إحســـــــــــــــــــــــان فى الميــــــــــــــــــــــــــدان

أنا علمي لما اتركن ... جه التراب غطاه
قلت وماله أغسله .. يرجع في عز زهاه
وإيه يعني لو مارجعش ... أجيب واحد جديد في حلاه
وياسلام لو لقيت أكبر .. هو يعني كان بكام شريناه
*****
آدي العلم حلينا قصته .. أكيد في الميدان هلقاه
المهم بعد السنه .. أول سنه .. ايه تاني راح نلقاه ؟
ياترى هلاقي عسكري الجيش الأسمراني إياه ؟
ولو قابلته هسلم عليه واشكره واتصور معاه ؟
زي ماكنا من سنه .. ولا فـ سنه إتغيرت الحياه ؟
*****
الشعب اللي باهى العالم بثورته .. وبوحدته .. بقى ميت إتجاه
شعب كان عارف خطته .. حاسب خطوته .. دلوقتي تاه
القلب اللي كان صافي ونقي مين حجَره مين قسَاه ؟
والشاب اللي كان شايل على كتافه القضيه مين نسَاه ؟
*****
نام وغمض .. إحلم بشهدا بيحلفوك .. كمِل اللي بديناه
إوعي تنسى يابن بلدي وسط زحمة يومك .. اللي قدمناه
سني كان قد سنك .. كان ممكن أعيش عمري زيك .. بس لا
لجل مصر ماتبقى أحلى .. وانت فيها تعيش وتعلا .. خلعناه
*****
نفسي نرجع تاني في الميدان .. المسيحي يقسم مع المسلم غداه
ومنقبه بتوزع ع المحجبه .. واللي ناكشه شعرها .. قزايز المياه
مش غريب على ناس جدودهم .. هما اللي أمنولنا القناه
إفتكروا جيش العدوان الثلاثي .. مين أدبه .. مين خلاه
يهرب يفارق أرضنا .. غير شعبنا .. وطبعا الجيش كان معاه
أطفال بطوب .. رجال بشوم .. ستات بتضرب بالحلل رؤوس العداه
ولما مر الجيش بنكسه .. مين أيده .. مين قواه ؟
قلب الهزيمة لنصر أكبر .. حطم الأسطوره بخراطيم المياه
*****
المستحيل والغير طبيعي .. لما كنا إيد بإيد .. حققناه
دلوقتي شايف يابن بلدي .. قد إيه السهل صعَبناه ؟
ده طابور لعيش وده بنزين .. وللأنابيب ماتعرف منتهاه
ده جاي يخرَب .. وده جاي يحرق .. تراث جدودنا اللي ورثناه
تاريخ شعوب .. ميراث حضاره .. في ساعتين تلاته ضيعناه
*****
واتقسمنا .. حسب دياناتنا .. ونسينا إن الدين لله
يوم ما كانت إيدنا واحده .. وقعنا الظالم والطغاه
بأيادي نظيفه وسلميه .. ممدوده مرفوعه لسماه
تدعي وتقول يارب .. الشعب ده سدد خطاه
لا فينا خاين ولا فينا .. حد ممشينا على هواه
طالبين العيش مع الحريه .. ويا العدل مع رحماه
بقى بالذمه ده يبقى كتير .. ع اللي ضحى في عز صباه ؟
*****
ألف شهيد .. ألفين جريح .. ولسه بيزيدوا ياولداه
ده فقد عينيه .. وده فقد حياته .. وفي الزباله كان مثواه
عروا لحمي .. هتكوا عرضي .. بالبياده فوق صدر فتاه
يا أرض دول كانوا خير جندك .. زي ما قالنا مصطفاه
إتغيروا .. إتبدلوا .. ولا يمكن إتحولوا مجرد أداه
ولا جايز بيقلدوا أصحابهم المغاوير في حمص وحماه
ياجند عودوا لرشدكم .. دي أرضكم .. والأرض عرض نموت فداه

