة 20 سنه، ممكن نشوفلها حل برضه بس بعدين مش دلوقتي، وخلي بالك يا فندم برضه مين هما إلي في الصفقه (يهز راسه ويغمز بعنيه) فشويه شويه علي الموضوع.

الرئيس (بنرفزه): غيره.

وزير الماليه: علي السنه الماليه الجديده، أهو نطبع شوية بنكنوت نفرح بيهم العيال.

الرئيس: غيره.

وزير الماليه: نعلي اسعار الخدمات الحكوميه في صورة دمغات، ونضيف شوية فكة .... طوابع معونة شتا علي طوابع شرطه علي نزود أسعار النماذج .... فكه كده المواطنين مش حيحسوا بيها.

الرئيس: طيب وظبط أسعار السوق؟

رئيس الوزراء (لأول مره يتكلم من فتره): هوا إحنا مغسلين وضامنين جنه؟ ما كل منتج لازم يكون عنده الوطنيه الكافيه وميغليش الأسعار. يا فندم البلد دلوقتي بتمر بمرحله أمنيه خطيره متخفاش عليك، والوزراء مش فاضيين للكلام الفارغ بتاع السوق والعيش والأسعار دا.

الرئيس (وقد حل وقت إلقاء الخطاب): طيب مفيش وقت دلوقتي، يا رئيس الوزراء إعملي تقرير مفصل بالكلام دا (وفي سره جتك نيله علي المرحله الأمنيه بتاعتك). 30% ... ماشي؟

رئيس الوزراء ووزير الماليه: ماشي يا ريس.

الرئيس (في سره): جتكم الهم، أنا كان مالي ومال القرف دا، مانا كنت قاعد في قصر دادي كافي خيري شري. رئيس الوزراء لوزير الماليه هامسا: يا جدع دانتا أنقذتنا.... أبوسك منين. هوا دا الكلام، أكل ومرعي وقلت صنعه.

الرئيس يعلن عن الـ 30% علاوه وكأنه فتح عكا.... بس كان بيبص لوزير الماليه مش مطمن من كلامه، وبيقول يا تري حيودي البلد علي فين، وكان بيبص للي بيصقفوا ونفسه يقولهم جتكوا خيبه في هبلكم.

الحاضرين صقفوا بحراره ...... 30%، ربنا يخليك لينا يا رئيس الكل. (هوا يعني دفعها من جيبه)

رئيس الوزراء بيحسس علي سلسة مفاتيحه إلي فيها مفتاح شاليه "مرمرنا"..... والله ماهو فاكر، هوا جه هنا بالمرسيدس السودا والا الفيراني؟

الشيوخ أفتوا بعدم جواز الإضراب والخروج علي الحاكم بعد مظاهر الحب الجارفة إلي عبر عنها الشعب بعد الإعلان عن ال 30%.

قيادات الكنائس الأرثوذكيسه والإنجيليه يعلنوا عدم جدوي الإضراب بعد حل مشكلة العيش وزيادة الأجور 30%.

موظفين الحكومه رقصوا لغاية الصبح ......موظفين القطاع الخاص حطوا إيدهم علي قلبهم .... أصحاب المحلات والعامل الحر وأصحاب الاكشاك وأمثالهم من إلي مالهومش مرتب ثابت أغمي عليهم إنتظارا للمجهول .... سكان العشوائيات اعلنوها مستعمرات للعراه إستعدادا لبيع الهدوم.

سلملي علي قصر دادي.

إعمل حاجه .... خلاص كحينا تراب

شعب جاهل معندوش أي ثقافة

حلقة وائل الإبراشي مع والد وخال قتيل المحلة وفي حضور اللواء فؤاد علام إتكتب عنها كلام كتير في المدونات والتعليقات. مشوفتش الحلقة دي بس لقيتها علي النت كالمعتاد: جزء أول - جزء تاني - جزء تالت ..... وأهم جزء فيهم هوا التاني لأن كل التعليقات والنقد منصب علي تعليق سيادة اللواء حرب إليكترونية مدرعات كلاب بوليسية/محمد عبد الفتاح عمر وكيل لجنة الدفاع والأمن القومي بمجلس الشعب، إلي ربنا يكرمة ويباركلة فهمنا الحقيقة الواضحة بعد ما كنا متعاطفين مع الطالب إلي إنضرب بالنار في بلكونة بيتهم أثناء مظاهرات المحلة، وفهمنا منة جزاة اللة كل خير إن ذنب هذا الطالب الخسيس في رقبة متظاهرين المحلة الجبناء إلي كانوا بيجروا والأمن وراهم فاتح نار علي البحري فوق وتحت و "يصاب من يصاب ويقتل من يقتل" حسب كلامة، المهم أمن مصر إلي فوق راس الكل. وإعترض سيادتة كمان علي لفظ شهيد للقتيل الصعلوك ومش معقولة نسرف في اللفظ دا. لا فض فوهك يا سيادة اللواء.

أحلي الحاجات إلي قالها سيادة اللواء وعجبتني بصراحة إن قوات الأمن إنتقلت للمحلة مش علشان حوار يا شعب يا جهلة، لأ علشان في تخريب قد يؤدي إلي قلب نظام الحكم. وإن قوات الأمن بتطلق النار عشوائي للتحذير علشان إلي واقف في البلكونة يستخبي تحت السرير، وإلي لا مؤاخذة في الحمام يرفع البنطلون، وإلي قاعد كدة والا كدة مع مراتة يقطع الخلف. بس الشهادة للة، الراجل ضحي بإبنة لما إتسأل يعمل إية لو إبنه راح في ضرب نار عشوائي قال" يروح في ستين داهية، طالما معندوش ثقافة أين يقف وأين يبدي رأية واين يكون". أنا بموت في الثقافة، ويا ريت يبتدوا يعلموا الشعب الجاهل دا بقي شوية ثقافات جميلة زي دي كدة، أهو ياخدوا فينا ثواب برضة.

