ثورة قلم اتظلم

-سكوت هنزور

ده شعار الحزب الوطنى فى مرحلة الانتخابات والتى بدات بانتخابات مجلس الشورى والتى احرزت تفوقا كاسحا لصالح الحزب الوطنى بسبب ذلك الشعار وربنا يستر على انتخابات مجلس الشعب والرئاسه اللى جايين(وسلمولى على جمال مبارك رئيسا لكل المصريين)



-خلاصة العلام ورقه فى امتحان

اما هذه العباره فتشير الى حال تعليمنا المشمئز وحال طلاب العلم وانه بمجرد خروج الطالب من لجنه الامتحان لو اردت ان تساله عن اى سؤال اتى فى الامتحان يرد عليك يكل غرابه ويقولك

هو كان امتحان ايه اصلا وهذا يعنى ان خلاصة حوالى 15 سنه تعليم تذهب هباءا منثوره بمجرد تسليم اخر ورقه امتحان فى اخر سنه ليقف بعدها الطالب فى طابور العاطلين الباحثين عن عمل يناسب تعليم السنين(وسلمولى على الكورسات)



-قطرات دماء مقابل قطرة ماء

اما هذه الجمله فتشير الى المستقبل المشرق الذى ينتظر اجيالا ستاتى من بعدنا لتواجه بمفردها واقع سيكون مفروضا عليها وهو الدفاع عن امن مصر المائى مش السياسى(وسلمولى على الافارقه)



-لوبصيت على الناس فى الموصلات هتلاقيهم فى غاية الانبساط

اما هذه العباره فهى رساله قصيره من تليفون محمول مساعد وزير النقل والمواصلات اللى تليفون سعادة الوزير نفسه

وبيها بيتعرف سعادته على اخبار وزارته وهو فى الساحل الشمالى بيصيف

ملحوظه :- فى ناس وحشه بتقول ازاى سيادة بيتابع شغله بالتليفون

هرد عليهم وهقولهم مش الحكومه الموقره حكومه الاكترونيه وبما ان المحمول جهاز الاكترونى اذا سيادته بيلتزم بتعليمات حكومته الالكترونيه (وسلمولى على مراوح المترو وقطارات الصعيد)



-ليس كل مانتمناه يتحقق

هذه العباره تلخص حالنا نحن البشر فى تلك الحياه الدنيئه فدنيانا مليئه بالتناقضات فنره الحزن والسعاده والحب والكراهيه

والهمه والكسل

والغنى والفقر

وخلاصه تلك العبار ان ليس كل مايسعه اليه الانسان يتحقق وان ليس كل ماتشتهيه النفس تحصل عليه(وسلمولى على المصريين)

سلام الله عليكم

موضوعى النهارده بيتكلم عن الزهق كاحد اسباب التغيير



وعشان اوضح قصدى من عنوان البوست ياريت تقروه البوست



الزهق كلمه وحاله بتحصل للانسان فى كل مجالات حياته

يعنى ممكن الواحد يكون زهقان من شغله ومش راضى بيه

وممكن يكون زهقان من لبسه ومن اكله ومن مراته




يعنى بمعنى اصح الانسان بطبيعته بيحب التغيير

ومش لازم الزهق يكون بسبب سلبيات بيشوفها الزهقان

بــــــــــــــــل

بالعكس ممكن الواحد يزهق من الحاجه الكويسه



يعنى ممكن الواحد يزهق من مراته لانها طيبه وحنونه ومع ذلك ده فى حد ذاته بالنسبه للزهقان يسببله الزهق من طريقة معاملة الزوجه المعتاده ليه يعنى حابب يغير الروتين ويضرب مره بالشبشب


