Malappuram Science Festival

“The effort to understand the universe is one of the very few things that lifts human life a little above the level of farce, and gives it some of the grace of tragedy.” ― Steven Weinberg

ശാസ്ത്രത്തെ ആഘോഷിക്കാൻ പല കാരണങ്ങൾ കാണാൻ കഴിയും. അറിവു നിർമ്മിക്കാനുള്ള ഏറ്റവും ശക്തമായ ഉപകരണമാണ് ആധുനിക ശാസ്ത്രം. ഈ അറിവുകളെ അടിസ്ഥാനമാക്കിയ സാങ്കേതികവിദ്യയും വൈദ്യശാസ്ത്രവും നമുക്ക് ഒഴിച്ചുകൂടാത്തവയാണ്. ജനാധിപത്യത്തിൽ അടിസ്ഥാനമായ ആധുനിക ലോകക്രമം രൂപപ്പെടുന്നതിൽ ശാസ്ത്രത്തെ അടിസ്ഥാനമാക്കിയ ലോകവീക്ഷണത്തിന് വലിയ പങ്കുണ്ട്. ഇതെല്ലാം മാറ്റിനിർത്തിയാൽത്തന്നെ, അറിവിനു വേണ്ടിയുള്ള അന്വേഷണത്തിന് തനതായ ഒരു മൂല്യമുണ്ട് — കവിതയോ സംഗീതമോ ഫുട്ബോളോ ഒക്കെപ്പോലെ. മനുഷ്യനെ മനുഷ്യനാക്കുന്ന അടിസ്ഥാന സ്വഭാവങ്ങളിൽ ഒന്നാണിത്. 

ശാസ്ത്രത്തിൻ്റെ പല മാനങ്ങളുടെ ഒരു ആഘോഷമാണ് ഈ സയൻസ് ഫെസ്റ്റിവൽ. കാലാവസ്ഥാമാറ്റം പോലെയുള്ള വെല്ലുവിളികളെയും നിർമ്മിതബുദ്ധി പോലെയുള്ള വലിയ മാറ്റങ്ങളെയും അഭിമുഖീകരിക്കേണ്ടതെങ്ങനെ എന്ന് നമ്മൾ വ്യാകുലപ്പെടുന്നു. ക്വാണ്ടം ഭൗതികം പോലെയുള്ള ബൗദ്ധിക മുന്നേറ്റങ്ങളുടെ സ്വാധീനവും കേരളത്തിൻ്റെ വൈജ്ഞാനിക പാരമ്പര്യവും തിരിഞ്ഞു നോക്കുന്നു. അപരലോകങ്ങളിലെ ജീവൻ്റെ സാധ്യതകളെക്കുറിച്ച് കൗതുകപ്പെടുന്നു. ശാസ്ത്രം ഒരു സർഗാത്മപ്രവർത്തനമാകുന്നതെങ്ങനെയെന്ന് ചർച്ച ചെയ്യുന്നു. 

കേരളത്തിനകത്തും പുറത്തും പ്രവർത്തിക്കുന്ന ശ്രദ്ധേയരും അവരുടെ മേഖലകളിൽ വ്യക്തിമുദ്ര പതിപ്പിച്ചവരുമായ ഒരു സംഘം ഗവേഷകരും എഴുത്തുകാരും പ്രഭാഷകരുമാണ് ഫെസ്റ്റിവലിൽ എത്തുന്നത്. കലയും സാഹിത്യവും സിനിമയുമൊക്കെപ്പോലെ മലയാളിയുടെ സാംസ്കാരികമണ്ഡലത്തിൽ ശാസ്ത്രത്തിൻറെ സ്ഥാനം ആഘോഷിക്കാൻ മലപ്പുറത്തേക്ക് വരൂ.

ഡോ. അജിത് പരമേശ്വരൻ, ഫെസ്റ്റിവൽ ഡയറക്ടർ