مش عايز حد يشعر بأي نبرة سخرية زي ما السيد/رئيس الوزراء شعر بيها خلال اللقاء الذي نظمته جامعة القاهرة لرئيس الوزراء بمناسبة مئويتها، خالص خالص، دا حتي السيد/ رئيس الوزراء علمنا بما إننا شعب جاهل وهمجي وغوغاء حاجات جميله أوي يا ريت نحفظها كلنا ونرددها وراه ميت مرة "إنت لازم تعرف أن فيه تهديدات بتتعرض لها البلد، ولازم تفرق بين التعبير عن الرأي والاستئذان، وهو شيء آخر". مش مهم يا شعب يا غجر تعرفوا إية إلي بيهددكم، المهم تعرفوا تتكلموا مع سيادكم إزاي. خلوا بالكم إنة أكد وشدد علي "أن رغيف العيش الذي لا يعجب الناس ويقفون من أجله في الطابور ليحصلوا عليه في النهاية، هناك من لا يجده أصلاً" شفتوا الحكم؟؟ واللة إنتوا ما تستاهلوا الرغيف أبو شلن يا كليبه، إنتوا أخركم تلعبوا في الغموس بصوابعكم علشان جهلة. غموس إية، هوا إنتوا لاقيين الغموس علشان تطلبوا عيش يا غجر؟؟ خلي بالكم من "هناك من لا يجده أصلا" دي....... بيتكلم عن شعب مصر الشقيق، فك اللة كربة... إحنا فين وشعب مصر الشقيق فين، داحنا نحمد ربنا ونبوس إيدنا وش وضهر إننا مش زيهم. إخص عليكم إخص، لأ بجد إخص.

في مقالة جميلة عن سيادة اللواء في صحيفة إسمها المصريون، بتتكلم عن بعض تاريخة ومعرفش الكلام دا صح والا غلط، اهو الواحد برضة ياخد ثقافة.

ملاحظاتي بقي عن الموضوع:

1- الشعب المصري دا أمرة غريب، فيها إية واحد عيل مات يعني؟ دول كلهم كانوا طلقتين والا تلاتة ومات، أمال لو قالك فرغوا فية خزنة رشاش كنتوا حتعملوا إية؟؟ مبتحمدوش ربنا أبدا، علشان كدة ربنا واخد منكم النعمة حتي العيش مش لاقينة. ومش عايزين تفهموا، المهم أمن مصر، أمن البني أدمين، أمن مصر، إية مبتفهموش؟؟؟ البني أدمييييييين إلي عايشين في مصر، هوا الواد إلي مات دا كان بني أدم عايش في مصر؟؟ دا حتة عيل عايش في المحلة!! مش عارف مش قادرين تفهموا أنهي حتة بالظبط، الواد والا القتيل والا الأمن والا مصر؟؟!! المهم محدش يقلب نظام الحكم يا كلاب، أمن مصر، في تهديدات بتتعرض ليها البلد (هوا سيادة اللواء قريب رئيس الوزرا والا حاجة؟) ... أقلهالكم 100 مرة؟؟

2- كل واحد ينضرب يموت عايزين تطلعوه شهيد، هيا عافية يعني والا عافية، هوا الحديث الشريف إلي بيحدد الشهداء قال "بلكونة"؟؟ يبقي مش شهيد. رسميا أهو سيادة اللواء (عايزين إية أكبر من كدة) بيقول مش شهيد، دا جايبها من الكنترول حتي وتاعب نفسة.

3- وبعدين خدوا هنا، مش تنهدوا بقي والا إية، عمالين تموتوا في كل حتة كدة وكاسفين الحكومة؟ خلاص بتموتوا علي روحكم مش قادرين تمسكوا نفسكوا!! يحطوكم في عبارات علشان تحجوا تموتوا، يحطوكم في قطارات تموتوا، يسكنوكم جنب مصانع أحدث تكنولوجيا للأسمنت والكيماويات تموتوا، يرشولكم الخضار والفاكهه علشان تكبر وتزهزه وتاكلوا وتربربوا تقوموا تتسرطنوا وتموتوا، يعملولكم معديات في النيل تغرقوها وتموتوا، يعملولكم طرق دائرية حديثة تركبوا عربياتكم وتعملوا حوادث وتموتوا.... إية، مش عارفين تعيشوا خلاص، زهقتوا من الدنيا؟ طب علي الأقل متكسفوش الحكومة أدام العالم يا غجر.

4- بعد كل الكلام دا جايين تتكلموا عن قتيل المحلة، لأ وعايزين تحاسبوا الحكومة وتحاسبوا المسؤول كمان!!! إتقوا ربنا بقي يا ظلمة، المسؤولين دول عندهم عيال عايزين يربوها. وإلي زاد وغطي الطالب قليل الأدب إلي في كلامة مع رئيس الوزراء نبرة سخريه. كمان شعب مش متربي؟

5- أحيي سيادة اللواء علي هذا الكلام الأسطوري ومن قبله السيد/رئيس مجلس الوزراء، وأطالب سيادة رئيس الجمهورية بتقليدهم أرفع أوسمة الذكاء، لأنة بصراحة سيادة اللواء جاب من الأخر ومقعدش يزوق كلامة علشان يرضي قلة منحرفة من الشعب المصري والسيد/ رئيس الوزراء أثبت انه ملوش دعوة بشعب مصر الشقيق. عفارم علي رئاسة الوزراء وعلي رئيس لجنة الدفاع والأمن القومي، ودايما مصر حتتقدم بينا..... لو ربنا أراد وفضلنا عايشين أكتر من كدة.