أبنـــــــــــــــــــــاء وقتــــــــــــــــــــــــــله

انا مش هقولكم انتم وحشتونى اد ايه ولا فراقكم صعب اد ايه

امال دى عشرة سنين ومدونات وتبرعات وبؤجات ......عموما

ابقوا اوزنوا انتم بقى الوحشة وابقوا ابعتولى حته

عندى واحدة جارتى عندها طفلتين

ملهمش حل اخر حلاوة وجمال وأدب عيال من الاخر

ملهاش مثيل والحمد لله انهم ملهمش مثيل
والا كانت العائلات المصرية انقرضت من زمان

المهم جارتى المدعوة كل شوية تخبط عليا بمصيبة

واليكم بيان ببعض المصائب التى لا تذكر

الجارة: الحقينى .....الحقينى يا شفقة

شفقة: مالك يا ام نسمة فيه ايه؟

الجارة : خرجت اشترى طلبات البيت رجعت لقيت نسمة واختها نايمين
والعصافير مش موجودة

ودول كانوا غالين عليا اوى اهىء اهىء اهىء
شفقة: يمكن خرجوا يشموا شوية هواء وراجعين علطول
الجارة: هواء هواء ايه بقى دول ماتوا يا شفقة اهىء اهىء
اظاهر ان البنات اغتالوهم لسبب غير معروف
شفقة: اغتالوهم يا لهوى ليه هما عصابة حمادة وتوتو ولا ايه
الجارة: المشكلة انهم كانوا غاليين عليا اوى يا شفقة

ده باباهم كان مهادينى بيهم قبل ما يساقرفى عيد جوازنا

طيب لما يرجع اقوله ايه؟؟

شفقة : ها تقوليله ايه .... قوليله ولادك مقصايف الرقبة القتلة موتوهم

وقال عيد جوازكم قال لا خير خير

فأل حلو يا ام عواصف ان شاء الله

بس قوليلى موتوهم ازاى ريا وسكينه؟؟

الجارة: ريا مين وسكينة مين بقولك نسمة وهادية

شفقة: وماله مهم احفاد ريا وسكينه بس اسماء على الموضة

يعنى سيبتى الجريمة والقتلة وماسكة فى اسمائهم يلا خلينا فى موضوعنا

الجارة: انا رجعت من بره ملقتهمش

اسأل البنات يقولولى والبراءة فى اعينهم

اصلهم كانوا محبوسين واحنا قلنا نخرجهم يتفسحوا معانا فى الشقة شوية قمنا

لقيناهم بيتشاقوا شوية وعايزين يطيروا يهربوا مننا رحنا

مسكناهم يا مامى وخنقناهم من رقبتهم لحد ما غمضوا عيناهم وقعدنا ننتف

ريشهم ريشة ريشة

وبعدين لحد ما بقوا عريانين فقلنا عيب بقى نقعدهم معانا ليتمسكوا أداب

فرميناواحد من البلكونة ولقينا التانى لسه فيه الروح وبيغمض

ويفتح روحنا حطينه فى البانيو

وفتحنا عليه ميه سخنة علشان نفوقه وما فاقش

حاولنا ننقذه بس مات وربنا ما اردش

احنا عملنا كل جهدنا علشان

نسعفه بس قدر ربنا نفذ

هتعترضى يا مامى

شفتى العيال اد ايه حنينين يا شفقة؟؟

شفقة: يا سنة سوخة يا ولاد سلقوا واحد

وحدفوا التانى وكده حنينين؟؟ امال لو سفاحين

كانوا عملوا ايه؟؟

كانوا مسكوا مطاوى وطلعوا دبحوا فى سكان العمارة

بركة ياختى ان الراجل سافر

ده ربنا بيحبه

وابقى قابلينى لو رجع تانى

شفقة : عموما افتكرلهم الرحمة و اقرلهم الفاتحة

واحمدى ربنا ان رحمهم هو احن عليهم

من ولادك

الجارة : ايه بتقولى ايه يا شفقة تقصدى ايه؟؟

دانا ولادى ملايكة نازلين من السما بقولك

حاولوا ينقذوهم بس قدر ربنا بقى

شفقة : ملايكة امال الشياطين يبقى شكلهم ايه؟؟

عموما ربنا يرحمهم ويبشبش الطوبة اللى تحت رأسهم

"المــــــــوقف التانى"