ده الانسان الطبيعى اللى بجد اللى لما بيزهق بيحاول يغير الحاجه اللى مزهقه



وعشان توصل وجهة نظرى ليكم

معانا مثال تانى للتوضيح



ايه رايكم فى واحد صاحبنا كان معاه جزمه جديده جدا

بس كان كل يوم بيلبسها والجزمه لسه عامله باصلها ( باين عليها ايطالى ) ولسه شغاله



على العموم

هيجى لصاحبنا يوم ويزهق منها

وساعتها ممكن يركنها على جنب ويشترى مكانها كاوتش باتا معفن

مع انها ممكن تكون اغلى واشيك من الكاوتش

وده لان الانسان بطبيعته بيحب التغيير



على العموم بعد المقدمه الطويله عن الزهق



كنت حابب اوجه كلامى دلوقتى الى السياسين اللى بيعارضوا فكرة الترشح امام الرئيس وابنه

بدعوه ان الرئيس هو صمام الامان لهذا البلد

وان حكمة الرئيس هى المحرك الرئيسى لمواجهة التحديات

الى اخره من التصريحات الحكوميه



وانا هنا مش مع مرشح معين او ضد الرئيس نفسه

انا مع فكرة التغيير فى حد ذاتها



ما هو مش معقوله

الناس متكنوش زهقت من حد عايش معاهم ومالى عليهم حياتهم بخطاباته وقرارته

وصوره اللى فى الجرايد والتليفزون وفى كل حته فى المحروسه لمده قربت على التلاتين سنه



حتى لو كان الرئيس كويس ومافيش عيوب فيه وان هو مثالى وشفاف ونزيه وكل الصفات الطيبه فيه

لان الانسان بطبيعته بيحب التغيير



وده يخلينى اطرح عليكم سؤال

هل احنا ناس طبيعين بتزهق وحابه التغيير ولا حاجه تانيه................؟!



لو كانت الاجابه بنعم

فعشان خاطرى بارجوكم من دلوقتى ولحد 2011 وعليكم خير

انكم تجهزوا بطاقتكم الانتخابيه عشان تقولوا للعالم كله

انكم ناس طبيعين و بتحبو التغيير

سلام الله عليكم

ازيكم جميعا



انا جاى النهارده اكتب عن موضوع بيضايقنى وبيستفزنى وهو موضوع عن اعلانات الحكومه المستفزه

وطبعا انا اقصد بالمستفزه الحكومه والاعلانات مع بعض

طبعا حضراتكم بتشوفه اعلان الرخامه اللى رجع يتذاع من تانى وهو اعلان وقفه مصريه

وادا ايه الاعلان بيفكرنى باعلان قديم باسم احسبها صح

http://saortqlm.blogspot.com/2009/05/blog-post_27.html



على العموم الاعلان ده بيحسسنى ان المشكله فى الشعب وان الزياده السكانيه هى ام المشاكل