مصريون ضد التمييز

تابعت أخبار المؤتمر الوطني الأول لمناهضة التمييز الديني، وكان الخبر الأول إلي شفته عن الموضوع دا إن المؤتمر تم إلغائة من نقابة الصحفيين وتم عقدة في مقر حزب التجمع بدلا من النقابة، وبعدين البيان الختامي للمؤتمر، وبعدها خبر عن بكاء نقيب الصحفيين لأحساسة بالإهانة من حجم ومضمون الهجوم علية لموافقتة السابقة علي إستضافة المؤتمر في مقر النقابة وإتهامة بالعمالة والخيانة. أفكاري عن الموضوع كالأتي:

1- القضية الأولي قبل أن أتكلم عن المؤتمر هي هل صحيح ممكن يكون في أي قوة تقدر توقف قرارات نقيب منتخب لأي نقابة، يعني ممكن في نقيب منتخب بالأغلبية بس في ناس تانية عندها عصيان وشوم أكتر فيقدروا يفرضوا رأيهم؟ طب علشان الموضوع واضح، يبقي هل من حق الأخوان المسلمين إلي بيمثلوا نفسهم بس يفرضوا رأيهم علي أي مكان وعلي ناس تانية بأراء تانية مش تبع مكتب الإرشاد؟

طبعا الإجابة مش عايزة مناقشة، مش من حق الإخوان المسلمين يكون ليهم أي رأي في أي حاجة خالص كجماعة، إنما ممكن يكون ليهم حق يقولوا رأيهم كأفراد في حدود الإنتخاب (لو حد إنتخبهم) دا لو كان ليهم رأي أساسا خارج تعليمات المرشد. طيب لو في 80 مليون مصري تقريبا والإخوان أم قاعدة عريضة حجمهم 2 والا 3 مليون مثلا مثلا والباقي مش طايقهم أساسا، يبقي مين إداهم الحق يفرضوا أي رأي. دا غير إن مين إداهم الحق أساسا يتكلموا بإسم الإسلام أصلا، طب مانا مسلم ومش طايق أسمع سيرتهم وبطالبهم بصريح العبارة ميتكلموش بإسم ديني، هوا أنا مش مواطن مصري ممكن أطالب برضوا؟

طب لما تعاطفنا معاهم في الأحكام العسكرية إلي طالت بعضهم كنا غلطانين؟ الظاهر كنا غلطانين والنظام لأول مرة يطلع صح، مش علشان قضية نقابة الصحفيين، دا علشان ما خفي كان أعظم، وما خفي دا مش حنعرفوا أبدا. أنا مش شمتان ولا فرحان من الأحكام العسكرية، بس المشكلة مش في الإحساس المشكلة في سبب الأحكام، وهل هي زي ما جة في جريدة الأهرام بتاريخ 2008/4/19 عن إستقطابات وتمويل خارجي ومحاولات سيطرة علي النقابات والجامعات وشركات تمول أغراض الجماعة؟ إية البلاوي دي؟ لأ ستوب بأه، حد يقولنا الحقيقة يا حلوين، عايزين سجل كامل علشان نحسبن عليهم إحنا كمان زي ما هما دايرين يحسبنوا علي إلي رايح وإلي جاي وإلي مش معاهم يبقي عليهم.

طيب في قضية نقابة الصحفيين، فين الحكومة والأمن وليه ناموا عن حماية نقيب منتخب ونقابة رسمية؟

2- إية سبب إستضافة نقابة الصحفيين للمؤتمر؟ إية علاقة النقابة بالتمييز ضد المصريين؟ هل هي علاقة إيجار للقاعة فقط والا هيا محاولة فشلت لإثبات إن النقيب مبيخافش من الإخوان، تحدي يعني؟ أنا شايف مؤتمر زي دا كان يتعمل مثلا في قاعة المؤتمرات، أو يأجروا قاعة في فندق، مش عارف إية دخل نقابة الصحفيين؟

3- برضوا إية إلي دخل حزب التجمع في الموضوع، الموضوع جة علي هواه والا إيه؟

4- إية معني كلمة "وطني" إلي في إسم المؤتمر دي؟ هل هما بيتكلموا بإسم كل الوطن وكل الإتجاهات؟ أنا محدش إستشارني في الموضوع، ومعتقدش ناس كتيرة من الشعب حد إستشارها، طب "وطني" دي جت منين؟ مبحبش حد يتكلم بإسم وطني ، بالظبط زي مبحبش حد يتكلم بإسم ديني، وميقولوش مؤتمر "مصريين لكل المصريين"، أنا شخصيا لو لسة بيعتبروني مصري معنديش تمييز ديني.

5- البيان الختامي بعد الجلسات والشهادات الحية إفترض المؤتمر إفتراضات لا نعرفها ومتعرضيتش علي الوطن، وأثبت أثباتات تحتاج إلي تحليل من جهات إخري أو علي الأقل دفاع من العارفين بالأمور. فأنا شايف إنه مش ممكن إصدار بيان مدعم بكلام حصل داخل قاعة مغلقة من غير ميتسمع كلام كل الأطراف في "الوطن" طالما إعتبروا نفسهم "مؤتمر وطني".

