paragraf - Pagina iniziala
Bainvegni tar la Lia Rumantscha
La Lia Rumantscha è vegnida fundada ils 26 d'october 1919 sco organisaziun tetgala da las uniuns linguisticas rumantschas. Ella è in’instituziun d’utilitad publica ed è politicamain e confessiunalmain neutrala. En il rom da sia incumbensa da dretg public attribuida da la Confederaziun e dal chantun Grischun porscha ella differents servetschs.
La Lia Rumantscha sustegna, promova e coordinescha ils projects da las organisaziuns regiunalas e surregiunalas a favur da la lingua e cultura rumantscha. Ella s’engascha per la promoziun ed il mantegniment dal rumantsch e represchenta la Rumantschia en ils differents champs da la vita sociala e statala entaifer ed ordaifer il territori rumantsch tradiziunal.
Novas
Ina schelta da nossas purschidas
Check-in rumantsch
Sco persuna novarrivada en il territori rumantsch ta dumondas ti probablamain: Co poss jau emprender rumantsch? Datti dicziunaris online? Nua chat jau cudeschs auditivs per mes uffants? Sche quai è il cas, lura es ti qua en il dretg lieu. Noss «Check-in rumantsch» dat resposta a questas ed a bleras autras dumondas.
Curs da rumantsch
Nus purschain a tut las persunas che vulan emprender rumantsch u che vulan perfecziunar lur cumpetenzas dal rumantsch las pussaivladads da far quai independentamain dal lieu. Ins po tscherner da curs en differents formats en tut ils idioms e rumantsch grischun.
kidsfits - Program da famiglia
kidsfits, noss program da famiglia, è ina purschida per famiglias, canortas, gruppas da gieu e scolinas. kidsfits stat per uffants fits che han plaschair da la lingua rumantscha e che fan diever dad ella. kidsfits datti en tut ils idioms ed en rumantsch grischun.
Sirup rumantsch e Stgazi d'istorgias
Sirup rumantsch – l'inscunter per uffants rumantschs a Cuira: per giugar, chantar u zambregiar da cumpagnia. Il Sirup rumantsch per uffants accumpagnads fin 5 onns è ina purschida cuminaivla da l'Uniun Rumantscha Cuira e da la Lia Rumantscha.
Stgazi d'istorgias – prelecziuns per uffants: qua spetgan ils uffants munds miraculus e magics. Il Stgazi d'istorgias è ina purschida da l'Uniun Rumantscha Cuira e da la Lia Rumantscha, en collavuraziun cun la Biblioteca da la citad da Cuira.
Translaziuns e lectorats
Nus translatain e lectorain texts da tut gener en rumantsch grischun ed en ils idioms. Per il solit translatain nus dal tudestg, ma occasiunalmain era dal talian, dal franzos e da l'englais.
Pledari Grond
Il Pledari Grond è ina plattafurma da dicziunaris online che reunescha sut in tetg vocabularis dals idioms e dal rumantsch grischun. Il vocabulari rumantsch grischun, surmiran e sutsilvan po la redacziun dal Pledari Grond cumplettar d'in cuntin cun propostas che las utilisadras ed ils utilisaders fan per pleds che mancan. Questa pussaivladad d’engrondir il stgazi da pleds vulain nus prest era porscher per ils ulteriurs idioms.
Contribuziuns finanzialas
Nus sustegnain projects rumantschs cun contribuziuns finanzialas. Ins po inoltrar projects culturals da tut las spartas artisticas da tempra interdisciplinara e socioculturala e dal sectur da la cultura populara. Plinavant sustegnain nus projects da lingua e da furmaziun.
Cussegliaziuns
Giavischais Vus ina cussegliaziun en connex cun il rumantsch? Nus As cussegliain gugent en dumondas davart la lingua, la cultura, la furmaziun u la represchentaziun d'interess.
