Banshari Banine

• ગઝલ – યાદ પણ કરતા નથી.

વીતી ગયેલી મિત્રતાને યાદ પણ કરતા નથી,

ડાયરીમાંથી નામ મારું બાદ પણ કરતા નથી.

કાયમ સહન કર્યા કરે, જોહુકમીને સંબંધમાં,

તકરાર તો કરતા નથી, ફરિયાદ પણ કરતા નથી.

જીવી રહ્યા છે લોક સૌ, બંધુકધારી દેશમાં,

ડર મોતનો હરરોજ છે, પ્રતિવાદ પણ કરતા નથી.

સાચી હતી એ લાગણી ભૂલી ગયો છું એટલે,

સંબંધના દર્દો હવે નાશાદ પણ કરતા નથી.

તારી ગઝલમાં ‘સાજ’ એવું તે શું છે કે, શાયરો_

દેતા નથી જો દાદ તો પ્રતિપાદ પણ કરતા નથી.

• ‘સાજ’ મેવાડા

સમજી લો – ગઝલ

લૂંટી લેશે, દુનિયાદારી સમજી લો,

દુનિયા કેવી છે વેપારી સમજી લો.

જીવનભર રૂપિયા પાછળ દોટ લગાવે,

પડદા ઓથે કારોબારી સમજી લો.

રંક, દલિતો, મા બ્હેનોને ચૂંથી નાખે,

કોનું પીઠબળ, કોની યારી સમજી લો.

હાથ મિલાવી થોડા માટે મારી નાખે,

લાલચની છે મિત્રાચારી સમજી લો.

ભારતની આ બરબાદી કોના હાથે?

નોંધાવે છે જે નાદારી સમજી લો.

સૂરજને સંતાવાનો વારો આવ્યો,

આખી દુનિયા છે અંધારી સમજી લો.

જો કરશે ન્યાય આખર કુદરતની કોરટ,

‘સાજ’ પ્રભુનો છે આભારી સમજી લો.

• ‘સાજ’ મેવાડા

        આજની નઝમ

આવી શકે તો આવ હું લાચાર નહિ કરું,

આવે નહીં તો પણ ભલે તકરાર નહિ કરું.

કાયમ રહે છે યાદ હું ભૂલ્યો નથી કદી,

સપનામાં આવશે તો હું ઇનકાર નહિ કરું.

જાણી ગયા લોકો હવે મારી દીવાનગી,

છોડી તને બીજા કોઈને પ્યાર નહિ કરું.

દુશ્મન બનીને આવશે મારા વિરોધીઓ,

છૂપો રહીને પીઠ પાછળ વાર નહિ કરું.

જન્મો જનમની પ્રિત છે એવી ખબર મને,

તારા વગર હું સ્વર્ગનો સ્વીકાર નહિ કરું.

જેવા પ્રકારો વાદ્યના સૂરો નવા નવા,

હું ‘સાજ’ને નીચો ગણી વેપાર નહિ કરું.

• ‘સાજ’ મેવાડા

મિત્રો, ઘણા સમય પછી નવી ગઝલ રજૂ કરું છું.    

    ખૂલી જશે – ગઝલ

બંધ મૂઠ્ઠી જે સમે ખૂલી જશે,

રેત જેવી લાગણી સરકી જશે.

ફૂલને ભમરો ડરાવે ના કદી,

સ્હેજ ચૂમી પ્રેમથી ઊડી જશે.

વેશ જીવનમાં ઘણા ભજ્વ્યા કરે,

રંક કે રાજા હતો ભૂલી જશે.

તાડ જેવો એટલે ઊંચો થયો,

વ્હેમ છે આકાશને આંબી જશે.

જન્મભરનો દોસ્ત મારો કૄષ્ણ છે,

હાથ ઝાલી મ્હેલમાં તેડી જશે.

‘સાજ’ તારો રાગિણીનો સાથ પણ,

નાદ અનહદ સાંભળી છૂટી જશે.

• ‘સાજ’ મેવાડા