6- في بداية البيان، إلي إتفق علية المشاركين شيء بديهي ومتفق علية كل المصريين من غير ميعملوا مؤتمر، حرية الإعتقاد ونبذ الإستعلاء الديني والتمييز علي أساس الدين والمواطنة وسيادة القانون. كلام بديهي وأساسي وماشيين علية كلنا مسلمين ومسيحين طول عمرنا، إية إلي حصل وغير البلد؟

7- بعد ما إتفق المشاركون علي الأساس البديهي، جه دور الإستخلاصات:

أ - إتفق المشاركون علي إن مادة "الإسلام دين الدولة، ومبادئ الشريعة الإسلامية المصدر الرئيسي للتشريع" في الدستور هي المسئولة عن التمييز بين المصريين دينيا ..... "وقد تزايد استناد المحكمة الإدارية العليا إلى مثل هذه الفتاوى في أحكامها مؤخرا لتقنين انتهاك حقوق غير المسلمين سواء فيما عرف إعلاميا بقضايا "العائدين للمسيحية" أو في قضايا "البهائيين" وغيرها". يا سلام، طب عايزين مصدر التشريع في دولة إسلامية يبقي إية؟ تعليمات بوذا مثلا؟ طب مصدر التشريع في أمريكا وفرنسا وإنجلترا إية؟ القرأن؟ يعني لو أنا مسلم فرنساوي ممكن يتطبق عليا قوانين الوراثة الإسلامية والا قانون الوراثة المسيحية؟ ولو أنا مسلم أمريكي ممكن أتجوز إتنين ولا حيسجنوني علشان قوانين البلد المستمدة من الشريعة المسيحية مبتسمحش بكدة؟

وبعدين مين قال إن حقوق الإنسان إنتهكت في قضية العائدين للمسيحية؟ مش دول برضة إلي أسلموا علشان ينفذوا أغراض زي الطلاق وبعدين رجعوا تاني؟ حد قالهم متسلموش والا مترجعوش؟ بس بين المسيحية والإسلام وبعدين المسيحية مرة تانية ممكن تكون ترتبت أثار قانونية تحتاج لإثبات إن الشخص غير ديانتة؟ طب عايز أسأل، هما المسيحيين في مصر بيتطبق عليهم معظم قوانين الأحوال الشخصية والا هما بيطبقوا قوانينهم الدينية الخاصة؟

أما قضية البهائيين فأنا شايف إنهم خدوا أكتر مما يستحقوا، محدش إعترض عليهم وعلي عبادتهم، براحتهم بس في بيوتهم، وبدليل إن في ناس في المؤتمر معروفين وأعلنوا إنهم بهائيين، مجوش المؤتمر مستخبيين في عربية رش ولا مسحولين من الأمن ولا الشعب المصري كان ماشي وراهم وبيقول "العبيط اهو".... عادي خالص بيتكلموا وبيعبروا. أه أغلبية الشعب المصري مش عايزينهم ولا عايزين يشوفوا وشهم بس تفتكروا القوانين والمؤتمرات حتغير إلي في نفسنا، طب حتي إسألوا المسيحيين عن رأيهم في البهائيين كدة لو بيعترفوا بيهم! بس أهو بنعاملهم كمواطنين مصريين وليهم حرية الإعتقاد.

ب- أنا موافق طبعا علي تعديلات إنشاء وإصلاح الكنائس وإعادة النظر في القوانين المنظمة للموضوع دا.

ج- "لا يوجد تشريع يجرم التمييز الديني مما يشجع على التمييز الديني كما حدث في حالة الدكتورة ميرا رؤوف التي كان حرمانها من التعيين في كلية طب المنيا حالة صارخة من حالات التمييز الديني". طبعا أنا معرفش حالة الدكتورة دي بالذات، بس يعني إلي رفض التعيين قالها مثلا "أسفين مش حنعينك علشان إنت مسيحية" ؟ ..... مش معقولة طبعا ولا أصدق. طب تقولوا إية في الـ 6000 حالة لعدم تعيين مسلمين في نفس الوظيفة وفي كل الوظائف علشان محجوزة لناس من الصفوة المختارة، دا مبقاش تمييز ديني، دا بقي تمييز طبقي. شكلك كدة يا مرسي حتعمل مؤتمر وطني تاني للتمييز الطبقي.

د- موافق علي إلغاء النصوص الدينية من مقررات اللغة العربية، بس مش موافق إن النظام التعليمي هو المسئول عن إهتمام الشباب بالمظاهر دون الجوهر.... المفروض إننا نطور التعليم الديني في المدارس، مش علشان نلغي الحاجات إلي سيادنا مش عايزنها، لأ علشان نضيف الحاجات الأصيلة في الأديان (مسلمة ومسيحية) ونخليهم يفهموا سماحة الأديان بعيد عن التطرف، ونقوي تعلق أطفالنا بالأديان كأساس لتفكيرهم بطريقة صحيحة. والا حضرات المجتمعين في المؤتمر عايزين نلغي التعليم الديني في المدارس لأن مالهوش لازمة؟ والا نحذف الأيات الإسلامية الإرهابية من تعليم أولادنا علشان بتعارض التطور وبتشجع التمييز؟

ه- حكاية السياسة الممنهجة إلي بتمارسها الدولة في التعيين دي كوميدية شوية، يعني إية الأرقام المنشورة عن الوظائف العامة؟ تعداد المسلمين والمسيحيين في الوظائف؟ مش دا برضة تمييز إنكم تطالبوا بزيادة الوظائف للمسيحيين علي حساب المسلمين؟ علشان ترضوا عايزين النسبة كام يعني؟ هو في وقائع محددة عن التمييز دا يعني واحد مسيحي مخدش وظيفة علشان قالولو عايز مسلم هنا؟ والا إستنادا للأرقام بس؟ طب مش في مسلمين أكتر في البلد وطبيعي إنهم يكونوا أكتر في الوظائف؟ طب والبهائيين مالهومش نسبة هما كمان في الوظائف والا إية؟ مش هوا دا التمييز إلي إنتو بتحاربوة؟

و- بالنسبة للإعلام، حد عمرة شاف تصريح رسمي والا مقالة في جريدة والا برنامج في التليفزيون بيشجعوا علي كراهية المسيحيين وبيتهمهم بالكفر؟ وإشاعة مناخ هستيري كمان؟؟ إنتوا بتتكلموا عن مصر أكيد بجد؟ دانا شايف العكس بجد إن الدولة بتشجع علي كراهية المسلمين، أمال القناة المسيحية إلي كانت شغالة طحن في الدين الإسلامي وبتتذاع من قمر مملوك للدولة دي تبقي إية؟؟ وحتي المسئول عن القناة مراحش ورا الشمس!!

