Hurrungane

Hurrungane ligg mellom den tronge Utladalen i aust og Bergsdalen i nord med sidedalen Berdalen i vest. Hurrungane utgjer eit alpint fjellandskap som er bygd opp av hard gabbro og sterkt oppskore av iserosjon. Restane av den gamle bergoverflata, peneplan, står igjen som skarpe tindar med smale band og egger imellom. Berggrunnen høyrer til Den skandinaviske fjellkjeda.

Frå Utladalen fører ei rekkje dalar inn i fjellområdet: Frå sør kjem Gravdalen, Stølsmaradalen, Midtmaradalen, Maradalen og Jervvassdalen. Frå Bergsdalen/Berdalen fører Ringsdalen, Skagastølsdalen og Helgedalen inn i Hurrungane frå sør.

Den opprivne ryggen av Skagastøls- og Styggedalstindane i den nordaustre delen av området utgjer det høgaste og mektigaste partiet i Hurrungane. Den dominerande tinden er Store Skagastølstind, Storen, på 2405 meter over havet. Storen er den tredje høgaste fjelltoppen i Noreg. Andre høge toppar i denne fjellryggen i nordaust er Store Styggedalstind (2387 moh.), Gjertvasstind (2351 meter over havet) og Sentraltind (2348 moh.). Desse er høvesvis nummer 4, 10 og 11 på lista over dei høgaste toppane i landet.

Lengst sørvest i Hurrungane ligg Store Austanbotntind, som er ein ruvande topp på 2204 meter over havet. I nordvest ligg Store Dyrehaugstind (2147 moh.) og lengst vest Soleibotntindane (2083 moh.). Det er i alt 19 toppar over 2000 meter i Hurrungane og 13 over 2100 meter. Hurrungane inngår i Jotunheimen nasjonalpark.

På Skagastølsbandet ved foten av Storen har Den Norske Turistforening hatt ei steinbu, Skagastølsbu, gjennom mange år. I 1938 fekk Norsk Tindeklub si eiga hytte, Skagadalshytta, ved breidda av Heimste Skagastølsvatnet. Skagadalshytta ligg 1350 meter over havet, nesten 500 meter over Turtagrø.

Då fjellklatraren William Cecil Slingsby i 1876 blei den første til å klatra opp Storen, markerte det starten for norsk klatresport. Hurrungane har blitt eit av dei mest populære områda for fjellklatring i Noreg.

Namnet Hurrungane kjem visstnok av hurra, ‘dundra’, og siktar til larm i fjellet.

• Store Skagastølstind
• Store Styggedalstind
• Jotunheimen
• Jotunheimen nasjonalpark
• Noregs høgaste fjelltoppar

• Arne Larsen (2014). Storen. historien om menneskene og klatringen på Store Skagastølstind i Jotunheimen. Oslo: Fri Flyt
• Ben Johnsen (1991). Jotunheimens stortopper. Oslo: Norsk Tindeklub
• Helge Giverholt (1948). Jotunheimens erobring. Oslo: J. W. Cappelens Forlag