الجارة: شفقة عايزة اطلب منك خدمة وخايفة تقوليلى لا

شفقة:خدمة طيب اتصلى ب55 اسعاف.... خدمة ايه ربنا يستر

الجارة: البنات مش عارفة اوديهم فين وانا عندى مشوار ضرورى

ومينفعش يخرجوا معايا

انتى عارفة اد ايه انا بحبك ومستأمنش حد عليهم غيرك ابدا

وهما كمان بيموتوا فيكى

طبعا مش هقولك اد ايه

هما طيوبين وشاطرين

وبيسمعوا الكلام

شفق: وانتى هتقوليلى على عاصفة وكارثة

دول مصايب ااقصد حبايب طنط شفقة

الجارة:عاصفة وكارثة مين؟؟

انا بكلمك على نسمة وهادية بناتى

شفقة: اه..... اه منا عارفة امال غزل البناتى

هاهاها لا ما تخافيش عليهم هاتيهم وانا هربيهم

ومكنتش اعرف انى انا اللى هتربى

واول ما جبتهم وبصولى طلعولى لسانهم

قرصتهم وقلتلهم حبايبى

وروح قلب طنط

بس والنبى يا شيخة ما تغيبى لحسن عندى المرارة وخايفة ترجعى ما تلاقنيش

وتفرحى احسان فيا وتحققيله حلم حياته فى الجواز تانى" الحلم العربى"

اللى بيتمناه

الجارة : نص ساعة ومش هتاخر يلا يا حبايبى اسمعوا كلام

طنط شفقة لحد لما اجى وهى هتاكلكم وهتجبلكم لعب وبومبونى وشيكولاته

وبمجرد دخولهم الشقة وفى اقل من ثانية

لقيت الشقة بتنهار وانقلبت راسا على عقب على دولابا على كتبا على مطبخا

كل شى بقى عبارة عن شوية حاجات صغننة فوق بعض

والست عاصفة تصرخ وتقولى جعانة عايزة اندومى يا تنت

وبمجرد ما عملت الاندومى تحول بقدرة قادر الى لبخة ملبخة

وابلة كارثة بقى جريت على اوضتى

وقعدت تطلع كل هدومى وشوزاتى

وتختارى منها اللى يعجبها

على اساس اننا فى كى جى تو مع بعض

وقعدت تكسر فى علبة مكياجى وتحط احمر واخضر

لما بقت شبه البلايتشو

اما الست عاصفة ام زعابيب اللى ربنا يقتص منها قادر يا كريم دخلت المطبخ قال

ايه بتغسل المواعين وعايزة تساعدنى

وشوية لقيت طخ طيخ طاخ طراخ

وكأن قوات الدفاع المدنى فى بيتى

المطبخ كله بينهار ولا اللى قام فيه زلزال تسونامى

وشوية دخلت كارثة الاوضة ومسكت تليفونى قال ايه بتكلم صاحبتها المزغودة

ولما صرخت و زعقتلها رمت

الموبايل الله يرحمه فى كوبايه الميه

رحمة الله عليه

وتقولى اصله كان عطشان يا تنت

هو انتى مش بتشربيه؟؟

قعدت اصرخ واجرى وراء دى حبة

وحبة وراء دى لحد ما اتلمت عاصفة على كارثة وقرروا يتفقوا عليا

ودخلوا الحمام وقعدوا يرشوا ميه على السيراميك

قال ايه عايزين يعملوا فسين ولاد

المضايقة يبلبطوا فيه

وبالمرة يزحلقونى عليه

قمت وقعت انا فيه وعضمى اتفشفش

وهما يضحكوا ويقولوا مش

كنتى تاخدى بالك يا تنت

وشوية وجت مامتهم واول ما شافتهم هاتك يا بوس ويا احضان

ولا اللى كانت مسافرة

السد العالى

وتبص لى وتقولى

مش بقولك ولادى ارق منهم مفيش

وأأدب من اخلاقهم ما تلاقيش

شفقة: انا بصتلها بكل غيظ وصرخت ربنا على المفترى قادر يا كريم

ياخد اللى فى بالى قولوا امين

"الموقف التالت"