وانها هى الى بتقضى على اى تنميه الحكومه بتعملها

يعنى من الاخر ان الشعب هو السبب

وان الحكومه بتعمل اللى عليها وزياده شويه



الاعلان ده بيدعوا الى وقفه مصريه عن الخلفه

اوك لنفترض ان الكلام ده صح مع انه ولا صح ولا حاجه

بدليل ان فى دول زى الصين والهند عايشين

حد يقدر يقولى ازاى هم عايشين ومع ذلك يعتبروه من اكبر الدول الاقتصاديه

فمثلا الصين غازت العالم كله بمنتجاتها

والهند الاولى عالميا فى صناعة البرمجيات غير مشروعها النووى



المشكله مش فى تنظيم الاسر والنسل

المشكله ان فى حاجه فى هذه الدول اسمها احترام ادمية الانسان

فنرى فى الصين الاسر المنتجه هى التى تصدر لنا غالب الصناعات



طبعا انا عارف انى كلامى ممكن ميعجبش بعض الناس

ويرد عليه بعضهم بسياسة الطفل الواحد اللى تتبعها الصين للحد من النسل

وساعاتها اقدر ارد عليهم واقول ان سياسة الطفل الواحد

الصين فعلتها عندما وصل تعداد شعبها مليار ونصف المليار

مش تمانيين مليون

انت عارف يعنى ايه تمانيين مليون بالنسبه للصين

يعنى الناس اللى بتخرج تتفسح فى احد الحدائق العامه



خلاصة كلامى

ان عمر ماكانت كثر تعداد الامم يكون عائق فى تقدم الامم

ولكن العائق هو الاداره السيئه التى تدير شئون هذه البلاد وتللك الامم



وعشان كده كنت حابب اطرح عليكم سؤال

فى حد يعرف حاجه عن وزارة اسمها وزارة التخطيط

او حد فيكم شاف لهذه الوزاره اى شئ يدلل على اهميتها فى الحكومه



على العموم

كان مقصدى من هذا البوست انه يجب ان تكون هناك وقفه مصريه بس مش وقفه عن الخلفه

ولكن وقفه ضد الفساد

وقفه ضد الحراميه وما اكثرهم فى بلادنا

وقفه ضد الاتاوات المفروضه على الشعب باسمها الجديد الضرائب العقاريه

وقفه ضد الاسعار وقفه ضد الاحتكار

وقفه ضد الواسطه والمحسوبيه



يعنى من الاخر وقفه مصريه ضد الحكومه المصريه

تحيه طيبه وبعد :



انا جاى النهارده احكى قصه حصلت بالفعل حصلت فى حى من اشهر احياء محافظة حلوان

وهو حى المعصره لعل البعض منكم يعرفه

على العموم

الحكايه بالظبط حصلت على طريق الاتواستراد وبالتحديد اتواستراد المعصره

المشهد بالظبط كالاتى :

هو عباره عن انسان ( رجل او امراه او طفل ) بيعدى الطريق + عربيه جايه على اخر سرعتها

وكل ده على طريق كبير وواسع وطبعا النتيجه كلكم عارفنها وهى جثه ممدوده على الارض ونهر من الدم بيسيل

المشهد ده كان بيتكرر كتيير ويكاد يكون اسبوعيا

لدرجة انى كنت راكب الميكروباص وشوفت حادثه وكانت صاحبة هذا المشهد امراه

وادا ايه المشهد ده هزنى من جوه لدرجة انى نزلت من الميكروباص عشان اشوف ايه اللى حصل

و ساعتها شوفت الجثه مغطى بالجرايد والناس ملمومين عليها

واللى خلانى اتخنق بجد

انى سمعت الناس بتتكلم بغضب

لدرجة ان بعض الناس قالوا لازم نعمل حاجه لازم نوقف الطريق عشان يحسوا بينا

وطبعا انا لما سمعت الكلام ده

قلت يا خبر ابيض لو حصل كده هتبقى مشكله

لانه ببساطه طريق زى الاتواستراد مينفعش يوقف لانه طريق حيوى وسريع

وكمان لو وقف هيوقف طريق زى الدائرى اللى رابط محافظات القاهره الكبرى مع بعض

على العموم

الشرطه طبعا جت زى الافلام العربى لما بتيجى فى اخر مشهد عشان تظهر شكل الامن فى الصوره

وبعد كده عدى اليوم وكل واحد راح لحال سبيله

وعدت الايام والحوداث بتحصل عادى خالص

لدرجة انى امى كانت بتدعلى انى ارجع ليها سالم لما تعرف انى هركب اتواستراد



على العموم

وفى يوم من الايام حصلت حادثه لشاب صغير ( 16 سنه )

وادا ايه الحادثة دى غير اى حادثه

وعلى راى المثل القائل القشه التى قسمت ظهر البعير

وساعتها ثارت ثورة المعصره الشعبيه

واخيرا ثارت المعصره وقالت لا كفايه حرام

وبقى كل واحد عارف هو هيعمل ايه

وبدات الناس ترمى طوب وحجاره ورمل

وساعتها الدنيا زاطات وجت عربيات الامن المركزى والمطافى والاسعاف

لدرجة انى برنامج العاشره مساءا جى وصور الاضراب الشعبى

وكانت كل الناس ساعتها بتردد كلمه واحده وهى كوبرى كوبرى

انتهى المشهد وانتهت الثوره

ولله الحمد دلوقتى الكوبرى على وشك الافتتاح



السؤال اللى بيطرح نفسه دلوقتى وعايزكم تجاوبونى عليه

هل ما فعله شعب المعصره صحيح واذا كان صحيحا هل توافقون على الاضراب فى شتى المشاكل التى تواجنا يوميا