ز- إذا كانت مصلحتكم حماية الوطن من الإنقسام أرجوكم إبعتوا الرسالة دي للعالم إلي مش عاجبوا حالنا:

"اللة يخليكوا سيبونا في حالنا، طول عمرنا مسلمين ومسيحيين عايشين مع بعض مفيش حاجة مضايقانا ومحدش إشتكالكوا وإحنا بنعرف نحل مشاكلنا بنفسنا. مش عايزين حد يقسمنا وينظمنا علي مزاجة، كفاية بلد زي العراق إتخربت علشان دخل ناس تانية فيهم وكانوا عايشين كويس أوي قبل كدة"

وانا عن نفسي، مؤمن جدا إن المؤتمر دا إلي تحت شعار "الوطني" هو إمتداد لمؤتمرات أقباط المهبط إلي محملين بأجندات تانية مش مصرية ومش قبطية كمان ونفسها تشوف مصر بتتحرق في صراعات داخلية وتقسيمات إقليمية مش عايزينها ورافضينها أساسا. كفاية خيبة، كانوا حلوها عندهم الأول، ما كل بلد فيها مشكلتة إلي بيحلها، بس مش ناقص الصوابع الخفية تيجي تلعب.

المؤتمر الجاي إعملوة في طوكيو وحياة اغلي حاجة عندكم.

الحقيقة وإجابات المسئولين

أثارت مواجهات مصنع الأسمدة النيتروجينية في دمياط عدة أسئلة في نفسي تتعلق بمدي مصداقية ردود المسئولين والمحافظين والوزراء، وكذلك عن مدي قابلية الشائعات معززة بالصحافة في تحريك الشارع المصري.

1- نشرت جريدة المصري اليوم علي مدي الأيام الماضية وقائع إعتراض المواطنين في محيط المنطقة الحرة في دمياط وجميع المناطق القريبة منها من مصايف وقري ومدن، وأخرها هذة المقالة اليوم، والتي تعبر عن الخوف الطبيعي من التلوث والتسمم. إنما ما أثار إهتمامي هو أن أغلب المواطنين "سمعوا" عن الأثار السلبة لمصنع أجريوم ولكن لم يعرفوا ممن سمعوا ولا من قال هذا الكلام، هل هو صحيح أم خطأ. وكذلك يبدو أنهم لم يسمعوا عن المصانع الأخري المماثلة التي تعمل فعليا في المنطقي ولم تثير إعتراضات سابقا. فمن هو هذا الذي أثار الموضوع خصيصا لمصنع أجريوم؟

2- نشرت الجريده علي صفحة أخري اليوم لقاء مع المدير التنفيذي الكندي لشركة أجريوم مصر، وهو بالطبع ممثل لأصحاب رأس المال الذين يهمهم تنفيذ المشروع، وبدون القوانين المناسبة والرقابة المستمرة لن يهمهم صحة شعب دمياط ولا الشعب المصري كلة. أرجع سبب تفجر الخلاف إلي أصحاب المصالح والمحافظ الذين يريدون أرض المشروع مع أنهم حصلوا علي موافقات المشروع من الجهات المختصة. وطبعا أخذ يعدد نسب أمان المشروع وأنه مقام بتكنولوجبا غير مسبوقة في الأمان البيئي، وأن الشركة متميزة في التعاون مع المجتمع المحيط بمصانعها.

3- لم تحدث حسب علمي أي دراسة جادة سواء مع أو ضد المشروع، وحتي لو حدثت فماذا عن المصانع الأخري؟ وإذا كانت المصانع الأخري أقل جدية في الأمان البيئي فمن هو صاحب المصلحة في حدوت هذا الصخب حول مصنع واحد فقط وما هي مصلحتة؟

4- إذا كانت الحكومة واثقة من دراسات الأمان البيئي لهذا المصنع فلماذا لا تنشرها واضحة صريحة؟؟ ولماذا لا تفضح الحكومة أصحاب المصالح وتفضح أغراضهم؟ هذا إن كانت تعلم من هم، فإذا كانت لا تعلم فالمصيبة أكبر. هل من مصلحة الحكومة ترك المواطنين صرعي للشائعات والأقاويل فلا تنفيها أو تأكدها؟؟ هل من مصلحة الحكومة ترك الأمور للشائعات حتي قد يقرر المواطنين أحداث مثلما حدث في المحلة دفاعا عن حياتهم ومستقبل أولادهم؟

5- هل أزمة الثقة بين الشعب والحكومة بهذة الحدة التي بات معها ثقة الناس في الشائعات اكبر بكثير جدا من ثقتها في كلام المسئولين؟

6- يقودنا هذا إلي نفس أزمة الثقة بين الشعب والحكومة حول أبراج المحمول، فالمواطنين لا يثقون أن هذة الأبراج لو بنيت حسب معدلات الأمان العالمية لن تؤذيهم، ولأن الشعب واثق أنة لا يوجد رقابة أو تفتيش من الحكومة، وكذلك لخراب ذمم موظفين حكوميين كثيرين لمصالحهم الشخصيه، فالشعب لا يثق فيما تقولة الحكومة، ووصل الأمر إلي تصادم بالأسلحة بين أهالي بعض القري ورجال الأمن الذين رافقوا مهندسين أحد الشركات أثناء قيامهم بتركيب برج للمحمول بالقرية.