الجارة: بقولك ايه يا شفقة ايه رايك نخرج نتمشى شوية وبالمره

اعمل شوبنج

اصل بينى وبينك ما بعرفش ابص على اى لبس الا لما يكون حد معايا

علشان يمسك البنات

شفقة: يمسك والنبى دول عايزين عسكرى وقسم شرطة بحاله

يمسكهم مش انا

عموما اجى معاكى يمكن اعرف اتوههم

ورحنا رايحين على سيتى مول وما ادراكم ما سيتى مول

اتقلب بقدرة ريا وسكينة وبقى

العباسية مول

وقوم ايه احنا دخلنا المول من هنا والدنيا اتقلبت من هنا

البت دى تجرى تقرص فى العيال

والتانية تجرى تتف على الناس وتطلعلهم لسانها

واحنا شوية نعتذر هنا

وحبة هنا لحد ما ربنا هداهم لفسيوثانية

و دخلنا محل ملابس واول ما مامتهم دخلت

البروفه عينكم ما تشوف الا الضلمة

اتسحبت نسمة اللى هى اصلا عاصفة

وقعدت تفتح البروفات على الستات وهى بتقيس وهاتك يا ضحك

والستات تصوت

واللى تشتم واللى تجرى وراهم بالجزمة

والبنت البياعة قعدت تزعقلى على اساس انى امهم

وتقولى لمى ولادك يا مدام

مش كده ده محل محترم

وانا كأنى واكلة سد الحنك وفى حالة ذهول

واقتنعت انى امهم بجد

والبنت التانية هادية اللى هى اساسا كارثة

كانت متخصصة فى حاجة اهم وأكبر

شكلها بترسم على انها تبقى رئيسة عصابة اد الدنيا

عقبال اولادكم

بقيت تأخد الهدوم وتجرى

بيهم على الماكنة فطبعا الماكنة تصفر

وفضلت على كده حبه حلوين وفاكرة انى دى لعبة

والناس تفتكر ان فى حراميه

وصاحب المحل يجرى وأمسك حرامى

وعايزين يقفشوه

ومش هحكى على الباقى بقى استنتجوه انتم

ايون هو ده على رأى تموره

اضربنا لما اتعمينا وفين يوجعك

وجه المدير وهو معلقهم من قفاهم وموجه كلامه ليا وقالى

طبعا حضرتك مامتهم

طيب مش تربيهم دول مفيش أدب ولا تربية يا مدام

انتى مخلفة عفاريت وحراميه

احاول انفى

اواتكلم طيب افتح بقى مفيش

وادور على امهم وكأنها لم تكن

لدرجة انى شكيت انى امهم فعلا

وشلوت من هنا على شلوت من هناك لحد ما اتكسحت

واتسحلت على اجدعها قسم

وامام السيد الضابط مأمور قسم الازبكيه لقيت انه مفيش غير حل واحد

انى انهار واعترف بأنى ام المتهمات

المتشردات عاصفة وكارثة

وطالبت بايداعهم مؤسسة رعاية الاحداث

وبكده استريحت وريحت سكان العمارة وأمهم نفسها والناس من شرهم

شفقــــــــــــــــــة

أحســــــــان أفندى فى المصيـــــــف

الجو حر الجو نار والصيف مولع الواحد مبقاش يستحمل

شفقة: سونسون الجو نار الدنيا هتولع

احسان:نار هتولع

انتى عندك طفاية حريق

طفى بيها وسيبينى اتفرج على الماتش يا مؤذيه

شفقة:ماتش ايه يا عم انت ؟؟

وطفاية حريق ايه بقولك الجو حر

مش العربية بتولع

احسان: طيب يا شفقة ما تقعدى فى التلاجة

ولاافتحى التكييف تتكيفى

ولا انا اجيب تكييفات وادفع دم قلبى وانتى تقولى الدنيا حر

او ادخلى الحارة اللى جاية على ايدك الشمال هتلاقى

طشتك وبانيوهك وميتك

اقعدى فى الطشت هتلاقى طراوة

شفقة: انا اقصد ان الصيف جاى السنة دى غير كل سنة

احسان:غير كل سنة ازاى يعنى؟؟

مش لابس بربطوص ولا

مركب زلومة

شفقة: ياه على تقل دمك وهزارك يا سونة

انا عايزة اطلع اصيف اروح اتفسح

احسان: تصيفى فين بقى ان شاء الله ما الهواء هنا

فى البلكونة يشرح القلب

ولا انتى غاوية شحططة ومرمطة؟؟

شفقة: بلكونة ايه وبانيو ايه؟؟

انا عايزة اروح بورتو مارينا او بورتو السخنة

او ممكن لندن..... باغى

يعنى حاجة كده تليق بمقامقى

احسان: مقامك؟؟ لا اذا كان على المقام فعندك الحسين

او السيدة

قال بورتو...... قال ....ولندن

يا خالتى ومالها بلطيم وافغانستان وحشين؟؟

تروحى هناك تتجندى وترجعيلى تايبة

والنبى يا شيخة ابعدى عنى وشوفيلك حتة تتهوى فيها

شفقة:والنبى يا سونة نفسى

اصيف وابلبط فى البحر

تعالى نروح بورتو مش هتندم البت سفاقس بنت خالتى راحت

بورتو وبتقولى جنان تهوس

احسان:بذمتك فى حد يبقى اسم بنت خالته

سفاقس!

