Cristos II

Retratos que marcan un tiempo, ou melhor, dous tiempos: l purmeiro quando Sra. Oulinda era mocica i l outro no die de la sue boda. Neste hai ua cara que si se tira: Tiu Branco. Más, solo los chapéus a la moda de finales de l séclo XIX i amprecípios de l XX. Modas que tardaban an chegar a la raia!

Oubrigado a la família por retratos tán pimpones.

.

Buonas nuites

i muitas fiestas

Cristos I

Tiu Agusto, casado cun Tie Hermínia són l'ampeço de la família i este retrato ye tirado de cuostas pa la sue casa. La parede que eiqui se bei ye de la casa de los "Maricolas?" que tenie un recalço antre la parede de baixo e l camino.

Este camino ye un antigo zbio de l Camino de la Cándena adreitos a Custantín aspuis de la stacada (na Senhora) adreitos a Ourrieta Cuba, Funagal, Brunhos de Cabo, Fuontes, Pito ...

Hoije quedamos pula garrafa casera a meio de bino, ua modernidade pal tiempo.

.

Buonas tardes

i pingas restralhadas

La casa de tiu Cristo

Esta era la casa de Tiu Cristo an finales de 1950! Las froles spinduradas ... los puiales ... i la caixa de correio siempre pronta a recebir la notícia de la chimpa de Salazar!

Muito se poderie falar d'ambos retratos mas eilhes dizen todo, zde las selombras d'un anté l cabeço de la Tápia ne l'outro.

Buonas nuites

i buona suorte

.

La (an)justícia de los homes

Quando li la purmeira béç las abinturas de Marie Cunstáncia i achei l cabo Mendes, bi nel la figura de tiu Cristo (Agusto de sou nome mas para nós há-de ser siempre Tiu Agusto Cristo)! Tamien a él lo spulsoran de la guarda (era cabo) por haber dado agarimo a Tiu Ratica de Alcanhiças no tiempo de la guerra cebil espanhola: tirou l'home d'ua muorte más que cierta i quedou sien l sustento pa la casa.

Ye l nuosso cónsul salbador de cundanados i por assi dezir un de los anjusticiados de los mandones daquel tiempo. Mas baliu la pena nun baliu? Nós sabemos que hoije tornariedes a faer l mesmo por bias de los balores que siempre anterpretestes i mos passestes tán bien!

Buonas nuites

i buona suorte.

A camino de l Naso

Se bós soubissedes las bezes que corri todo l camino de Cicuiro anté l Naso i bolber solo para çcobrir l sítio adonde este retrato fui tirado al melhor tamien estabades cume you, cansadicos i de lhéngua fuora por bias de tanto caminar! Nos Cubos nun ye porque nun se beian freznos, antre Bal de Palombo i Alcança Lhobos tampouco porque eilhi l camino nun tén peinhas no meio. Será antre Peinha Lhastra i l camino de la Chana nas fraldas de l Sierro?

Estes tamien bán al Naso, assi cume nós tamien queremos estar no die 22 de Agosto. Andais meio çquecidos desse die i se nun marcais praça assujeitais-bos a quemer balanciga an béç de la posta caliente i çumarienta. I que fame que dou solo de amantar n'eilha!

.

Buonos dies

i buona suorte

Boda de Sra Olinda "Crista"?

I cume yá listes la cuonta dal pursor, hoije amostro-bos un retratico bien belhico.

Alguns conhecen-se, outros nien tanto, mas manhana yá bos los ansino.

Treze ténen nome i seis ou siete inda biben. I que biban inda muitos anhos!

Buonas nuites

i buona suorte

.

Balbina, Olinda e Olívia - 1942 - verso da foto anterior

Surpresa para Manuel Carbalho