7- السؤال الأخير الأخطر: هل بات الوضع العام في مصر هو أن يأخذ الشعب حقوقة بيدة وبالفوضي؟ إذا أرادوا زيادة مرتب أو علاوة فالإضراب والإعتصام سبيلهم، وإذا لزم الأمر فمواجهة الأمن منفذهم إلي طلبهم، بدليل الشهر مكافأة ووعد زيادة الأجور في المحلة. ألا يدل هذا علي ضعف الحكومة الشديد ونمو ظاهرة "أخد حقي بإيدي"، والحكومة تتاطي أكثر، ألا يجدر بالحكومة أن تبادر إلي مناطق التوتر فتعطي حلول واقعية بلا مسكنات، وتدحض الشائعات و توضح المواقف وتكشف المستور قبل ان يتفجر الغليان؟؟

مدونة المتنطعون الأقباط تالت مرة

الحقيقة أنا مكسوف من إخواتي وأصحابي والمدونين المصريين المسيحيين المحترمين جدا لما بتكلم في الموضوع دا، بس أنا مقصدش أي حاجة عن الدين المسيحي إطلاقا، إنما أنا بتكلم عن مدونة واحدة بس، المخلوق الغير محدد الصنف إلي بيكتب هناك ملوش دعوة بالأقباط نهائيا ومهواش قبطي ولا مصري أساسا.

مدونة "المتنطعون الأقباط" مدونة ظريفة خالص خالص بجد، شايف إلي بيقولوا وبيفهموا من كلام الناس علي قد مخة وأهدافة وطايح مع نفسة..... وحتي 99% من المعلقين عندة وهميين أنونيمس وغير معروفين ومعندهمش مدونات الواحد يقدر يعرف ارائهم ويناقشهم فيها. يطلعلك واحد أنونيمس يقولك "ولا تزعل نفسك يا جون، أنا رديت علية بإسم الصليب" يقوم جون يرد علية "نورت يا سبع البحر وباركت فيك السماء" ....... تحس إنك بتتفرج علي فيلم صلاح الدين الأيوبي ههههههههااااااااا، طبعا انا شاكك أساسا إنة هوا إلي بيغني وبيرد علي نفسة، وعلشان يحبكها يجيب كام تعليق أنونيمس غير معروف برضة يشتم فية بإسم الإسلام، آل يعني في صراع بين المسلمين والمسيحيين وبيكرهوا بعض وكدا.

لما في مدون مكرس نفسة يألف حاجات عن الأسلام وبعدين مش بس بيألف لأ دا بيرد علي نفسة كمان، يبقي عندة شيزوفرينيا ولازم يتعالج.... بس علاجة بسيط جدا: شربت ملح مركزة (6 كيلو ملح علي لتر زيت طبيخ من أبو 12 جنية علي 1 لتر مية) وحيبقي كويس خالص، ويعدي عليا كمان إسبوع أظبطلوا فتحة الشرج. يا شاطر لو صحيح همك علي دينك كنت عملت مدونة بتشرح فيها سمو الدين المسيحي وتسامحة وأفكارة، وتدعوا لأعتناق المسيحية، حقك...... إنما تعمل مدونة من أول حرف لأخر حرف شتيمة في دين تاني وتضرب أسافين بين الناس يبقي غرضك واضح ومعروف ومش حتلاقي حد يشتري بضاعتك، خسرانة وحتفضل عندك في دماغك الخربانة بس إنت وإلي وراك.

كلمت ناس مسيحيين أعرفهم وكلهم أجمعوا إنهم ولا موافقين علي الكلام الفارغ دا ولا ليهم دعوة أصلا بالسخافة والتطرف دا، وصديق منهم أثق جدا في رأية لأننا متربيين مع بعض 46 سنة، لعبنا مع بعض وكلنا مع بعض.... أخويا بالظبط... قالي دا زي التطرف إلي عندكم في الأسلام، ولا هما بيعبروا عن أرائنا ولا هما مننا أصلا وكلهم غرضهم معروف وبيتبعوا سياسة إلي بيدفعلهم. طبعا عندنا في الكنيسة ممكن تلاقي أراء بعضها متطرف شوية للدفاع عن الدين المسيحي وبعضها متطرف جدا لأبعد من كدة ولأغراض لا تخفي عن العقلاء، بالظبط زي كلام المدونة الهايفة دي، بس تفتكر حد بيسمع لهم أصلا؟؟ الأفكار دي صهيونية أساسا وإلي عايز يقولها يقولها لنفسة، محدش حيسمعله.

إلي عايز يتنصر يتنصر براحتة، هوا حر وبمزاجة ومحدش له دعوة بيه، بس المنطق والقانون بقولوا مش لازم يعمل هلولة وزيطة ومزيكا وإلحقوا بيضربوني، إلحقوا معلقيني في الفلكة والكلام إلي كلنا فاهمين قصدوا دا...... بصراحة أنا أول واحد حعلقه في الفلكة، مش علشان غير دينة، لأ علشان أول مغير دينة وعلشان يثبت ولائة للدين الجديد قام فاتح علي الرابع شتيمة في الدين القديم، كدة بقي بطل ومضحي ويا عيني لو حد لمسة علشان بيشتم يبقي غلطان، اصلة حر يشتم في إلي هوا عايزة...... لأ يا حبيبي كدة بقيت رد سجون ولازم تتعلق في الفلكة.