ومع ذلك اتمنى ان يكون هناك حل اخر غير الاضراب لذلك ادعوكم لتحددوا معى حل اخر



اسف على الاطاله

حبسوكى الكلاب

حبسوكى الكلاب

حبسوكى يا مصر يا ام البلاد

حبسوكى فى زنزانه قفلها على الباب

مكتوب عليها ممنوع التصوير او الاقتراب

ممنوع العدل بين العباد

ممنوع الكلام او حتى العتاب

حبسوكى يا مصر يا ام البلاد

حبسوكى فى زنزانه قفلها على الباب

مكتوب عليها نعم نعم للفساد

نعم للصمت والسكات

نعم لتزوير الانتخابات

نعم للسرقه وحب الذات

حبسوكى يا مصر وقفلوا الابواب

حبسوكى وغموا عنيكى وزاد العذاب

حبسوكى يا مصر يا ام البلاد

حبسوكى وطفوا النور وشدو عنك الثياب

شدوها عنك وساعتها بدا الاغتصاب

فى لحمك فى عرضك فى شرفك حتى ذرات التراب

حبسوكى يا مصر يا ام البلاد

حبسوكى يا مصر ... بس مهما طال البعاد

لابد من يوم تخرجى تنتصرى فيه على الاوغاد

حبسوكى يا مصر يا ام البلاد

ان الحاصل بين لدين بحجم مصر والجزائر لهو حقا المصيبه الكبرى

والتى تتمثل فى رجوعنا الى ايام الجاهلية الاولى عندما كان كل فرد يفتخر بقييلته ويتعصب لها ويحارب من اجلها

وللاسف ظهر هذا واضحا اننا نرجع لعصور الجاهليه عندما نركن الى الوطنيه

وان بلدى اولا ولياتى الطوفان من بعدى



وفى الحقيقه ان هذا الفكر بات فكرا عقيما لايجدى نفعا



ولتنظروا معى الى المجتمعات الاوربيه والتى رات فى توحدها القوى الحقيقيه وان الفرقه هى الضعف بعينه

وكيف انهم بعد ذلك وحدوا عملتهم



وللعلم ان هذا الفكر يمارس على بلادنا العربيه من وقت لاخر وهو الانتماء للوطن وحده

وانا هنا لا اقول ان الانتماء للوطن جريمه او حراما

ولكن ليس الانتماء للوطن وحده هو الحل



ارى ان الاخوه فى مجتمعتنا العربيه قد ضاعت واقصد هنا باخوة الدين

والتى لولا ضايعها لما راينا كل هذا التعصب والاحتقان فى مبارة كرة قدم

ادى الى وقوع فتنه بين بلدين بحجم مصر والجزائر



لذلك ادعوكم لتتذكروا معى تلك الفتنه التى دارت بين انصار النبى صلى الله عليه وسلم

من الاوس والخزرج

تعلمون ان النبى وحد امته برابط الاخوه والحب فى الله

وهو الرابط الاصيل لجمع شمل الامه

ثم انظروا بعدها كم ان اليهود لم يعجبهم ذلك التوحد

فبدوا فى زرع الفتنه بالافتخار بامجاد القبيله

ومن هنا بدانا ننسى اننا امه واحده وبدا كل واحد يفتخر بقبيلته والتعصب لها

وكادت ان تقع الفتنه بين انصار النبى

وهذا مايحدث الان ولكن مع اختلاف المسميات والعصور





وانا هنا لا ادافع عما حدث فى السودان

او عن المرتزقه الجزائرين والذين اعتبرهم الطابور الخامس

والطابور الخامس هو طابور المنافقين على عهد النبى صلى الله عليه وسلم



وهذا الصنف من الناس موجود فى كل مجتمعتنا العربيه

ويقومون باشاعة الفتنه والكراهيه بين ابناء الوطن الواحد

فما بالك ببلدين كمصر والجزائر



وترى هذا الصنف موجود بشده فى اعلامنا ليوثر على العوام

وترى هذا واضحا فى قناه تدعى الجزيره فشغلها الشاغل العمل اثارة الفتن بين الشعوب وحكامهم