ويروح بورتو؟؟ ده كبيرها الملاحات

عموما اذا كانت تجنن يبقى مفيش مانع

اهو نرجع من هناك بفايدة

وندخلك سرايا المجانين

وارتاح من الزن واللت والعجن

شفقة: اه بس فى حاجة كمان صغننة رفيعة عريضة

احسان: ها يا واجعة معدتى ادينى تقلصات ادينى

شفقة:عايزة اجيب مايوه بيقولوا هناك المايوه هو الزى الرسمى

يرضيك ابقى عره وسط اهل بورتو؟؟

احسان: نعم ياختى....... مايوه وزى رسمى

طيب ومالها البدلة والبابيون دول عليكى يليقوا اوى

مع شنب كمان تبقى زى الفل وسيبك من مارينا وروحى اقعدى على القهوة

شفقة:يوووووووووووووووه .....بطل بقى

احسان:بقولك ايه نسافر اه...... مايوه..... لالالالالا

انا بس اللى البس مايوه

ستات دماغها مليانة كلام فاضى

بطلى تتفرجى على كليبات بوسى سمير

شفقة: وفيها ايه يا سونة انا اقصد مايوه شرعى

احسان:اه..... اذا كان كده ماشى

اصلى كنت بحسبه عرفى

وسافرنا صبرتوا ونولتوا المدينة الغناء بورتو مارينا

واحنا قاعدين على البلاج

شفقة: احسان بتبص على ايه شايفة عينك رايحة وجاية

لما جتلها ميه بيضاء

طيب حتى وقفها فى الاشارات

احسان يا شيخة طيب زمرى قبل ما تتكلمى

خضتينى انا ببص على الايس كريم بالشيكولاته

شفقة: بييييييييييييييييييييييييييييييييييييييييب ادينى زمرت اهو

بقى بتبص على الايس كريم ولا الايس كريمـــــــــــــــة؟؟

احسان: كريمة مين وبتاع مين يا شيخة

انا بس بتأمل بشوف ايه الجديد

"فى سره"والنعمة البت سفاقس بنت خالتك دى تستاهل هدية

اول مرة تدلنا على حاجة عدلة

تلاقى جوزها ابن المحظوظة هو اللى عرفها المكان

شفقة :حاجة عدلة اللى هى ايه ؟؟

المايصين المدلعين اللى رايحين جايين على البلاج يتاصعوا

بالمايوهات الفسفورى ولا ليهم ظابط ....ولا رابط

احسان: جرى ايه يا ست انتى

هو انتى من الحكومة ولا ايه؟؟

بقى ما صدقنا خلصنا منهم تطلعلنا انتى يا ساتر عليكى

ست من الحزب الوطنى المقرفاتى النابراتى

مين جاب سيرة الظباط والعساكر دلوقتى؟؟

انتى هتخليها امن دوله ولا ايه

خلينى امتع نظرى شوية بالحاجات الحلوة

قبل ما يروح عليا وامسك عكاز

وقعد يغنى انا بعشق البحر وبعشق موززه كمان

وحاسس انى تايه وحيران

ومبسوط ومش نعسان

وحاسس انى ندمان... وكنت كمان غلطان لما اتجوزت زمان

من شفقة اللى شبه ابو قردان

ويا عينى يا عينى يا سيدى على النسوان

شفقة: نعم بتقول ايه يا سى احسان

حاجات ايه اللى حلوة؟؟

احسان: ها... مابقولش انا اقصد الحاجات الحلوة الكتير اللى قاعدة مرزوعة جنب قفايا

انتى يا بسبوسة قلبى ......يا قطايف عقلى

شفقة: طيب حاسب يا سى رمضان لتلزقنى

بياميشك..... ااقصد بكلامك

احسان:بس تصدقى يا شفشوقتى كان عندك حق

لما قلتى نيجى بورتو

اهو تغيير برضوا بدل المناظر بنت الكئيبة اللى بتعمينا هناك

وبنصتبح بيها كل يوم فى مصر

والنعمة الواحد يطلب نقله فى الشغل هنا

تفتكرى يوافقوا يا روحى ويقدروا ظروفى