أما بقي عن تاريخ مصر، إلي بيحاول يقنع نفسة بية، أصلة يا حرام مش لاقي حد يقرالة، التاريخ دا يا شاطر طويل أوي ولو كل واحد قالك البلد دي بتاعتي حتتقسم وكل واحد ياخد 2 متر، يعني لو العائلات العريقة يلاقوا أصلهم من البدو العرب، تلاقي عائلات تانية كان أصلهم مسيحيين أسلموا، وتلاقي ناس مسيحيين نتجوا عن تزاوج الرومان بيهم، وتلاقي عائلات تانية عن تزاوج عساكر الحملة الفرنسية بيهم. وهوا يعني كانت مصر قبل الإسلام 100% مسيحيين، مكانش في يهود مثلا؟ طب بعد مدخلها المسلمين مأسلمش منهم مش حقولك مائة ألف، نقول ألف الفين تلاتة مثلا؟؟ إحسبها إنت ممكن يكون في كام مسلم دلوقتي كان اصلهم مسيحي زمان، دول فين حقهم يا راجل؟ والا طالما مش تبع أفكارك التعبانة (إلي ملهاش دعوة بأي دين) بقوا مش مصريين؟

أنا عايز أقول حاجة كمان، أنا معايا تفويض من مسيحيين إني أقولك بصريح العبارة" محدش في مصرعايزك إنت ومايكل منير والزبالة إلي شكلكم"، تخيل محدش من أقباط مصر نفسه يشوف وشكم ولا يعرف رأيكم لأنكم نكره تماما؟ وأنا شخصيا حعرض موقفك ومدونتك علي قداسة الأنبا شنودة وعايز أعرف رأية في الكلام دا لو موافق علية والا لأ.... أأأأه أنا ممكن اوصل كلامك لقداستة وإلي يقول عليه يمشي علي عيني وراسي.

إنت ياد محصلتش الكلاب إلي أنا مربيها وكلامك مجابش هوهوتهم حتي، دول أشرف وأطهر منك في كل حاجة علي الأقل مبيغلطوش في حد، وعارف كمان، إنت ولا مسيحي ولا حاجة أساسا والناس كلها عارفة الكلام دا، متلاقيش أي مسلم أو مسيحي عايز يعلق علي كلامك في مدونتك لأنك اقل من إن حد يضيع وقت في تفاهتك، كل المسيحيين متبريين منك ومش عايزين يعلقوا عندك، طب ما في يجي 20 مدونة أعرفهم محترمين جدا أصحابها مسيحيين، شوفت حد أيدك في كلامك، دا إنت بتنعر وبترد علي نفسك، مش لاقيلك أرضية ولا بلد تلمك أصلا.... خلي بلجيكا تنفعك بقي..... دا إنت صهيوني إبن صهيوني وسخ.

وعلي فكرة، أنا حلغي أي تعليق منك أو من أوساخك هنا، لأن مالكومش أي شرعية في أي حته، ومحدش عايز يسمع أي كلمة منك ومن وساختك، فيالا يا عم أهو لقيت موضوع جديد تنعر علية في مدونتك، وحترد علي نفسك كمان، يالا يا عم محدش أدك البيضة حتنزل من طيزك الحمرا.

بس إلا بصحيح، إنتوا بتتكلموا لية بالطريقة بتاعت الأفلام الأبيض وإسود دي، هوا إنتوا بيجلكوا إرسال تاني غيرنا؟؟؟ ولا بيجلكوا إسهال تاني؟؟؟ حلوة حلوة هههههههههاااااااااااا.

==============================

اما بقي عن التعليقات علي المدونات، فأنا أرجو جميع المدونين إنهم ياخدوا بالهم كويس أوي من الي بيخشوا يعلقوا علشان يعملوا بلبلة، مرة يخشوا علي إنهم إخوان مسلمين ومرة يخشوا علي إنهم مسيحيين ومرة يخشوا علي إنهم شيوعيين ومرة علي إنهم أمن دولة .... وكدة، كل مرة حسب الرأي المكتوب في المدونة، والغرض هو عمل بلبة لصاحب المدونة والقراء ودفعهم إنهم يهاجموا أكتر أو يتنرفزوا ويشتموا مثلا. المدون الأصيل صاحب الرأي مهما كان الرأي دا مش ممكن يعلق أنونيمس أو غير معروف، ومش ممكن يعلق بأسلوب مستفز لأنة صاحب فكرة هوا مؤمن بيها فممكن يناقشها. أنا أقترح إلغاء التعليقات الأنونيمس من مدوناتكم، وحذف أي تعليق غير محترم او مبني علي أساس وعدم الرد عليها حتي، لأن الناس الأنونيمس دي مغرضة، والناس إلي بيعلقوا بطريقة غير محترمة ملهومش مكان بينا خالص.

