Íslenski dansflokkurinn er aðal­drif­­fjöðurin í dans­­heiminum hér­­lendis. Hann þróar og setur á svið ný íslensk dans­verk sem sýnd eru heima og erlendis, en tekur jafn­framt þátt í alþjóð­legum sam­starfs­verkefnum. Megin­markmið Íslenska dans­flokksins er að vekja og við­halda áhuga almennings á list­forminu. Hann lætur sér annt um áhorfendur sína og vill mæta þeim á fjöl­breyttan hátt.

Listdansstjóri Íslenska dansflokksins er Lovísa Ósk Gunnarsdóttir. Lovísa hefur starfað sem dansari hjá ÍD, sem sjálfstæður danshöfundur, kennari og sviðslistamaður á Íslandi og hefur skapað verk fyrir Íslenska dansflokkinn, Reykjavík Dance Festival og Borgarleikhúsið svo nokkur dæmi séu nefnd. Lovísa hefur hlotið verðlaun og tilnefningar fyrir störf sín bæði sem danshöfundur og dansari.

Íslenski dans­flokkurinn vinnur jafnt með tón­listar- og mynd­listar­fólki, sinfóníu­hljóms­veitum og öðrum dans­flokkum. Hann tekur þátt í tón­listar­mynd­böndum, dans­kvikmyndum og hátíðum af ýmsu tagi, skipu­leggur vinnu­­smiðjur, lista­manna­­spjöll og sýnir verk sín allt eins í almanna­­rýmum og á lista­­söfnum. Þessi aðferða­fræði og sýn hefur skapað Íslenska dans­flokknum sérstakan sess í hópi fram­sæknustu dansflokka Evrópu.

Dæmi um samstarfsaðila: SigurRós, Ben Frost, Anna Þorvaldsdóttir, Björk, Ólafur Arnalds, Jonas Akerlund, Matthew Barney, Gabríela Friðriksdóttir, Ragnar Kjartansson.

Íslenski dansflokkurinn hefur á að skipa fjöl­breyttum hópi afburða­dansara sem taka virkan þátt í list­sköpuninni hverju sinni og bera hróður flokksins víða um lönd, hvort sem borið er niður í South­bank Centre í Lundúnum, Onassis lista­mið­stöðinni í Aþenu eða Civic Centre Theatre í Hong Kong. Gott orð­spor er ekki síst þeim að þakka ásamt dans­höfundum, listrænu teymi, tækni­fólki og starfs­fólki á skrif­stofu sem öll vinna saman að því að skapa og koma á fram­færi dansverkum sem eftir verður tekið.

Íslenski dansflokkurinn vinnur náið með dansdeild LHÍ og heldur auk þess úti alþjóðlegu skipti­nema­pró­grammi þar sem áhersla er lögð á að auð­velda ungum dönsurum að stíga sín fyrstu skref í atvinnu­mennskunni.