شفقة: وان شاء الله هتشتغل ايه ...... مبصبصاتى .... ولا معكساتى

ولا هتشيلهم الشنط؟؟؟

احسان:وانا اطول بس قولى يارب

احم احم يا ستى ده انا سبعة صنايع والبخت ضايع جنبك

ده انا علشانهم وعلشان مايوهاتهم

اشتغل روم سيرفيس

ارص شماسى وكراسى على البلاج

اشتغل دليفرى بيتزا

اى حاجة تخلينى لازق فى المزز اللى ترد النظر دى

شفقة: مزز وترد النظر هو انا مش مالية عينك ولا ايه؟؟

احسان:ماليه؟؟؟ ده انتى تملى تلاجة بحالها

مش عينى بس

يابــــــــــــاى الواحد مش عارف يتنفس

ارحمينى بقى وسيبينى اتمتع شوية

واشم ريحة نضيفة بدل ريحة المحشى وبابا غنوج وام اربعة وتمانين

شفقة: تتمتع شوية..... وبابا غنوج

شكلك جوعت يا سونة وشكلى هاكلك طرب

بس من اللى هو

عارفه؟؟ الطرب بالبونيه والبوكس والروسيات

احسان: روسيات ما تخليها طاليانات احسن والطف

يا روحى عليهم امــــــــــــوه

عاملين زى السمك بيلعلطوا فى الميه

اه يا اوحــــــى...... يا اوحــــــــى

شفقة: جتك وجع اوحــــــــــــــك يا حياتى

وفات يوم والتانى وسونة مش مركز معايا قاعد لازق على البلاج

ولا اللى قاعد جوه كرتونة مش عارف يخرج منها

عينه بتشرق وتغرب وراء المزز لحد ما فرسنى ولا كانى هنا

قعدت افكر واقول جبتيه لنفسك يا بت يا شفشق

استنى عليا يا مقصوفة الرقبة يا سفاقس لما ارجعلك

انا توقعينى الوقعة دى

وكان مالها بلطيم ولا القنطرة وحشين ولا وحشين؟؟

ده كان هناك الهواء مفيهوش نسمةبس على الاقل بيقعد زى الألف

ويشوفنى هناك ولا مارلين مونورو

اعمل ايه قعدت اقول اصيف اصيف لما الراجل هيروح منى

وهتنشله بت بلطية ولا طاليانيه ولا روسيه

لابقى ما بدهاش لازم امخمخ وامشى من مارينا بلا رجعة

ومالها كوم الدكة

اهى حلوة والمزز هناك بالجلاليب ام سفره وحفى وبالعمه

وحاجة تشرح القلب وزى الفل

هناك يا دوبك يلحق

يرجع

مش يبص

واحس هناك انى ملكة جمال انطاكيا

لكن بـــــــــــــــــــــورتو

خلت البنات هناك تبورتو ....وتعنسوا..... وتشيخوا كمان

وبقيت كل يوم اروح افصل الكهرباء من العمومى

لما خلتها عتمة وضلمة

لحد ما سونة ما بقاش عارف يفرق بين الشورت والجلابية

ولا البانيو من البحر

شفقة :سونة بقولك ايه يا حبيبى فى الظلام الدامس ده

احنا شكلنا مش هينفعلنا قعاد هنا

لا شايفين حاجة ولا عارفين حاجة

الدنيا كحل واحنا جايين نصيف ولا نتعمى؟؟

يلا بينا نرجع

احسان:شامم ريحتك فى الموضوع ده يا شفقة

اخ يانى اخ ....... يا فرحة ما تمت اصل هو كده فى ناس فقرين

عارفاهم يا حبيبتى؟؟

شفقة: ولا تزعل نفسك يا نور عينى انا حجزتلك اسبوع فى جمصة

وحضرتلك برجرام انما ايه يهوس

وهتنبسط اوى

احسان:برجرام فى جمصة وعمالة تقولى لندن وباغى

قدامى..... قدامى ياختى

شفقة: يا خويا بلا بورتو بلا فورتو

وقال على رأى المثل من خرج من داره يتقل مقداره

شفقـــــــــــــــــــــــــــــة