ولانى لا اصدق ان يكون هذا هو موقف الشعب الجزائرى عامه ( شعب المليون شهيد )



ولان الاعلام العربى يتحكم فيه ذلك الطابور الخامس الذى يدعوا الى الفرقه دائما

وهذا راينه على صفحات الجرائد الجزائريه العميله





ولتعلموا اخواتى انا هذا الطابور الخامس لايتحرك الا باجنده خارجيه تعمل على زعزعة استقرار بلادنا



لذلك ادعوكم جميعا الى التريث وعدم التسرع فى النطق بالحكم على شعب باكمله

وان نرى الموضوع بابعاده كلها

وان نراجع تاريخنا جيدا مع اليهود



فسحقنا لنا ولهم الا لم نفهم

اولا تحيه طيبه لكل انسان دافع عن قضية الشهيده مروه الشربيينى


وبجد كنت حابب ابعت رسالة شكر الى مروه والى دماءها الطاهره


لذلك كتبت بعض الابيات








دماء فى ساحات القضاء


دماء رايتها طاهرة تعلو قمة الصفاء


دماء رسمت فينا صفحة يغمرها كل النقاء


دماء مازلت تعطينا الامل مازالت تحكى لنا معنى الانتماء


دماء اشكرها على حسن صنيعها رفضت الاصغاء والانصياع












وده ابيات قديمه كتبتها وقت الحادث باسم : مروه تحدثكم





ارادوا خلع حجابى


ارادوا تمزيق ثيابى


رفضت صحيت قلت مالكم وحجابى مالكم وحجابى


اتريدونى ان اكون عارية للقاصى والدانى


اتريدونى ان اكون سافرة تغوص فى الاهوائى


فقاموا وطعنونى وفجروا الدم الطاهر من احشائى


فسار دمى ينزف وينهمر على الارض كالبركانى


فرانى طفلى اتلقى الطعناتى تلو الطعناتى


قال باكيا اماه ما لهذا الخنزير بالسكين رماكى


قلت ياولدى لاتحزن فهذا خير واشرف من خلع حجابى وتمزيق ثيابى

مات الكلام وانتهى

مات الكلام فى حلقها

لما شافت كف ايده نازل على خدها

حست ساعتها بمراره فى قلبها

حست ان عمره ماكان ابنها

حست ان دورها خلاص خلص وانتهى

بكت حزنت صعبت عليها نفسها

قالت لابد ان امشى من حياته كلها

لابد ان ابعد واسيبه ليها ولاهلها

وبالليل قامت ومشيت براحه على انامل رجلها

وساعتها وقفت على بابه وداعت ربها

قالت يارب خدنى وماتخلنيش اشوفه بعدها

وبعدها بايام اتصلوا عليه وقالولو حضرتك ابنها

قالهم ايوه ايوه هو ايه اللى حصلها

رادوا عليه وقالولو مات الكلام وانتهى مات الكلام وانتهى

سلام الله عليكم


بكره يوم جميل بالنسبلى واعتقد انهو برضو يوم جميل لينا كلنا


ويمكن احسن من يوم 6 اكتوبر ويوم جلاء الانجليز عن مصر


لانه هوسبب حياتنا الجميله اللى بنعيشها والرفاهيه اللى بننعم بيها


عارفين ليه


لانه يوم تولى سيادة الرئيس زمام الامور فى مصر


بكره 14/10/2009


وعشان كده بدعوكم للاحتفال بكره بمرور 28 سنه على تولى سيادة الرئيس الحكم


سنه من الرخاء والنماء 28


سنه من العدل والمساوه بين ابناء شعبه 28


سنه افناءها من حياته عشان خاطر شعبه 28


سنه من الصدق والشفافيه فى التعامل 28


سنه من الحب الصادق والمتبادل بينه وبين شعبه 28


بجد مش عارف اقولكم ايه
بجد احنا محتاجين نقعد نكتب 28 سنه عن انجازاته وعبوره المستمر للمستقبل