الحاجة عيشة حاتحل مشكلة الزمالك

الخبرين دول قريتهم في المصري اليوم: إعتصام 400 عامل نسيج للمطالبة بمكافاة رفض الإضراب وتصريحات السيدة الوزيرة ، والخبر التاني عن إعتراض لاعبي الزمالك علي مكافأة التأهل لدور الـ 16 في دوري رابطة الأبطال الأفريقية

أولا- وزيرة القوي العاملة والهجرة - (مش عارف إية العلاقة بين العمال والهجرة إلا لو كانت النية يهجروا كل العمال) - السيدة/عائشة عبد الهادي المعروفة بإسم الحاجة/عيشة، بررت تمييزها لعمال النسيج في المحلة بصرف مكافأة شهر وباقي عمال النسيج في مصر 15 يوم فقط، بأن عمال المحلة كانوا مستهدفين بدعوي تحريضية للإضراب ولم يستجيبوا. الخبر عادي خالص ولكن يحمل في طياتة كارثة كبري، ولو إحنا في بلد الوزراء فية بيحترموا نفسهم كانت يا إستقالت يا رئيس الوزراء رماها من الشباك. لية بقي:

1- هيا هنا بتتهم العمال بخيانة مباديء الإضراب إلي شارك فية أهالي المحلة، سواء كان إضراب إيجابي أو إضراب غوغاء، وبقي منظرهم إنهم قبضوا تمن الخيانة، طب حيودوا وشهم فين من ناسهم واهلهم وستاتهم وعيالهم؟

2- دي دعوي صريحة إن كل واحد يعمل إضراب وبعدين ميشتركوش فية ويستنوا شهر مكافأة وتبقي البلد بقت عاملة زي مسلسلات الكوميديا.

3- كل عمال الغزل حيسالوا إشمعني بتوع المحلة، طب إحنا كمان حنعمل إضراب نطالب بحقوقنا بقي طالما الموضوع كدة، بدليل إضراب 400 عامل من مصنع تاني علشان الـ 15 يوم الي فاضلين، وقالوا إنهم مستعدين للإضراب إذا كان دا السبيل للحصول علي حقوقهم (بقت حقوقهم خلاص).

4- الرئيس مبارك أصدر أوامر بتلبية مطالب العاملين، وتوجيهات الرئيس مبارك برفع المعاناه عن محدودي الدخل ..... مش مكسوفة وهيا بتقول الكلام دا بالذمة؟؟ ما حكاية أوامر وتوجيهات الرئيس دي إنتقدت بدل المرة ألف، يعني إنتوا مبتعرفوش تتحركوا غير بتوجيهات؟ أمال رئيس الوزراء دا محطوط يفرس الشعب بس؟ وباقي الوزراء مبيروحوش الحمام من غير توجيهات الرئيس؟

5- لفتت إلي أن تهديدات عمال باقي القطاعات بالإعتصام غير مبررة، لأن ظروف العمال من قطاع لأخر مختلفة وعمال النسيج هم الأقل دخلا في مصر .... رصاصتين رحمة للحاجة عيشة والنبي..... بقي يا حاجة عارفة إن عمال النسيج الأقل دخلا في مصر وساكتة كل دا لحد ما الوضع إنفجر؟؟ كنتي مستنية توجيهات الرئيس علشان تحليها؟ طب عارفة إية كمان ومخبياااااااة؟؟ قولي وأنا مش حقول لحد.

أنا أقترح يوقفوا الحاجة عيشة أدام مكن الغزل ويدوها 400 جنية في الشهر (مع شهر مكافأة برضوا) عقابا لها علي هذة التصريحات.

ثانيا - بشوات الزمالك معترضين علي صرف 6500 جنية (لكل واحد مش للفريق كلة) مكافأة فوز لماتشين تلاتة ..... والا أربعة.

1- إلي مش واخد بالة، الخبر دا لية علاقة وثيقة بالخبر السابق. كلة بيعترض، تديلة 15 يوم تديلة شهر تديلة 6500 جنية، إعتراض، الفكرة حلوة وبتجيب نتيجة الظاهر.

2- مع إحترامي لمحترفي كرة القدم، ومع إستمتاعي بكاس الأمم الأفريقية الماضي...... في بلد زي مصر هل معقول لاعبيين لعبوا شوية ماتشات ومساهمتهم المباشرة في تنمية الإقتصاد والدخل القومي تكاد تكون معدومة، تلاقي مرتباتهم أو مكافاتهم أو أي حاجة تقترب من الملايين وناس بردوا شغالة (بإفتراض إنهم شغالين بذمة) و (المفروض برضوا يكون مساهمتهم في تنمية الإقتصاد والدخل القومي عالية) ومرتباتهم تقترب من الملاليم؟ يعني حتة مكافاة للاعب واحد بس في فريق علي وصول الفريق لدور واحد بس (وبالعافية) = 16 شهر مرتب عامل في المحلة!!

3- إستكمالا للنقطة رقم 2، هل صحيح ليس هناك حل سهل لتشوهات الأجور في مصر؟ بجد الكلام دا؟ لو قلتوا صحيح يبقي روحوا بجد وهاتوا حد بيفهم يحلها، بس حد عايز يفكر مش يستني رئيس الجمهورية يفكرلة.

5- في القطاع خاص، والعمال هناك مبيشتكوش أوي، لو الأجور بالألوف كل شهر هما حرين، بيدفعوا من جيوبهم.... إنما لما تلاقي موظفين في الحكومة مبيعرفوش أصلا هما شغالين فين وتلاقيها بالألاف (20 و 30 وساعات بتعدي المية والمتين ألف) بينما الشركات دي خسرانة وإحنا إلي بندفع ضرايب بتمول الكلام دا، وفي الأخر تلاقي الوزيرة عندها خبر إن العمال اجورهم ضعيفة وساكتة هيا وغيرها، يبقي دا كلام فارغ ولازم حساب سريع. لما تلاقي نوادي عامة بتغرف من الميزانية ملايين والناس جعانة ومرتباتها يدوبك تركبها مواصلات للشغل رايح جاي بس، يبقي إلي مش واخد بالة يلبس نضارة ويقعد في البيت بالجلبية يأور كوسة.

4- يا تري يا هل تري حايجي يوم نلاقي السيدة الوزيرة بتحاور لاعبي كرة القدم لفض إعتصامهم إعتراضا علي صرف مليون جنية فقط لكل لاعب مكافأة فوز؟