وده سر تمسك الشعب بيه حتى لو عاش 28 سنه تانيه لانه بصراحه الشعب مش هيعرف يعيش من بعده
و هيتبهدل من غيره وهتبقى حالته غايه فى السوء


وعشان كده بدعوكم ترفعوا اصواتكم فى نفس واحد وتعيدوا على الريس

وتقولوا كل سنه وانت مستقر ياريس
ربنا يديم عليك الصحه ياريس عشان خاطر شعبك الغلبان

هاتولى ورقه وقلم


اكتب فيها حكاية الزمن


هاتولى ورقه وقلم


اكتب فيها حكاية اللى مات واتظلم


هاتولى ورقه وقلم


اشخبت بيديا على كرسة الندم


هاتولى ورقه وقلم


افتح بيهم صفحه جديده فيها ذرة امل


هاتولى ورقه وقلم


الذره تبقى ذرات تبقى خليه تبقى بشر


هاتولى ورقه وقلم


وماتنسوش استيكه امسح بيها غلطات البشر


هاتوى ورقه وقلم


ارسم بيهم رسمه كبيره فيها خضره وشجر


هاتولى ورقه وقلم

بعد غروب الشمس بدقائق خرج صاحبنا الى شرفة منزله على رائحة محل الكباب المجاور للمنزل


فراها من بعيد فاعجب بها وزاد نظره لها وزاد اشتياقه لها


وهى مع ذلك لاتشعر به ولا تدرك انه يراقبها


فقال فى نفسه لابد ان تكون لى وحدى


فقرر ان يخطفها وبالفعل نزل من منزله متجها نحوها


وفجاه خطفها دون ان يشعر به احد


وقال فى نفسه لابد ان انفرد بك


ولكن اين المكان الذى سيجمعنا


فنظر يمينا وشمالا فلم يجد الا منزله


فقال لا لا.. فهناك اخواتى واذا عرفوا سيفتضح امرى ....لا لا


لذلك لابد ان اخرج من هنا وابحث عن مكان لا يعرفنى فيه احد


وظل يمشى ويبحث عن مكانا امن


حتى راى حديقه كبيره مليئه ( بالحبيبه )


فقال هذا افضل مكان فلن يتطفل علينا احد فى خلواتنا


فكلا مع محبوبته


ودخل بها الحديقه


وبدا يبحث عن مكانا اكثر امنا حتى ينفرد بها


حتى راى مكانا بين شجرتين


قال نعم هذا رائع


فاسرع بها نحو المكان .... فاجلسها


وبدا ينظر لها ويشم رائحتها


ويقول كم هى رائحتك جميله


وبدا يتحسسها بيده


فيسعد وينشد فرحا ويقول


ها انتى لى لوحدى ....... ولن تكونى لغيرى


وفجاه مسك وركها الايمن وقال ..... بسم الله











اخوانى ياريت ميكنش دماغ حد فيكم تكون راحت بعيد





دى قصة واد غلبان مكلش زفــر من شهرين


فاضطر يسرق الفرخه اللى كانت عند الكبابجى





انتهت

اخرجى ايتها الكلمات من صدرى


اخرجى بلا رجعة وابتعدى


اخرجى فقد سئمت الحديث معك


فما انت الا هواجس لا ترقى للفعل


الى متى تظلين حبيسة صدرى


اخرجى واصرخى واعترضى


وقومى وبادرى بالفعل


الى متى يخيل لكى انك انتصرتى


لن تنتصرى يوما لازلت فيه فى الكهف ترتعدى


اخرجى ايتها الكلمات وابتعدى


اخرجى بالله عليكى ولا ترتدى


اخرجى وارتمى على صفحه بيضاء وانتفضى


ثورى ثورتى ... ثورى ثورة قلمى


اخرجى ايتها الكلمات من صدرى